Canada hnehin Argentina an tlang; Messi hoin Copa final an khel dawn
Lionel Messi hoin Argentina chuan Copa America final an khel leh dawn ta. Lionel Scaloni naute hian nimin zing khan Canada chu 2-0 a hnehin final an inpet kai a, champion turin match khat chak an la mamawh.
La Albiceleste tan hian Julian Alvarez leh Messi ten goal an khung a, tun hnai Copa America khelh hnuhnung pariatah Argentina hian vawi ruk ngawt final an lut a, a vawi 16 nan champion an tum dawn a ni.
Tukin khan Uruguay leh Colombia ten semifinal hnuhnung zawk an khel a, a chak zawkin Argentina hi an hmachhawn dawn. A tu emaw zawk zawk pawh hi khingpui awlsam an ni dawn lo.
Goal hnih a tawk
Nimin zing MetLife Stadium-a inkhelah goal kan hmu har lo, minute 22-naah Alvarez chuan Atletico Madrid midfielder Rodrigo de Paul-a ball pek chu mawi zetin a dawng a, a hmaah defender la awm mah se a rilru a fim.
Manchester City striker hian ball a thunun zeuh a, goalkeeper Maxime Crepeau dan theih lohin a khung - world champion laiin inkhel an thunun chhunzawm a, goal an neih hma bawk avangin chak tur a chiang hma tiin a sawi theih.
Second half tirah Messi-a goal kan hmu. Chelsea midfielder Enzo Fernandez-a ball pet chu lo kawih pialin keeper Crepeau a inring hman tawh lo, chiang zetin a lut a, an ramin zalenna a hmuh champhaah nuamsa takin an chak thei a ni.
Scaloni naute hi an match hnuhnung 10-ah an tlawm lo, tun ṭumah pawh hian champion tura rinkai leh buk rit an ni. Copa America leh World Cup a indawta la thei an ni a, an champion leh a nih ngat chuan sulhnu ropui bik a ni ngei ang.
Copa hnuhnung
Lionel Messi hi kum 37 mi a ni tawh a, inkhelh reng duh pawh ni se a tan a rem bik lo. Messi chuan, "Argentina tan theihtawp chhuahin World Cup kan bei tawh a, hlawhtlinna ropui tak kan hlawh chhuak tawh a nih kha, ka theihnghilh thei lo.
"Tunah a hnuhnung ber atan Copa kan khel leh a, kei leh ka ṭhiante hian nuamti takin kan ram jersey kan ha. Keimah chauh ni loin ka ṭhian ṭha Angel di Maria leh Nicolas Otamendi te tan pawh Copa hnuhnung a ni," tiin a sawi.
Di Maria leh Otamendi te pawhin tun bak chu Copa America khelh an tum tawh lo, an kum a tam ve tawhin player naupang zawk tan hmun ken an tum ve tawh a ni, theih ni se la chuan Messi hoin nomawi nen ngeia hun hnuhnung hman an duh ang.
Messi hian ram tan match 186 aṭangin goal 109 a khung ta a, ram tana goal khung tam lamah Cristiano Ronaldo (130 goals) chauh a chungah a awm. Copa bik atan a hun hnuhnung ni mah se ram tana inkhelh a chawlhsan hun tur erawh a la sawi lo thung.
Scaloni thu leh hla
Argentina coach Lionel Scaloni chuan, "Harsa vak lo angin lang mah se nuamsa taka chak chu kan ni bik lo. Canada nen hian group match-ah kan intawng tawh a, kan khelh dan phung an hriat bel avangin min dang thei hle.
"Copa America final thlen hi thil harsa a ni a, chuvangin kan thlen chinah kan lawm tur a ni," a ti. World champion an nih hnu deuh khan Scaloni hian Argentina coah a nihna bansan a tum a, mahse tunah erawh a rilru a nghet leh ta zawk.
Angel di Maria-a'n Copa America chauh ni loin, tournament zawh rualin international football chawlhsan a tum. Scaloni chuan, "Angel dinhmun kan hria, kan tan a pawimawhna leh hlutzia hi sawi vek sen pawh a ni lo.
"Lungchhe taka awm hun a ni lo a, khelmual chhungah nuam ti taka inkhel turin kan siam zawk tur a ni ang. Kan hnenah la awm zel se tih hi ka duhthusam a ni, mahse tunah chuan nuam ti takin inkhel phawt rawh se," a ti.