Mbappe vs Ronaldo - tu nge ropui zawk ang?

Kylian Mbappe-a room chu Cristiano Ronaldo 'poster' hmanga chei mawi a ni ṭhin a, Portugal captain hi a ngaisang takzet - zaninah chuan a player ngaihsan hi khelmualah a tawng dawn a, ram tan captain armband an hreng ve ve dawn.

World Cup 2018-a France a champion pui kha chuan, mi tam takin, "Messi leh Ronaldo thlak zo an awm mai mai tawh lo ang," tia an sawi chu dawtah a chantir dawn emaw kan ti a, beiseina a sang hle.

Mbappe hi football khawvela player 'hot' ber pawl a la ni reng a, mahse, Lionel Messi leh Cristiano Ronaldo te kum 25 an nih kha chuan an ropui tawh hle - Mbappe erawhin mimal angin chawimawina ropui dawn a la nei lo a, thilmak danglam a thleng a nih ngawt loh chuan Messi leh Ronaldo kiangah a hming sawi rik a ni lo ang.

Zaninah erawh a 'idol' hi zan khat chauh na na na chu, hliahkhuh turin hun a nei a, he hun ṭha hi a bawhpelh a thiang lo. Mahse, Real Madrid striker thar hi Ronaldo ang thoin Euro a hmang ropui rih lo a, inchhuang thei a awm lo.

Mbappe hian goal khat a khung tawh a, penalty aṭangin a ni! Ronaldo hian goal a la khung lo a, penalty a hlah thung! Zaninah player pahnihin an hming chherna hun an nei dawn a, tu zawk takin chhawr ang maw, tih chu rilrua zawhna awm mek a ni.

Kum 25 mi Mbappe hian a hnar ruh tliak vangin hmaikawr nen khelmual a luh a ngai a, hrehawm a ti hle. France coach Didier Deschamps chuan, "3D-a thil hmu ang mai hian a inngai a ni," a ti a, Mbappe chuan, "A hrehawm takzet," tiin a sawi bawk.

A tawpa zawhna tur erawh, "Mbappe nge Ronaldo-in a team semifinal thlenpui zawk?" tih hi a ni dawn tho tho a, chhuanlamin awmzia a nei lo ang - Slovenia laka penalty a hlah hnua, penalty shootout-a pet hmasa bertu ni leh ngam ngat Ronaldo hian a hliahkhuhna hnuaiah Mbappe awmtir a duh dawn a, striker ṭha pahnih intawng tur hi en a châkawm hle.