James hoin USA an chak

Olympic mipa basketball a nih tawh chuan United States thawm a lian a, a bik takin kuminah hian an senior player ṭha tak tak an inlan dawn avangin ngaihven an hlawh, an inbuatsaihna ringawt pawh titi a tling.

US hian Paris Olympic inbuatsaih nan Germany chu 92-88 in an hneh a, an chak theih nan hian LeBron James chuan point 20 neiin a thawhhlawk leh hle a ni.

O2 Arena, London khawpuia inkhelah third quarter a zawh dawnin Germany hian 71-68 in hma an hruai, mahse James-a'n point 20 a neih zinga 11 chu quarter hnuhnung berah neiin a team a chak pui.

US tan hian Joel Embiid (15 points) leh point 13 neitu Stephen Curry te an langar bawk a, Olympic inbuatsaih nana match vawi nga an khelhah an chak kim vek. A zawna a vawi nga nan Olympic gold medal lak an tum ang.

Paris Olympic neih huna US hnam puanzar kengtu tur LeBron James chuan, "Kan tan fiahna ṭha tak a ni. South Sudan lakah pawh khan fiahna ṭha tak a ni tawh a, hei hian thil tam tak min zirtir a ni," tiin a sawi.

Olympic match pangngaiah chuan US hian Serbia (28 July) aṭangin bul an ṭan ang a, chumi hnuah South Sudan (31 July) leh Puerto Rico (3 August) te an hmachhawn chhunzawm leh ang.