I Day Football hmain point ruk kan hmu ang - Chawnpui coach

LZ Juice MPL11-ah Chawnpui FC-in chak hmel an la hmu lo a, vawiin tlai dar 3:30 hian Mizoram Police FC nen RG Stadium-ah an inkhel dawn. Chawnpui hian match thum aṭangin point hnih an sual chhuak a, champion lai Police-in bul an ṭan ṭha bik lo - match hnuhnung pahnihah an chak lo.

MPL9 champion Chawnpui leh MPL10 champion Police inkhel tur hi a pawimawh takzet. Chawnpui coach B. Malsawmzuala'n point hlawhchhuah ngei an tum thu a sawi a, Police coach Lalbiaksanga Colney pawhin chak a ṭul thu a sawi ve bawk.

Point ruk chu

July 9, Thawhlehni aṭangni MPL11 khelh ṭan a ni a, round 5 khelh zawhah I Day Football khelh a nih dawn avangin MPL11 chawlh rih a ni dawn. Chumi awmzia chu MPL club-ten I Day Football hmain match hnih khelh tur an la nei tihna a ni.

Chawnpui FC hian Aizawl FC leh SYS FC te lak aṭangin point khat ve ve an hmu a, match hnuhnung berah Chanmari an hneh lo. Sawmtea hote fixtures a ṭha tawk lo a, match hmasa paliah team ṭha paliah an hmachhawn dawn a tih theih.

Sawmtea chuan, "I Day Football hmain point ruk kan hmu ang," tiin Vanglaini a hrilh a, Police leh FC Bethlehem lak aṭangin point li tal hmu chhuah an tum tihna a ni. Chumi awmzia chu Chawnpui tan tlawm a thiang lo a, chutihrualin Police lakah point khat chauh hmu se, Bethlehem an hneh chuan an tum zat point ruk hi an hmu tho ang.

Insiamṭha thei Police

Mizoram Football Association-in AIFF calendar milin ruahmanna a siam a, I League bakah Santosh Trophy leh National Games ṭan hmain MPL khelh zawh a tum. Hei vang hian kum dang zawng aiin MPL an khel hma a, MPL team-ten duhthusama inbuatsaihna hun an nei lo.

Police coach Lalbiaksanga Colney chuan, "NorthEast Olympic kan khelh zawh hnu khan India ram inthlanpui vangin duty turin kan zin chhuak a; kan zin chhuahna hi Madhya Pradesh, Uttar Pradesh leh Bihar-ah te kan duty. Zin chhuak kan ṭhat hnem avangin zin ve lote pawhin training an nei thei bik lo a, hei vang hian duhthusamin kan inbuatsaih hman lo," tiin Vanglaini a hrilh.

BS-a Colney hote hian MPL10 an champion zawhah hahdamna hun an nei meuh lo a, Krismas boruakin a nangching a, Santosh Trophy-ah player pawimawh zin chhuakin Mizoram tan NorthEast Olympic-ah an inlan leh bawk. Harsatna belhchhah turin election duty turin an zin chhuak leh a, anni tan MPL11 ṭan hun hi a hma lehzual.

Police coach BS-a chuan, "Harsatna hi chu kan nei ngei a, chutihrualin club dang pawhin harsatna an nei vek. Chhuanlam siam ai chuan result ṭha neih tuma thawhrim hi kan tum tur a ni a, kan harsatna neih aiin kan hmalam hun hi kan ngaih pawimawh a ṭul. Tuna kan hna hmasa ber tur chu Chawnpui hneh a ni," tiin Vanglaini a hrilh.

A hmuhnawm dawn

Police hian naupang rual awm khawmna SYS FC an hneh lo a, an vanduai tel. Naupang tha za rual an hmachhawn ṭum hian chhun dar 12:30-ah an inkhel a, ni a sat ṭhat avangin hun tawp lamah fitness nei ṭha zawk SYS an ding chang.

Tun ṭumah erawh tlai ni nemah an khel dawn a, Police ṭha zawk a beisei theih ang. Police tan Malsawmfela'n hmun pawimawh a chang a, a khel ṭha ṭhin a, mahse goal a la khung lo. Sawmfela hian goal hmaah a theihna a lantir a ṭul a, chutihrualin goalkeeper F. Lalmuanawma'n Santosh Trophy-a Mizoram no. 1 a nih chhan khelmualah a lantir a ṭul bawk.

Chawnpui hian squad an nei chhe lo a, tlarhmaah pawh K. Lalrosanga, Vanlalthanga, David Laltlansanga (Avida), Lalthanzuala (TZa) leh J. Lalbiakliana (Valpuia) te an awm a, Police tlarhnung chhaih buai thei tur an ni.

Vawiin tlaia inkhel tur hi inelna ṭan hmaa semifinal lut tura beiseina nei sang ve ve an ni a, round thum hnuah erawh semifinal luh a harsa dawn tih a hriat theih. Chawnpui leh Police ten point thum hmuh ve ve an tum dawn a, inkhel nung tak an chhawp chhuak thei ang.