MPL11 khelh nan ni 5 chauh a awm tawh

Mizoram chhunga football inelna sang ber Mizoram Premier League Season 11 chu July 9, Thawhlehni aṭangin RG Stadium-ah khelh ṭan a ni dawn. Tun ṭum inelnaah hian team thar pali ṭhawt an awm dawn avangin team ṭhat dan tur pawh hriatthiam a har hle.

MPL ṭantirh aṭanga season tina la inlan Aizawl FC leh Chanmari FC te chu ṭum dang ang bawkin champion rinkai an ni a, MPL10 champion Mizoram Police leh MPL9 champion Chawnpui te pawh champion beisei ngam tura ngaih an ni.

MPL11-ah Chhinga Veng an tel dawn tawh lo a, an hmun ruak hi Ramhlun Athletic FC-in an lei tawh. AFC A Licence coach Danny Lalduhawma'n Ramhlun hi an inlan dawn a, hmuh a châkawm tawh hle.

Electric Veng pawhin MPL an khel chhunzawm thei dawn tawh lo a, Sihphir Venghlun FC-in an hmunruak an luahkhat dawn. Sihphir Venghlun FC hi ADFA First Division-ah team ṭha zinga mi an ni a, veng innghahna Sihphir Venghlun hi LPS Cup Inter Village Football Tournament-a champion thei an ni bawk. Chutihrualin MPL erawh veng inelna leh First Division nen chuan a kar a hla deuh tih an hriat a ṭha ang.

MPL Qualifier aṭangin FC Bethlehem an inpettling a, Lalhriapuia Sailo hote hi First Division champion niin MFA Cup final-ah vanduai mah se MPL Qualifier-ah erawh team ṭha ber an ni. MPL playoff aṭangin SYS FC an inpettling bawk.

Coach tawnhriat nei ṭha Lalmuankima kaihhruai SYS FC hian player naupang rual an chhawr dawn a, an inpuahchahna a rei tawh bawk avangin inkhel hmuhnawm tak an lantir theih a rinawm. Chutihrualin MPL hi kum bithliah inelna a ni lo a, SYS naupang rual tan a awlsam dawn lo.