LPS Fight Night: Johnkenty a inlan dawn ta

Bosch Home Appliances LPS Fight Night chu zanin hian LPS Arena, Falkland-ah neih a ni dawn ta a, Mizo fighter hmuhnawm ber pawl HC Johnkenty Vanhlimpuia a inlan dawn - en a chhirawm loh ang tih a chiang.

Zan dar 8:00-ah fight hi neih ṭan tur a ni dawn a, a hmuna fight en duh tan Rs. 100 leh Rs. 200 man ticket zawrhchhuah a ni a, kal hma a finthlakin a rinawm.

Hei le Johnkenty

Kum 27 mi Johnkenty hi Mizoram boxing-ah hriat hlawh viau mah se, professional boxing-ah erawh a la inlan ngai lo - zanin hi a vawi khatna tur a ni dawn a, Tuipui tlangval hian a tana zan chhinchhiahtlakah hian hnehna chan loh a duh lo ang.

LPS pro fight-a vawi 13 fight a neiha hnehna chang vek thei Johnkenty hi a tirah chuan Mizo boxer ṭha R. Malsawmtluanga nen inhnek tura tih a ni a, mahse, Mala hi Indian Army Sports Institute, Pune-ah awm mekin, a inlan leh thei dawn lo a, Mala aiah hian Jaipur boxer Pushpak Verma a ding ang.

Johnkenty a inpeih

Boxing thiam vanga Navy ṭang mek Johnkenty chuan, "Kum 2019-a LPS Pro Fight champion ka nih hnua Mizorama ka inhnek leh hmasak ber tur a nih avangin ka phur hle - Mizorama inhnek leh hi ka tum fo a, mahse, a hlawhtling thei lo.

"Mala nen inhnek tura tih kan nih hnuah a hlawhtling thei lo a, ka hnual hman hle. Mahse, Verma nen kan intawng thei dawn a, a inhnek video ka en aṭangin a thiam vak lo na a, tharum ngah tak a ni tih ka hria," a ti a, light heavyweight-a round li inhnek turah a fimkhur tur thu a sawi.

A tawp nan

Navy boxer a ni miau a, mahni duh anga awm theih a ni lo. Hei vang hian Johnkenty chuan professional boxing-a a match hmasa ber hi Mizorama a inhnek hnuhnun ber a nih theih thu a sawi. Tuipui boxer chuan, "Mizorama ka inhnek hnuhnun ber tur a ni mai thei a, min ṭantu te leh Mizo mipuite kan inhnek en ṭheuh turin ka sawm a ni," a ti.

Johnkenty hmachhawn tur Verma hi ft 5 leh 10 in a sang a ni a, boxer pahnih san zawng a inang - Verma hian vawi thum professional fight hmachhawn tawhin a chak vek a, heng zinga vawi hnihah hian a khingpui a knockout ve ve.

Ngaihven hlawh

Zanina inhnek tur ngaihven hlawh zingah, bantamweight-a Laldinsanga leh Ramdinthara inhnek tur a tel - boxer pahnih hi round ruk an inhmachhawn dawn a, tawnhriat aṭanga teh tur a nih chuan Dinsanga a ropui zawk.

Lunglei Ramthar tlangval hian vawi ruk fight a hmachhawn tawhah hnehna a chang vek a, a khingpui a knockout - nikum Pro Fight final-ah khan Ramdina hi a lo hneh tawh bawk. Pangzawl tlangval Ramdina hian zaninah phuba lak a tum ang.

A dang chu

Professional fight neih tur dangah, welterweight-ah Mission Veng tlangval Lalruatzela Hauzel leh Lunglei Luangmual tlangval Lalmuanpuia te an inhnek dawn a, round li an inhmachhawn dawn - Ruatzela hian vawi thum professional fight nei tawhin, vawi khat a chak a, vawi hnih a tlawm - Muanpuia hian vawi khat professional fight nei tawhin, a chak lo.

Super flyweight lamah pawh round li inhnek a ni dawn a, Champhai Dinthar boxer Vanlalenkawltira chuan boxer ṭha tamna Tuipui tlangval Lalrinngheta a hmachhawn ang - Enkawla hi nikum Pro Fight final hmuhnawm taka NT Biakkima nena innuai kha a ni a, professional fight vawi thuma la chak vek thei Rinngheta nena an inhnek tur hi en a châkawm hle.

Amateur

Professional fight karah amateur fight en tur a awm dawn. Featherweight-ah KISCE, Siaha lam mi L Joseph Buihringpachha leh KISCE, Kolasib boxer H. Zomuanpuia an innuai dawn. Joseph hi kum 15 mi lek niin, Muanpuia hi kum 16 mi a ni a, Khelo India Centre of Excellence hnuaia boxing zirlai pahnih hi an thisen a lum khawp ang!

Lightflyweight lamah, Melthum boxer ṭhangduang Emmanuel Vanlalthlengliana leh Chhinga Veng fighter Benjamin Lalrindika an innuai dawn a, boxer pahnih hian Fight Night-ah inhnek hmuhnawm chhawpchhuah an tum thu an sawi ve ve - amateur hi round thum ve ve khelh tur a ni.