Pro Fight champion-te inlanna tur Fight Night awm dawn

LPS Fight Night chu July 26, Zirtawpni hian buatsaih a ni dawn a, LPS Pro Fight champion lai pali - Laldinsanga, HC Lalramfela, Lalruatzela Hauzel leh C. Lalhruaitluanga te an inlan ang.

Mizo professional boxer-te tuai hriamna leh boxing boruak siam thar lehna hi LPS Promotion chuan LPS Arena, Falkland-ah neih a ni dawn. Inhnek vawi sarih awm tura tih niin heng zinga panga hi khawvel puma professional boxing chhinchhinna boxrec-ah ziah luh a ni dawn a; hmasawn beiseiawm boxer naupang zawkte tan inhnek dang pahnih ruahman telin, Olympics hmathlir bawhzuina peng khat atan hman nghal a tum a ni.

Nikum Pro Fight bantamweight final-ah Dinsanga a chak hram a, inhnehtawk taka round li an inhnek tawn hnuah Pangzawl tlangval Ramdina'n tawn hriat a tlakchham tuarin point a hloh a, uiawm takin a tlawm phah zui a ni.

Anni pahnih hi Fight Night inhnek pui berah an intawng leh dawn a, round ruk chhung inhnek tura tih an ni a, inbuatsaihna chawl lo a an kalpui zui avangin hmuhnawm leh zuala innuai thei tura beisei an ni.

Boxrec-ah chak hnuhma neih belh tumin Pro Fight champion dang, lightweight title kawltu Ramfela, welterweight champion Ruatzela leh middleweight champion Hruaia'n Mizo boxer ṭha an hmachhawn dawn bawk.

Pro Fight champion lai mi panga zingah NT Lalbiakkima'n flyweight final-ah sawi hlawh takin Vanlalenkawltira a hneh a, tun hnaiah mimal harsatna a neih avangin Fight Night-ah a inlan dawn lo va, a vawi khat nan professional huanga chak tumin Enkawltira a inhnek dawn a ni.

Dinsanga leh Ramdina ni lo boxrec-a ziah luh tur inhnek dang pali hi round li theuh a ni dawn a, boxrec-a ziah luh loh tur inhnek dang pahnih awm telin round 3 a ni ve thung ang.

Kum 2023 Pro Fight flyweight huang aṭanga hriat hlawh, Biakkima hneh zo lo a tla ve ve Melthum boxer Emmanuel Vanlalthlengliana leh rawlthar Benjamin Lalrindika an innuai dawn a; anni bakah hma lam hun thlir chunga boxing zirlai pahnih an inhnek bawk ang.

LPS Promotion chuan October thla tawpah Pro Fight ṭan turin ruahmanna a siam fel nghal. Kum 2009 aṭanga 2019 thleng promotional fight atan ṭum riat hman a nih hnuah, kum 2022 aṭangin kumin hi professional kalphung zuia huaihawt a nih vawi thumna tur a ni.