Brazil hmachhawn tur Uruguay

Copa America quarterfinal inhmachhawn tur a chiang kim - Brazil chuan Uruguay an hmachawn dawn. Football thiam ram pahnih te hi July 7, Pathianni zing dar 6:30-ah an intum ang.

Dorival Junior enkawl Brazil hian Group D hmahruaitu ni turin Colombia hneh ngei an ngai tih an hresa, mahse nimin zing group match an khelh hnuhnung berah ram pahnihte hi 1-1 in an inhnehtawk.

World champion vawi nga ni tawh Brazil tan Raphinha chuan minute 12-naah freekick a chhuih lut a, chawlhlawk hma chiahin Colombia lamin Daniel Munoz hmanga sutin goal dang a lut zui tawh lo.

Colombia hi kum 2022 February thla aṭang khan tlawm loa kaltluang lai an ni a, tun ṭumah pawh hian team hmuhnawm an ni. Brazil lakah Rafael Borre chuan hun tawp dawnah a khung teuh hle a, chak zo lo mah se point sarih hmuin a chung berah an awm.

Brazil tan chanchin lawmawm lo a awm thung. Vinicius Junior chuan Copa 2024 khelh laia a vawi hnih nan yellow card vawi hnihna a hmu a, match hmabakah a inlan thei dawn lo. Real Madrid winger hian Uruguay a hmachhawn thei dawn lo tihna a ni.

Brazil coach Dorival Junior chuan, "Hliam vangin Neymar kan chhawr thei lo tawh sa a, tunah kanj player pawimawh chu hrem vangin kan chan leh ta. A tihsual kha a lian lo a, chu pawh vawi khatna a ni, khatianga card phawrh a ni mai kha a mak.

"Kan player ṭha leh langsar tel loa kan khelh a ngai dawn, hei chu thil thar a ni hran lo. Player dangte tan hun a inhawng tihna a ni mai," a ti. Dorival Junior hian tun hnaia che ṭha tak Uruguay lakah fimkhur tak chunga a naute a rem a ngaiin a rinawm.

Nimin zing group D inkhel dangah Costa Rica chuan Francisco Calvo leh Josimar Alcocer te goal hmangin Paraguay 2-1 in an hneh, ram pahnih hi quarterfinal beiseina nei tawh lo niin an chunga awm Brazil leh Colombia te an phak thei tawh lo a ni.