Villa an indin ṭan - Player thar Onana man a to

Season thara Champions League khel tur Aston Villa pawh an inlak belh zel a, Everton midfielder Amadou Onana chu pound maktaduai 50-in an la lut - Villa Park-ah hian kum nga chhung khel turin contract a ziak.

Onana hian kum 2022 lawk khan Lille aṭangin Everton a zawm a, hetihlaia a man zat hi £33mtd niin Toffees tan inelna hrang hrangah match 72 a khelhsak a, goal li khungin assist vawi thum a nei.

Kum 22 mi Onana hi European football-a player hmabak nei êng pawla ngaih a ni a, kum 2023 khan Arsenal nen pawh sawi zawm lo ni tawhin, tun nipuiah pawh club langsar duhtu an awm nual nia sawi a ni - a tawpah Villa a pan.

Onana a hlim

Belgium international Onana hi Euro khelh zawh takah khan Belgium tan a feh chhuak a, round of 16-ah zinkawng zawh tawpin, minute zawng zawng a khel kim vek - ram tan match 17 a khel tling der tawh.

Onana chuan, "Champions League ka khel leh dawn ta a, chu chuan min tiphur hle a ni. Football khawvela coach ṭha ber pawl kan nei bawk a, hmasawn turin min pui thei ang tih ka ring tlat a ni," a ti a, European football piahlamah Unai Emery chu Villa a pan chhan a nih thu a sawi.

Belgian midfielder hian ram tana a khelhpui, Villa midfielder Youri Tielemans chu amah hmintu pakhat a nih thu sawi tel nghalin, "Youri hian he club chanchin ṭha tak tak hlir hi min hrilh a, he club ka zawm theih nan hian a thawh hlawk hle," a ti.

Villa an ṭang

Champions League-ah a vawi khat nan Villa an inlan dawn a, an ṭang hle - tun nipuiah player pariat ngawt an la lut tawh! Chelsea aṭangin Ian Maatsen chu £35mtd-in an la lut a, ani hi season hman zawh takah khan Borussia Dortmund-ah loan-a khelin, Champions League final luh nana player pawimawh a ni.

Juventus aṭangin Samuel Iling-Junior leh Enzo Barrenechea te pahnih lak nan £18.6mtd an seng a, Hull City winger Jaden Philogene (£18mtd), Luton Town midfielder Ross Barkley (£5mtd) leh Everton winger Lewis Dobbin (£9mtd) te lakluh nan an inseng nual a, Sheffield United forward Cameron Archer an la bawk - ani hi a man zat tarlan a ni lo thung.

Hetihlai hian Villa hian player an hralh ṭhen ve tho a, defensive midfielder ṭha Douglas Luiz chu Juventus lakah £42.35mtd-in an chân a, kum 18 mi attacking midfielder Omari Kellyman chuan £19mtd-in Chelsea a zawm bawk.

Player dang

Villa hian Tim Iroegbunam chu Everton hnenah £9mtd-in an hralh bawk a, midfielder Morgan Sanson, defender Sebastian Revan leh goalkeeper Viljami Sinisalo te pawh an chhuak a, Tommi O'Reilly leh Filip Marschall te chu loan-in an chhuak bawk.

Philippe Coutinho chu Brazilian club Vasco da Gama lamah loan-a kaltir a ni bawk a, Villa hian season hmasa lama an player chhawr ṭangkai zingah chuan Luiz chiah an la chân rih - Blues zawmtu Kellyman pawh hian season hmasa khan match hnih chiah a khel.

Hetihrual hian club player man to ber Moussa Diaby chu Villa hian an chân dawn nia sawi a ni. Bayer Leverkusen aṭanga £52mtd-a an lakluh player hi Saudi Pro League club Al Ittihad chuan lakluh an tum a, Villa nen hian an inrem tawh niin an sawi.

A thlak nan Felix

Diaby hian Villa-a a season khatnaah match 54 khelin goal 10 a khung a, assist vawi kua a nei. Villa-in European football an khelh theih nan player pawimawh a ni - mahse, Al Ittihad hian £50mtd-a an ngam bakah, kum khata £20mtd vel hlawhtir an inhuam a, Villa an ṭang zo lo.

France winger Diaby hian season hmasa khan Al Nassr aṭangin sawmna a lo dawng tawh a, Villa pan a thlang zawk. Mahse, Villa-ah season duhawm tak a hmang chungin, Euro 2024-ah khan France squad-ah a tel phak lo a, tunah chuan Saudi lam a hawi ta.

Villa hian Diaby thlak nan Joao Felix an melh zui. Atletico Madrid forward hian January 2023 hnuah Spanish club tan hian a khel leh tawh lo a, Chelsea leh Barcelona-ah loan-in a khel. Season hmasa khan Barca tan match 44-ah goal 10 khungin, assist vawi ruk a nei - mahse, Catalan club hian a ngheta lak tumna an nei lo a, Villa tan kawng a inhawng.