Rangnick-a 'Austria' an tla!

France leh Netherlands awmna group-ah hmahruaitu ni chungin round of 16 an lut a, mahse, Austria-in an ngam loh chu Turkey an ni - Thawhlehni zan khan Turkey hian 2-1 in last 16-ah Austria hi an hneh a, kum 2008 hnua a vawi khat nan Euro-ah quarterfinal an lut.

Leipzig Stadium-a inkhelah Turkey hian goal khung turin hun an mamawh rei lo takzet - second 57-na lekah Arda Guler-a corner chu Austria player-ten an pet chhuak thei lo a, heta ṭanga ball kal hi Merih Demiral chuan hnai set sawtah goal-ah a chantir nghal.

Rin hlawh zawk Austria an hawihai a, minute khat pawh an khelh hmain si an phur der! Poland leh Netherlands laka minute 10 chhunga goal khung hman Austria zawkin si an phur a, na takin Turkey an nawr let.

RB Leipzig attacking midfielder Christoph Baumgartner-a'n minute hnih hnu lawkah si phurh sutna remchang nei nghal mah se, uiawm takin goal post sirah a kal a, first half hun pek belhah uiawm takin a hlah bawk - a club khelhna khelmualah Baumgartner a vannei thei lo.

Chawlhlawk hman hnuah pawh Austria bawkin na takin Turkey an nawr a, mahse, Austria an hmachhawn hma match thuma goal nga chhuahtu Turkey tlarhnung an khawng tlat! Minute 59-naah goal khungtuah zawk an ṭang leh a, Guler-a corner aṭanga ball kal bawk chu 6ft 4in-a sang centre back Demiral chuan goal-ah a chantir.

Austria an beidawng duh chuang lo a, a rah an seng. Michael Gregoritsch chuan minute 66-naah si phurh a sut ṭhen - hun tawp thlengin goal dang erawh an nei zui ta lo a, tun tournament-a inkhel hmuhnawm ber ang hiala chhal ngamah Austria an tlawm.

Turkey-in team hmuhnawm Austria an dang chat thei a, tlarhma lamah pawh Guler, Kenan Yildiz leh Baris Alper Yilmaz te che vel chu hmuhnawm a tling. Turkey-in an chak chhana lawmthu an hrilh tur langsar erawh goalkeeper Mert Gunok a ni.

Kum 35 mi Besiktas keeper hian 1-0 a nih laia Marko Arnautovic-a chance duhawm zet chu a dansak a, hun pek belha Baumgartner-a ball tauh hnai set sawta a dan phei chu a hranpaa zir tham a ni - a pui takzet!

Ralf Rangnick-a'n final an thlir thu sawi mah se, a team hmuhnawm tak tawpna chu round of 16 a ni a, Netherlands-in group stage-a an hneh loh Austria lakah phuba lak châk viau mah se, Turkey nen zawk semifinal luh an inchuh a ṭul dawn.

Austria boss Rangnick chuan, "Si hnih phurh chuan a harsa tawh ṭhin a, kan theihna zawng zawng kan hlan. Goal khat kan khung a, a dang khung leh tur pawhin hun a la tam tawk. Mahse, Gordon Banks-a'n si ban a nghah chuan a harsa a ni," a ti!

Manchester United boss hlui hian hun tawp dawna Turkey keeper-in Baumgartner-a chance neih a dan chu 1970 World Cup-a Pele-a ball tauh ṭha lutuka dangtu English keeper Banks-a hnathawh nen a tehkhin a ni.

Rangnick chuan sawi zawmin, "A chang chuan vanneihna hi kan mamawh ve bawk a, hun tawp dawna Baumgartner-a chance kha lut ngat se, kan chak ang. Chakna hun ṭha kan nei a, kan puanthuah kan tel ta mai tur hi awih a harsa zawk a ni," a ti.

Turkey manager Vincenzo Montella chuan, "Tumahin tlawm kan duh lo a, kan zavaiin kan theihna zawng zawng kan hlan. Hetiang ang match hi chu kan thinlung zawng zawng nena kan khelh chauha hnehna chan theihna chi a ni - beiseina leh inrintawkna kan nei a, zankhua pawhin kan chak dan hi ka sawi thei hial ang. Kan thawhhona ṭha tak ka hmu a, chu chuan min tilawm hle a ni," a ti a, a naute a chhuang hle.