Mang rama cheng David Lalhlansanga

Vairengte tlangval David Lalhlansanga hi 2022-23 season kha chuan tu khaw khain an la ngaihsak lo - mahse, 2023-24 season a hman zawh meuh chuan Indian football ngainatute titi ber a ni tawh a, Indian football ngaihventu inti tan David Lalhlansanga hriat loh hi thil awm a ni tawh lo!

David-a hian season hman zawh takah khan Mohammedan Sporting tan a khel a, Calcutta Football League leh I League-ah champion nomawi a chawipui ve ve - CFL te nena chhiar tel vekin inelna hrang hrangah match 42 a khel a, goal 34 ngawt a khung.

Hei vang hian Igor Stimac-a pawn India tana inlan turin a vawi khat nan a ko a, mahse, Blue Tigers jersey hain khelmual erawh a la lut chiah lo - heti chung hian AIFF Promising Men's Player of the Year atan thlan a ni.

David chuan, "ISL player-ten an dawn turah ka lo dah deuh a, mak ka ti zawk - ka rin loh lam daih a ni ber mai. Thil reng reng hi a thleng chak em em ni ber hian ka hria a, ka beisei aia hma zelin ka tawng. Pathian vang liau liau a ni ka ti lo thei lo," tiin Vanglaini a hrilh a, a lawm niah pawh Pathian a hre reng.

CFL-ah khan David hian goal 21 ngawt khungin top scorer a ni a, amah hnaih bertu player pahnihten goal 12 an khung! Durand Cup-ah pawh top scorer niin goal ruk a khung a, I League bikah match 22 khelin goal nga a khung a, assist vawi hnih a nei.

ISL-ah Mohammedan a kaipui a, I League champion hian chelh duh mah se kum khat chiah contract a neih avangin a duh lam a hawi - chona thar hmachhawn turin sawmtu tam tak zingah East Bengal a thlang a, Kolkata club hian training an ṭan der tawh.

David chuan, "A nuam ka tirih viau a, ka khelhpuite nen pawh kan innel nghal hle. Kan squad a chhah viau a, mahse, hmun chang turin theihtawp ka chhuah ang," tiin Vanglaini a hrilh a, season tharah pawh chet ṭhat a tum.