Churchill-in ISL khelh an tum!

India rama league sang ber Indian Super League khelh tumin I League club-te an buai ṭan a, Churchill Brothers chu tun hnaia ISL khelh tum langsar an ni. 

Phai lam media-te tarlan danin Churchill hian season thar aṭanga ISL khelh an inbeisei a, Goan club hian ram pawn lam aṭanga sum hmanga pui theitu an nei dawn niin an sawi. 

I League club zingah Mohun Bagan chuan ISL hmahruaitu nilai ATK nen season tharah an inzawm tur thu an tichiang tawh a, I League an khel tawh dawn lo - club hming tur erawh sawichian a la awm lo thung. 

ISL khel tur langsar anga sawi ṭhin East Bengal dinhmun a la chiang hleithei lo a, hetiang boruak kara Churchill an lo lang nawlh hi Kolkata club tan thil lawmawm a ni kher lo ang. 

Kum 1988-a din Churchill Brothers hi Indian club zinga sulhnu nei ṭha ber pawl an ni a, I League-ah ringawt pawh vawi hnih an champion tawh. 

Goan club hi Mizo zingah pawh club thar an ni lo a, Kolasib tlangval Vanlalrova'n hming chher nan a lo hmang tawh. Rova hi 'Mizo Super Trio' tia hminglem an pek Malsawma leh Jerry Zirsanga te nen Indian football-ah chuan hriat an hlawh ṭhin hle. 

Robert Lalthlamuana chu Mizo zinga Churchill Brothers-a hming chher a ni a, Robert hian Tata Football Academy aṭanga Goan club hi zawmin a season hmasa berah I League nomawi a chawi nghal. 

Season kal laiah chuan Lalkhawpuimawia, Vanlalduatsanga leh Lalengzama Vangchhia te chu Goan club tana khel an ni a, ISL an sawi ri ṭan ta. 

Churchill Brothers hian ram pawn lam aṭanga sponsor hmuh ngei an inbeisei niin phai lam media-te chuan an tarlang a, ISL-ah FC Goa an awm sa avangin South Goa Churchill Brothers FC tia hming thlak pawh an pawi ti lo.

ISL lam thuneitute chuan Churchill ruahmanna hi ṭha an ti hle nia sawi a ni a, hetiang a nih chuan season thar ISL-a Goan club pahnih hmuhna chance a sang ta hle tihna a ni. 

Churchill an lo lan tak avangin season thara ISL khelh tum East Bengal tan muttui a har sawt ang tih a chiang a, Kolkata club hi khelmual chhung leh pawnah an talbuai mek. 

East Bengal hi Bengaluru lama hmunpui nei Quess Corp nen an thawkdun mek a, mahse Quess hian season tawp rualin Kolkata club nena an thawhdunna chu an titawp dawn.

Inremna awm sa ang chuan Quess hian May thla hian East Bengal nena an thawhdunna chu tihtawp tur a ni. Bengaluru company hi tun hnaiah an hmanhmawh thar a, season tawp hmaa chhuah an duh hial!

Quess hian an hmun ruak luah thei tur an zawng mek a, an duh ang an hmu thei a nih chuan season tawp hma pawhin East Bengal hi an chhuahsan thei tihna a ni - an share hralh an tum mek. 

Hetihlai hian Quess CEO & executive director Subrata Nag chuan I League kal mekah vaibelchhe 3-4 inkar vel an hloh tawh thu a sawi a, a tam tham hle - chhuah an chak tawh viau hi a mak lo. 

East Bengal tana buaithlak erawh Quess hmun ruak luah thei tur khawpa sponsor lian tham an hmuh loh chuan sum sen hnem ngaihna ISL khelh hi thil harsa tak a ni dawn. 

October 2019 khan All India Football Federation chuan Indian football hma hun chiang lo reng chu a ti chiang a, ISL chu league sang ber a nih tur thu leh I League chu second division anga a awm tur thu an sawi. 

Ruahmanna ang chuan season lo awm turah hian ISL chuan club 10 ni mek chu 12-a tipung turin I League club pahnih a sawm thei dawn a, mahse club tel turte hian kum tina pek ṭhin franchise fee vaibelchhe 10-15 inkar chu pek an inhuam a ṭul thung ang. 

Bagan-in ATK an zawm tur thu an tihchian tak avangin hmun ruak pahnih a la awm angah a ngaih theih a, Churchill Brothers leh East Bengal tan season thara ISL khelhna kawng a awm tihna a ni. 

Chutihrualin franchise fee vaibelchhe 10-15 inkar ringawt pawh hi lu ti hai tham a ni a, "Churchill leh East Benal-in ISL an khel dawn em?" tia zawhna inpek hmain "Sum an nei ang em?" tih chu zawhna hmasa atana neih chi niin a lang.