Lamine Yamal - Teh Thut A Che

Football fan tam tak inrin hman hma, ama kum ngei pawhin a la remtih pui lo mai ang a, tih tur hunah Lamine Yama a rawn inlar thut mai a, khawvel football chanchin chu hun rei lote chhungin a rawn luahkhat hneh hle.

School naupang mai a la ni a, home work tih tur nei lai ni mah se Spain chuan ram aiawha European Championship khel turin an lo ko tawh si, atan hnial phal chi a ni lo - homework tih tur keng chungin Germany a pan, a hnu lam chu khawvelin a hria.

Yamal a hringun hi thawk leh khata rawn thleng thut a ang ber mai a, mi dangte anga bawka naupangte nih lai aṭanga inzirchhuak chu ni ve tho mah se, atan thil a thleng rang bik hle, kum naupangte ni chungin a tawng thut thut a ni ber.

Thingpui dawr nghak fapa

Mizoramah chuan ruah tui tlak tam duh lai, kum 2007 Vawkhniahzawn thla (July) 13 a ni a, he ni hian football pet thiam tur mi bik a piang, a hming chu 'Lamine Yamal Nasraoui Ebana' a ni a, chhungkaw ropui tak aṭanga piang erawh a ni bik lo.

Barcelona khawpuiin a huam chhung Esplugues de Llobregat-ah Yamal hi a piang. A pa chu Mounir Nasraoui-a niin rawng hnawih mi a ni a, a nu chu thingpui dawra thawk Sheila Ebana a ni thung.

A nu Ebana hi Equatorial Guinea lam chhuak niin, a pa Nasraoui hi Morocco aṭanga chawr chhuak a ni thung, an pahnih hian Spain ramah an pem a, intawngin an innei, ti chuan fapa Yamal an nei ta a ni.

Yamal an neih aṭanga kum thum hnu lekah a nu leh pa hi an inṭhen zui mai a, retheihna chu chhungkaw kehchhia in a belhchhah tihna a ni, a naimai lo khawp ang. A nu hi Granollers-ah a cheng chhunzawm, he hmun hi Yamal-a''n ball a pet ṭanna chu a ni.

Kum li mi lek a nih laiin tualchhung club La Torreta tan a khel a, a pa chenna lamah a kal ve fo bawk - naupang chuan a nu leh pa a ngai ve ve si a, a kar tawn zak zak ṭhin tihna a ni ber awm e.

Hun a kal hret a, a thiamna chu thup theih a ni lo - kum ruk mi a nih chuan Barcelona tana player zawng khawmtute chuan an hmu fuh a, an academy La Masia lama training nei turin an sawm, atan hnial phal chi a ni lo ang.

Khawvela football zirna hmun ṭha berte zinga mi a ni a, kum 2014 khan Barcelona hian an hnena zir turin an ziak lut a, football an zirtir bakah a chenna tur hmun an ngaihtuahsak nghal bawk.

Tuarna pawh hlawkna

Barcelona acdemy a zawm hmaah kir leh lawk ang - a nu leh pa inṭhen kha Yamal tan malsawmna a nihna chen a awm. A nu khan ei zawnna a dap a ngai a, La Torreta khaw kianga fast-food dawrah a thawk, he hmun hi Yamal-a'n Inocente Diez a hriat ṭanna a ni.

Inocente Diez hi tun hma lama football lo khel tawh ṭhin a ni a, hetih hunlai hian an tualchhung club thuneitu zinga mi a ni a, a nu hnena awm Yamal chu La Torreta tana a khelh theihna tura kawng hawnsaktu a ni a, chan loh khanah mi pawimawh a lo lang.

Diez-a chuan, "A kum ka ngaihtuah a, a thil tawn leh thil tihte ka chhut a, mi mak danglam tak a ni tih ka hre nghal mai. A kut a hmuiin a tluang em em a, amahah hian thil mak danglam tak tih theihna hi a awm tih ka hria," a ti.

A nu chenna aṭangin a pa chenna Rocafonda lamah an chhungkua in an awmkhawm leh a, an chenna an sawn hnu pawhin Yamal hi La Torreta tan hian a khel zui zel a, a inzir ṭanna a nih miau avangin awmna sawn mah se a nu leh pa hian an fapa club an sawn nghal lem lo.

La Torreta FC hian player chher chhuah an tuipui em em a, a bik takin khawsak harsa leh mi rethei an pui nasa, Yamal bakah hian mi rethei chhungkaw tam tak chu football an pet ve theih nan kawng an hawnsak ṭhin a, an la chhunzawm zel bawk.

