
Sihphir Venghlun nge FC Bethlehemin point hmu hmasa dawn?

LZ Juice MPL11-ah point la hmu lo club pahnih chiah an awm tawh. Vawiin chhun dar 12:30 hian RG Stadium-ah point la hmu lo, Sihphir Venghlun FC leh FC Bethlehem te an inkhel dawn. Team inngam leh intluktawk tak an nih avangin point khatah an lungawi dawn lo a, chak tuma an khelh ve ve dawn avangin a hmuhnawm khawp ang.
Boruak nei
Season liam ta khan Sihphir Venghlun leh FC Bethlehem te hi Aizawl DFA First Division-ah an inhmachhawn a, RG Stadium-a an inkhelh ṭumin boruak a nung ṭha hle. Bethelhemin 2-1 a hma an hruai laiin buaina a chhuak a, an khel zo thei lo. Lammualah an khelh hmabak minute riat khelh zawh a ni a, FCB hi 2-1 in an chak ta tho.
First Division-ah hian FC Bethlehem hi an champion zui a, MPL khel turin MPL Qualifier-ah an champion leh bawk. Chutihrualin Sihphir Venghlun hian First Division semifinal-ah coach Chawngthansanga enkawl Kanan FC an hneh loh avangin phuba lakna remchang an nei tawh lo.
Phuba chu
Tun ṭum hi Sihphir Venghlun tan phuba lak theihna hun ṭha leh hmasa ber a ni a, chutihrualin Aizawl FC laka 6-1 zet an tlawm avangin phur taka inlan pawh a har ang. Mahse, transfer a la inhawng reng a, football leh futsal thiam veng tia sawi ngam Sihphir Venghlun hian table mawngphaha awm reng an tum lo.
Sihphir Venghlun hian MPL-a tawnhriat nei tawh defender Malsawmtluanga Hrahsel bakah Manipur aṭangin defender Mate an la lut a, season liam taa Chawnpui FC midfielder ṭangkai ber tia chhal theih Lalbiakzuala an neih belh bawk. Hei chauh hi a ni lo, Dinthar FC tana khel ṭhin Ramhlun South tlangval Lalawmpuia Ralte an la lut bawk a, AwP-a hi ISL club FC Goa leh Hyderabad FC-ah te a khel tawh.
Coach Robert Laldinthara chuan, "Aizawl FC laka khati zat chhuah kha chu a mualphothlak a ni. Kan fitness ṭhat tawk loh bakah kan la kim loh vang a tih theih ang. Bethlehem kan hmachhawn hunah la kim dawn lo mah ila, a hma aiin kan ṭha tawh zawk dawn a, chak ngei kan tum ang," tiin Vanglaini a hrilh.
FCB an inringtawk
FC Bethlehemin Siphir Venghlun an hlau bik lo a, point hmuhna remchangah an ngai. Coach Lalhriatpuia Sailo chuan, "MPL a nih tawh avangin team an inthlau a, chak theihna tur club hi an awm. Chak ngeina tur club pakhat lakah kan tlawm a, tun ṭuma mi hi chu kan hneh ngei a ṭul a ni," tiin an hneh tur zingah Sihphir Venghlun an dah tel.
FCB hian hrem vangin winger Lalfakkima (FK-a) an chhawr thei dawn lo a, chutirhualin LPS Cup-a Sihphir Venghlun champion ṭuma best player Joseph Lalṭhafela an kawl. Joseph hi Sihphir Venghlun lakah chuan player pawimawh bik a ni thei ang.
Bethlehem hian player beiseiawm Kiran Chhetri, F. Malsawmdawngpuia leh Malsawmdawngkima te an kawl a, an khelh ṭhat ṭum chuan result thlak danglam thei player an ni. Tlarhmaah Danny Zorammawia'n inrintawkna a nei chho a, Sihphir Venghlun tlarhnung tan ven uluk a ṭul dawn.
FCB leh Sihphir Venghlun hian match hnih lek aṭangin goal nga leh goal riat an chhuah tawh a, vawiinah pawh goal hmuh tur a awm ngei tura ngaih a ni.