LZ Juice MPL11 khelh hun a inher chhuak

Mizoram chhunga football inlena sang ber LZ Juice Mizoram Premier League Season 11 chu vawiin aṭangin khelh ṭan a ni dawn. Euro 2024 leh Copa America vangin MPL11 thawm a reh a, chutihrualin RG Stadium-a khelh ṭan tur hi tualchhung football ngainatute tan chuan en châkawm lai ṭhahnem tak a awm.

Chhun dar 12:30-ah champion lai Mizoram Police FC leh club thar Ramhlun Athletic FC te an inkhel dan a, chawhnu dar 3:30-ah transfer-a thawm nei lian Chanmari FC leh MPL Qualifier champion FC Bethlehem te an inkhel ang.

Valpuia is Back

MPL awm hnua Mizo striker ṭha ber zinga mi F. Lalrinpuia a rawn kir dawn a, Mizoram Police kawr a rawn ha leh dawn. Valpuia hi inhliam vangin MPL10-ah a inlan thei lo a, MPL11-ah Malsawmfela te nen team khatah an awm dawn.

Valpuia leh Sawmfela te hi MPL best forward vawi hnih ve ve an ni tawh a, best player vawi khat ve ve an ni tawh bawk. Chutihrualin match fitness a la neih ṭhat tawk loh avangin Valpuia hian bul a ṭan kher lo ang.

Sawmfela erawh MPL10 champion-na kawngah player pawimawh a ni a, Mizoram team-ah hmun pawimawh la changin Police hma tawngah a a awm leh dawn. MPL best player vawi hnih ni tawh R. Malsawmtluanga leh best player ni lai H. Lalbiakthanga ten an chawm dawn.

Police hian squad tih chak nen 'civil' mi player an la lut nual a, nikum lama player pawimawh F. Lallawmkima pawh a tel a, India Under 15 captain hlui Eric Lalsangzuala an la lut thar bawk.

Coach Lalbiaksanga Colney chuan, "Champion nawn ngei kan tum a, MPL-a club ngai, a zawna champion pui hmasa bertu nih ka duh a ni. Player kan nei ṭha a, ka nauten thu an awih a, chumi tur chuan theihna pawh kan neiin kan hria," tiin Vanglaini a hrilh.

Ramhlun Athletic hi...

Police hmaa ding tur Ramhlun Athletic hi an dinhmun tur hriatthiam a la har a, chutihrualin coaching staff aṭanga thlir chuan tualchhung football-ah an mikhual lo.

Manager Samuel Lalhruaitluanga hi Dinthar FC tana khel tawh ṭhin leh tualchhung footballer langsar zinga mi a ni a, coach Danny Lalduhawma hi Mizo zinga AFC A Licence coach hmasa ber a ni.

Danny thlawp tur hian MPL1-a Dinthar FC champion puitu Lalnunmawia (Sawmfela nau) leh MPL3 best player Lalramchullova te an awm. Police an hmachhawn hunah Ramhlun Athletic theina a hriat theih ang.

Champion tum Chanmari

MPL10-ah khan Chanmari FC-in champion ngei tumin player pawh an inlan nasa a, final-ah Mizoram Police lakah an vanduai. Kuminah hian champion ngei tumin champion dan hria coach Lalsangzuala Hmar an la lut a, nomawi an chawi loh chuan club hotute an lungawi lo ang.

Santosh Trophy-a Mizoram coach Sanga hian champion tura pressure nei chung hian team a lo enkawl fo tawh a, 2017-18 season khan Chhinga Veng FC enkawlin nomawi chawi theih zawng zawng a chawi vek. MPL-ah Sanga hian record a nei ṭha ber a; Chanmari FC, Chhinga Veng leh Chawnpui FC te a champion pui tawh.

Nipui bazarah Chanmari an che hma a, player ṭha rual awm khawmna tiin a sawi theih. Goalkeeper-ah pawh Zothanmawia (T. Mawia) leh RS Lallawmzuala te an awm a, kil tinah player ṭha an awm khawm. Tlarhmaah Lalkhawpuimawia, Lalnunzama leh Suanngaihmuana te an awm thei a, champion ngei an tum tih a chiang hle.

Tawnhriat nei FCB

FC Bethlehem hi kai thar ni mah se MPL9-ah an inlan tawh avangin MPL kalhmang an hria a, an tawh a khirh khawp ang. Season liam ta khan coach Lalhriatpuia Sailo hoin First Division-ah an champion a, MFA Cup-ah final lut lehin MPL Qualifier-ah an champion.

FCB midfield trio Joseph Lalṭhafela, Kiran Chhetri leh Varun te hi First Division-ah an hmuhnawm ṭhin a, MPL-ah bul an la ṭan ho vek ang em, tih chu vawiin lamah a chiang ang.

Coach Lalhriatpuia Sailo chuan, "Chanmari FC hi team ṭha an ni a, champion tum an nih avangin keini aiin pressure an ngah zawk dawn. Keini chuan kan khelh hmabak tur zel kan ngaihtuah a, Chanmari laka ṭha taka khelh hi kan hna hmasa a ni," tiin Vanglaini a hrilh.

MPL main sponsor LZ Juice

Mizoram Premier League Season 11-na main sponsor chu LZ Juice a ni a, nimin khan Zonet Director LV Lalthantluanga leh LZ Juice neitu H. Lalthanzuala ten inremna an ziak. MPL11 hi LZ Juice MPL11 tih a ni ang.

LZ Juice hi Mizote zingah mimal anga Juice Plant nei lian ber an ni a, Mizorama an thar ngei, thei hmangin theitui hrisel leh tuihnai tak an siam a, Mizo mipui lei theih turin an rawn chhawpchhuak thuai dawn a ni.

LZ Juice te hian Mizoram a bottling plant lian ber tur an bun fel tawh a, phai lama chah buai ngai loin man man zawkin a lei theih ang. LZ Juice MPL11-ah hian team pariat an awm a; chungte chu Mizoram Police FC, Chanmari FC, Aizawl FC, Chawnpui FC, FC Bethlehem, SYS FC, Ramhlun Athletic leh Sihphir Venghlun FC te an ni.