Mi harsa te tan football zir man an ti tlawm bik a, a man tlawm pawh pek harsat an la awm ṭhin, heng mite hi an fee pek dan tur pawh an tih danglamsak lehzel a, hetiang zingah hian Yamal pawh a tel, tunah chuan a laka an thil ṭha tih hi a hlutna sanzia sawi thiam phak a ni tawh lo ang.

La Masia chhuak

Lionel Messi inzir chhuahna La Masia chu Yamal tan hmun duhawm a ni chho ve ta a, kum rualpui zinga thiam bik a nih miau avangin hriat a hlawh hma, senior team coach Xavi pawhin an player hmasawn chhoh dan chu a hmuh hmaih lo.

Kum 2022 September thla khan kha tih laia Barcelona coach Xavi chuan, academy player ṭhenkhat chu first team training chhim turin a ti a, an zingah hian Yamal pawh a tel, hetih lai hian contract pangngai pawh a la nei ve lo a ni.

A tawi zawnga sawi chuan, kum 2023 April 29-ah Barcelona tan a match hmasa ber a khel a, a hnu lam chu thawnthu ngaihnawm in a zui char char a ni ber tawh mai a, sawi vek sen tawh a ni tawh hek lo ang.

Kum 16 a rawn tlin chhoh meuh chuan Barcelona tan record hrang hrang a siam mawlh mawlh tawh a, 2023-24 season hian inelna hrang hrangah a club tan match 50 a khel tling der tawh - a chet hlekna chu record a ni deuh zel mai.

Barcelona tan hian naupang ber nihna hrang hrang a ngah - inkhel bul ṭan thei, La Liga goal khung, assist nei thei leh thil dang tam takah naupang nihna a luah chho zel; El Clásico khel thei naupang ber a nihna chu sawi hmaih chi a ni lo ang.

Kum 16 leh ni 213 mi a nih chuan, a club tan La Liga goal 10 a thawk chhuak tling der tawh a, hetiang ti thei naupang ber hi a ni leh ta bawk. La Liga chauh ni loin Champions League thlengin a khel a, naupang hle mah se khelmual chhungah a puitling tawh.

Barcelona tan a khel phak a ni satliah lo a, player hmuhnawm zinga mi a nih miau avangin ram tan pawh koh a ni, kum bithliah inelna hrang hrang - under 15, 16, 17 leh 19 huangah a inlan vek a, tunah pawh inlan turin a kumin a la tlin, mahse senior team tan a khel tawh thung.

Spain tan an ko

Euro khel turin Spain an inbuatsaih a, coach Luis de la Fuente chuan qualifier aṭangin team nghet tak din tumin hma a la, senior player ṭhenkhat hnawlin naupang lam a melh a, danglamna siam thei tur mi a zawng.

Nikum September thla khan Georgia leh Cyprus te nen Euro qualifier an khel dawn a, hemi atan hian Yamal chu koh a ni - kum 16 leh ni 50 mi chauh a nih laiin inkhel thiam player ngah tak mai Spain chuan an ko der tawh tihna a ni!

Spain tan hian a ti kimtu a ni satliah lo, goal a khung nghal ringawt - kum 16 leh ni 57 mi niin ram tana goal khung thei naupang ber a ni leh nghal, record hmasa chelhtu Gavi (kum 17 leh ni 62) chu a khum nghal.

Barcelona tana record a siam mawlh mawlh ang bawkin, an ram Spain tan pawh a che vel chu naupang ber record a ni zui ta deuh zel mai a, coach Luis de la Fuente-a'n a lo hmang thiam bawk nen, hnung lam hawi tawh loin hma lam a pan ta ngar ngar mai a ni.

Euro qualifier lamah coach lungtiawi khawpin a khel chhuk ngal a, hei vang hian inelna tak hmachhawn tur player thlan chhuan 26 zingah pawh a tel a, ram aiawha major tournament khel tura koh a nih hi chuan football tui mite a barakhaih tawh lem lo.

Barcelona tan hun remchang vawi khat pek a ni a, a bawhpelh lo. Spain tan pawh remchang an pek apiang a hmang thiam em em a, a bawhpelh eih lo tia sawi theih a ni ber mai, Euro khelh zawh hnua Germany an chhuahsan dawnah meuh chuan hming langsar ber tia chhal ngam a ni.