Champion lai Vondrousova a tla

Wimbledon hmeichhe champion lai Marketa Vondrousova chu hneh nei loin a tla nghal, a match hmasa berah Jessica Bouzas Maneiro lakah 6-4, 6-2 a tlawmin kumin atan chuan a zinkawng a tawp hma hle.

Thawhlehni zan first round inkhelah Vondrousova a che hleithei lo, a khingpui service vawi hnih chhuhsak thei mah se ama service vawi nga ngawt a hloh avangin set pawh a la ve lo, atan inelna hriatreng tlak loh a ni ang.

Season hmasa khan Czech Repubic nula Vondrousova hian final-ah Ons Jabeur hnehin nomawi a chawi, seeded chang phak lo zingah Wimbledon hmeichhe singles champion thei hmasa ber a ni, kuminah seeded parukna ni phak mah se nikum a boruak nen a inang ta lo.

Kum 25 mi Vondrousova chuan, "Ka tan chuan tih theih a awm lo, theihtawp chhuah mah ila ka khingpui khan chumi aia ṭha chuan a rawn ti zel," a ti. Hnehna changtu Bouzas Maneiro pawhin tennis a khelh hunchhunga a thil tawn hlimawm bik a nih thu a sawi ve bawk.

Kum 1994 khan champion lai Steffi Graf chu a match hmasa berah Lori McNeil hneh loin a lo tla tawh, ani hnuah Vondrousova hi Steffi dinhmun ang luah leh hmasa ber a ni a, tun hnai kum sarih chhung chu hmeichhe champion hran zel an awm dawn tihna a ni.

Inkhel dangah Iga Swiatek erawh a chak, world number 1 hian amah ang bawka Grand Slam champion tawh Sofia Kenin chu 6-3, 6-4 a hnehin second round a inhlangkai a, seeded pakhatna hi tun hnaiah a zawnin match 20 a chak tling ta chiah.

Polish nula hian grass court-ah inkhelh a harsat ṭhin, tun ṭum a match hmasa ber erawh a khel ṭha hle. French Open leh US Open champion tawh hian a vawi khat nan Wimbledon title lak a tum dawn, grass court inelna liana a thlen san ber chu season hmasa khan niin quarterfinal-ah a tla.