Premier League-a Liverpool season hman dan
Liverpool-in Premier League nomawi an la chawi lo a, kuminah erawh an chawi ngei dawn. Tun ṭumah hian Premier League-a Reds dinhmun thlirna kan nei ang.
1992/93 : 6-na (59 Pts)
Premier League ṭan kumah hian Liverpool-in Roy Hodgson-a season ṭha ber aiin point an hmu tam zawk a, an tawpna erawh parukna a ni.
1993/94 : 8na (60 Pts)
Liverpool tan 1993/94 season hi Premier League an khelh chhiat ber ṭum a tih theih ang. Manager Graeme Souness-a'n hetih hunlaia hming langsar Bruce Grobbelaar, Rob Jones, Steve Nicol, Neil Ruddock, John Barnes, Steve McManaman, Robbie Fowler leh Ian Rush te a kawl avangin player a mawhpuh thei lo ang. 1993/94 season hian team 22 an awm a, match 42 a awm chungin point 60 chauh an hmu.
1994/95 : 4-na (74 Pts)
Roy Evans-a'n Liverpool season ṭantirh aṭanga a enkawl hmasak ber a ni a, season ṭha tak hmang mah se season tawp lamah nomawi beiseina a tawp hma ta deuh.
1995/96 : 3-na (71 Pts)
Liverpool team kum lamah an naupang a, Roy Evans-a'n squad tichak turin theihna nei sang Stan Collymore an lalut. Chet chhiat lai nei mah se season tawpah erawh point 71 hmuin pathumna an ni
pha tho.
1996-97 : 4-na (68 Pts)
Roy Evans hnuaiah Liverpool-in March thla thleng chu nomawi chawi thei turin dinhmun ṭha takah ding mah se season tawp lamah an chesual. Season a tawp meuh chuan palinaah an awm a, champion Manchester United an phak lohna chu point sarih chauh a ni.
1997/98 : 3-na (65 Pts)
Michael Owen chu 1996/97 season-ah Liverpool tan a inlan ṭan a, 1997/98 season hi a vul chhoh ṭanna season niin match 36 zet a khel a, Kop pawhin beiseina an nei sang hle. Roy Evans hote hi nomawi beisei pha zingah an tel a, champion zui ta Arsenal leh pahnihna Manchester United an tlukpha ta lo thung
1998/99 : 7-na (54 Pts)
1998/99 season-ah hian Michael Owen chu innghahna ber a ni tawh. Amaherawhchu result aṭanga thlir chuan Gerard Houllier leh Roy Evans hnuaiah point 54 chauh hmua pasarihnaa an awm avangin 1993/94 season aiin an che ṭha hret chauh a ni.
1999/00 : 4-na (67 Pts)
Liverpool-in point 67 hmuin palina ni mah se hetihlai hi chuan UEFA Cup an khelpha chauh. Hemi zawh season-ah Reds hian Alaves hnehin UEFA Cup nomawi chawi mah se 1999/00 season erawh lawma tur niin a lang lo.
2000/01 : 3-na (69 Pts)
Gerard Houllier leh Liverpool tan chuan 2000/01 hi season chhinchhiahtlak a ni a, hemi season hian nomawi pathum UEFA Cup, FA Cup leh League Cup-ah an champion. Amaherawhchu Premier League-ah erawh point 69 hmuin pathumna an ni.
2001/02 : 2-na (80 Pts)
Season ṭhenkhat chu ni se Liverpool-in point 80 tehmeuh an hmuh avangin champion pui tham a tling. Reds hi an hmelma Manchester United chungah awm mah se point 87 hmutu Arsenal an tluk lo.
2002/03 : 5-na (64 Pts)
Gerard Houllier hoin bul an ṭan ṭha a, match 12 a zawhin hmahruaitu an ni. Amaherawhchu Middlesbrough an hneh loh hnuah match 11 a zawnin chak hmel an hmu lo a, Reds hian point 64 hmuin panganaah an awm.
2003/04 : 4-na (60 Pts)
Gerard Houllier-a season hnuhnung ber a ni a, point 60 hmuin palinaah an awm. Palina ni mah se Premier League club paliin Champions League an khelh theih tawh avangin Houllier hote hi Europe-a inelna sang ber khel turin an tling. Benitez-a'n season khatnaa Champions League nomawi a chawi theihna chhan pakhat a ni.
2004/05 : 5-na (58 Pts)
Liverpool-in point 58 chauh an hmu a, league aṭanga thlir chuan season ṭha a ni lo. Amaherawhchu hemi season hian Rafael Benitez-a'n Reds a enkawl ṭan a, Champions League nomawi an chawi avangin season ṭha a ni.
2005/06 : 3-na (82 Pts)
Rafael Benitez hoa Champions League nomawi an chawi zawh season-ah beiseina an nei sang a, FA Cup-ah an champion. Mahse player thar Fernando Morientes-a'n beisei a pha lo a, Chelsea an chet ṭhat bawk avangin Reds ban phakah nomawi a awm lo. Benitez-a hote hian Jose Mourinho hote point kuain an pha lo.
2006/07 : 3-na (68 Pts)
Liverpool-in Rafael Benitez hnuaiah season an hmang ṭha chho zel a, champion tak erawh an harsat. Pathumna niin season an khar a, hemi season-a Xabi Alonso-a'n halfway line aṭanga a pet goal erawh hriat reng tlaka mawi a ni.
2007/08 : 4-na (76 Pts)
Liverpool tan season duhawm a ni a, Fernando Torres a vul avangin beisei pawh a sang hle. Rafael Benitez-a hote hian point 76 an hmu a, palinaah awmin Champions League khel turin an tling.
