Damkawr Djokovic a chak

A khup hliam zai a nih hnua a match hmasaah Novak Djokovic a chak - Serbian star hian Thawhlehni zan khan Wimbledon first round khelin, a khingpui Vit Kopriva a hneh.

Centre Court-a inkhelah Djokovic hian harsatna lian tham a tawk lo, darkar khat leh minute 58 chhungin 6-1, 6-2, 6-2 in a chak. Second round-ah chuan wirldcard hmanga inlan Jacob Fearnley a hmachhawn leh ang.

Kum 37 mi Djokovic hi French Open khelh laiin a hliam, a hnuah a khup vei lam hliam hi zai a ni. A hliam vang hian Wimbledon inbuatsaihna tournament pawh a khel lo - Paris khawpui aṭangin London lamah a inlan dawrh tihna a ni.

Seeded pahnihna Djokovic chuan, "Hliam leh na ni loin inkhel chauh kha ngaihtuah ka tum lui tlat a, chawlhkar thum chhung theihtawpa ka lo insumna leh inenkawlna chu match pangngaiah a takin ka hmu.

"A nihna takah chuan tournament hautak khel tur chuan ka tan a la hma deuh, mah se Wimbledon hi hmun nuam leh khelh loh uiawm tak a ni a, chuvanga inlan chu ka ni," tiin a sawi.

Grand Slam nomawi 24 nei tawhtu Djokovic hi major title kawl hnem ber a ni a, grass court inelna lian bikah hian vawi sarih a championh tawh - kuminah a champion leh a nih chuan Roger Federer-a record a tluk ang.

Inkhel dangah Andrey Rublev a chak lo. Russian tlangval hi seeded parukna a ni phak hial, mahse player langsar tak ni lem lo Francisco Comesana lakah 6-4, 5-7, 6-2, 7-6 (7-5) in a chak lo a, player langsar zinga tla hma ber a ni.

Rublev hian a khel ṭha lo a, maha khelh danah ngei pawh a lungawi lo tih lantir nan a racket a vaw chhia, a ngam loh Comesana hi kum 23 mi niin inelna lian bik Grand Slam tournament a khelh vawi khatna chauh a ni thung.

Seeded 20-na Sebastian Korda pawh a chak lo - American tlangval hian midang khelh theih loh vanga inlan ve hram Giovanni Mpetshi Perricard chu 7-6 (7-5), 6-7 (4-7), 7-6 (8-6), 6-7 (4-7), 6-3 in a hneh lo. Hnehna changtu Perricard (6ft 8in) hian vawi 51 tehmeuh aces a siam.

French Open pahnihna Alexander Zverev chuan harsatna a tawk lo thung, German star hian Roberto Carballes Baena chu straight set 6-2, 6-4, 6-2 in a hneh. Hubert Hurkacz pawhin Moldovan Radu Albot chu 5-7, 6-4, 6-3, 6-4 a hnehin, Alex de Minaur chuan amah ang bawka Austrlian player James Duckworth a hneh bawk.

Mipa player ṭha, champion tura rinkai ni phak zinga mi Stefanos Tsitsipas leh Holger Rune te pawhin an khingpui ve ve an hneh a, grass court inelna lianah a tir aṭanga beisei loh result kan hmuh nual avangin chak chiangsa sawi lawk a rem leh dawn lo a ni.