Khai le... ennawm ropui a thleng dawn ta - Spain vs England

Euro 2024 chu a hmawr bawk a ni dawn ta a, mi tam tak tana final duhthusam khelh a ni dawn - Pathianni zan dar 12:30 hian Spain leh England ten Europe-a inkhelh thiam ber nih an inchuh dawn a, a hmuhnawm loh ring suh.

Tun inelnaa team hmuhnawm ber thlang dawn ila, Spain aia thlan tur bik an awm chuang lo a, Croatia, Italy, inelna thlengtu Germany leh France chu final lut tura an hneh zingah an tel a, an team hneh tak hi thlir ila, ngaihnep an thiang lo.

England-in tun inelnaah beisei an phak lo a, semifinal an luh danah vanneihna a tel kan ti a nih pawhin a awm lo hran lo. Mahse, Three Lions hian semifinal-ah meuh chuan game hmuhnawm bik pho chhuakin, Netherlands chu 2-1 in an pet chhuak.

Semifinal-a an khelh dan aṭanga teh chuan England dah hniam theih an ni ta lo a, engtiklai pawha boruak nei lian ṭhin an nihna hian final boruak a ti 'hot' tel bawk - Pathianni zan chu i mengrei leh phawt mai ang!

Spain danglamna

La Roja boss Luis de la Fuente-a'n Spanish football ta bik emaw tih mai tur 'tiki-taka' kalsanin, Spanish team hi 'direct football' a khelhpui ngam a, a tisual lo - tun hma zawng aiin he Spanish team hi an hmuhnawm emaw tih mai tur a ni a, an 'golden generation' nen an khaikhin hial tawh.

Hmabak erawh an la nei a, nomawi chawi a ni. Semifinal-a hliam tenau nei Alvaro Morata a dam tawh a, Atletico Madrid striker dam hi Spain tan a hlu - captain-a nihna piahlamah tlarhmaa Nico Willimas leh Lamine Yamal ten zalenna zau zawk an neih theih nan Morata a hlu ṭhin.

Spain lawmna belhchhah turin hrem vanga semifinal khel thei lo Dani Carvajal chu chhawr theih a ni leh tawh dawn a, Real Madrid fullback hi tlarhnung ven piahlamah goal nawr thlenga ṭangkai tur a ni ang - mual vei lama ding Marc Cucurella pawh a hmuhnawm ṭhin takzet.

Centre back-ah pawh Robin le Normand a awm leh tawh dawn a, a awm loh hlana semifinal khel ṭha Nacho Fernandez thlak erawh a uiawm mai thei. Aymeric Laporte chu bul ṭan chiang a ni a, Nacho emaw Le Normand emaw pawh kawp se, England tlarhma tan hna a hautak ang.

Tuarna pawh hlawkna

Spain-in Germany lakah hliam vangin Pedri an chân a, mahse, a thlaktu Dani Olmo a chet ṭhat zui avangin an hloh hlepah an chhiar mek - Olmo hian match nga a khelh tawhah goal thum khungin, assist vawi hnih a nei bawk.

De La Fuente-a'n France lakah a hman ṭhan 4-3-3 chu thlak danglamin, 4-2-3-1 in a naute a rem a, a tisual lo. Morata hnung chiahah Olmo hi dingin, goal nawr kawngah a thawhhlawk lehzual. Zaninah he formation bawk hi an hmang leh a nih pawhin a mak lo ang.

Spain tan midfield-ah Rodri a hmuhnawm leh dawn tih a chiang a, Manchester City chhuanvawr hi team tana a 'solfa' vaitu ber a ni - a bula ding turin Fabian Ruiz a awm a, Paris Saint-Germain midfielder hi a 'cheimawina' nei tel a nih avangin an che vel a hmuhnawm leh dawn.

Kum 16 mi lek ni chunga Yamal thiamzia inhrilh nawn a ngai lo a, Nico a la awm cheu bawk avangin Spain tlarhma an ṭha tawk - hetiang taka tlarhma ṭha hi England-in tun inelnaah an la hmachhawn lo a, zaninah fiah an ni dawn.

England an ṭha

Three Lions hian Euro 2020-ah final an thleng tawh a, tunah final an lut leh ta - Gareth Southgate-a hnathawh hi fak kan hreh viau a nih pawhin vanneih vanga chhiarsak reng bik chu a rem lo a, vanneih vanga major tournament pali hmachhawna pahnihah final luh theih a ni lo!

England fans tana thil lawmawm chu Phil Foden a hmuhnawm ta hi a ni. Premier League player of the season ni lai hian Netherlands lakah goal khung lo mah se, duhthala a tal vel chu a hranpaa en tham khawpa hmuhnawm a ni a, Spain tlarhnung chhaih buai turin a ṭha tawk.

Three Lions danglamna langsar chu mahni chauh pawha inkhel boruak thlak danglam thei tur khawp player an nei nual hi a ni. Jude Bellingham-a'n beisei la phak lo mah se, ngaihthah a thiang lo a, Real Madrid tana khel a nih avangin Spanish team a hrechiang bawk.

Captain Harry Kane pawh chakpui tham striker a ni a, Bayern Munich striker hian ram tan nomawi chawi a châk dawn - a career-a nomawi la chawi ngai lo striker hian Euro hmanga bul ṭan a duh ang.

Engtin nge England

Gareth Southgate-a'n quarterfinal aṭangin 3-4-2-1 formation a hmang a, 4-2-3-1 ai chuan a tifuh zawk tih match hnih an khelh aṭangin a lang - Marc Guehi, John Stones leh Kyle Walker te chu tlarhnunga ding tur chiang an ni a, Jordan Pickford-a'n si ban a nghak leh bawk ang.

Luke Shaw dam tawh mah se, final-a hman thut ai chuan left wing back-a Kieran Trippier rin tlang chu a thlan a rinawm mah zawk. Chutihrual chuan Trippier hi hliam tenau vangin semifinal-ah lak chhuah a ni a, a luh hnuah Shaw a khel ṭha tih hai lo la. Mual ding lamah ding lamah Bukayo Saka awmin, Arsenal forward hian tlarhma lamah a hun tam zawk a hmang leh dawn.

Midfield-ah Declan Rice chu innghahna tur a ni a, kum 19 mi Kobbie Mainoo nen an inkawp leh dawn - Mainoo-a'n a khelh ṭhat ṭhin avangin English media chuan Rodri nen an khaikhin der tawh a, mahse, Manchester United rawlthar tan Rodri a la sang hret. Zaninah erawh a 'u' en bik dawn lo.

Foden, Bellingham leh Kane hi en ila, hei aia tlarhma pathum duhthlan tur an awm chuang lo - an theihna anga an khel chhuak vek a nih ngat chuan England tan nomawi a hnai sawt ang.