2008/09 : 2-na (86 Pts)
Manchester United-in point 75 an hmuh ṭumin 1996/97 season khan an champion. Arsenal pawhin 1997/98 season-ah point 78 hmuin nomawi an chawi a, 2008/09 season-ah erawh Liverpool tan nomawi chawi turin point 86 a tawk lo.
Rafael Benitez kaihhruai team hian nomawi chawi phuin season tluanin a khel ṭha a, Arsenal leh Andrei Arshavin ten an nomawi chawi tur an dal tiin an sawi theih. April 21, 2009-ah Liverpol-in Arsenal an mikhual a, Manchester United chunga awm turin Reds tan chak a ngai.
Russian forward Arshavin-a'n goal li a khung a, inkhel hmuhnawm bikah Gunners leh Liverpool 4-4 in an inhnehtawk. Manchester United-in point 90 an hmu a, Liverpool nomawi beiseina erawh a thamral thung.
2009/10 : 7-na (63 Pts)
2009/10 season-ah Liverpool-in point 63 hmuin pasarihna a ni a, inchhuanna tur a awm lo. Rafael Benitez-a'n Reds a enkawl hnuhun ber a ni a, Xabi Alonso leh Sami Hyypia ten Premier League club an chhuahsan. Liverpool hi an sponsor Carlsberg nen an inṭhen bawk.
2010/11 : 6-na (58 Pts)
Roy Hodgson-a'n Reds a enkawl tawpna ber a ni a, result ṭhat tawk loh avangin January thlaah Kenny Dalglish-a'n a thlak. Hemi season hian sponsor thar Standard Chartered an nei a, amaehrawhchu Dalglish hnuaiah Liverpool hian parukna niin season an khar.
2011/12 : 8-na (52 Pts)
Kenny Dalglish kaihhruaina hnuaiah Liverpool-in bul an ṭan a, amaherawhchu club top scorer Luis Suarez pawhin league-ah goal 11 chauh a khung. Season tawpah Reds hian point 52 chauh an hmu a, pariatna an ni.
2012/13 : 7th (61 Pts)
Brendan Rodgers-a'n Liverpool a enkawl ṭan a, Luis Suarez pawh Premier League-ah tlangnel chhoin league-a goal 23 khung mah se pasarihna chauh an ni pha.
2013/14 : 2-na (84 Pts)
Liverpool-in nomawi an chawi teuh ber ṭum ti hialin a sawi theih a, Brendan Rodgers hote hian league-ah ringawt pawh goal 101 an khung. Match thum chauh a awm tawh tih pawhin Liverpool hi hmahruaitu an ni a, amaherawhchu Chelsea nen an inkhelh ṭumin Steven Gerrard a tawlhthlu a, Demba Ba-a'n goal khungin Blues 2-0 in an chakzui.
Reds hi an chesual chhunzawm a, Crystal Palace nen 3-3 in an inhnehtawk. An match tawp berah Newcastle United hneh mah se Manchester City-in an champion ta thung.
2014/15 : 6th (62 Pts)
Liverpool-in an striker hriam ber Luis Suarez an chan a, a thlakna tura an lakluh Mairo Balotelli leh Rickie Lambert ten an thlak hneh lo hle. Reds-in season bul an ṭan ṭha lo a, season chawhnu lam an khelh chhiat bawk avangin point 62 chauh hmuin parukna niin season an khar.
2015/16 : 8th (60 Pts)
Brendan Rodgers hnuaia lungawi lo Steven Gerrard-a'n Liverpool a chhuahsan a, captain Fantastic tel loin Reds an mawi zo lo. Brendan Rodgers-a'n a hna a chan a, October 8, 2015-ah Jurgen Klopp chu Liverpool manager atan tihngheh a ni. German manager hian resutl ṭha a keng tel nghal lo a, Reds-in point 60 hmuin 1993/94 season dawta season an hman chhiat ber ṭum a ni ngei ang.
2016/17 : 4th (76 Pts)
Jurgen Klopp-a'n team a din chho a, a khelh duh dan mila khel thei tur a lalut. Nipui transfer-a lut zingah Sadio Mane, Georginio Wijnaldum leh a thlawna an lakluh Joel Matip ten hmun pawimawh an chang chho zui a. Season hmasa lam aia hmasawn hretin point 76 hmuin palinaah an awm.
2017/18 : 4th (75 Pts)
Liverpool-in an player neih zinga hming langsar ber Philippe Coutinho chu Barcelona lakah an chan a, Luis Suarez chhuah ṭum nen mi tam takin khaikhin mah se Jurgen Klopp enkawl Reds an buai phah lo.
Reds-in nipui transfer-ah Mohamed Salah, Andrew Robertson leh Alex Oxlade-Chamberlain te a lalut a, an tlarhnung pawp thuam ṭhat nan January-ah Virgil van Dijk an lalut leh bawk. Klopp-a hoten point 75 hmuin palina ni mah se season thar an cho ta hle.
2018/19 : 2nd (97 Pts)
Liverpool-in season liam taah keeper Loris Karius chetsualna avangin Champions League nomawi an chawi lo a, keeper ṭha Alisson lalut turin pound maktaduai 55.5 zet an seng. Squad thuam chak nan Naby Keita, Fabinho leh Xherdan Shaqiri te an la tel a, team ṭha tak tak a ni tawh.
Klopp-a hote vanduaina erawh Manchester City vul lai an tawng a, point 97 hmu chungin an champion lo. Amaherawhchu Champions League nomawi an chawi a, Reds an ropui zel.
2019/20 : 1st (73 Pts)
Liverpool-in point 75 hmuh theih aṭangin point 73 an hmu a, Premier League nomawi an chawi ngei dawn. Tuna zawhna awm zawk erawh Jurgen Klopp-a hote hian eng record nge an siam chho ang tih zawk a ni.