Charity Football aṭanga sum hmuhchhuah Rs 15,77,682

Mizoram Football Association leh Mizo Professional Footballers Association (MPFA) chuan June 21, Zirtawpni khan RG Stadium-ah Charity Football match an buatsaih a, heta ṭanga an sum hmuh zat chu Rs 15,77,682 a ni.

Charity Football match hi Cyclone Remal vanga chhiat tawkte puala buatsaih a ni a, sum hmuhchhuah aṭanga Rs 13,90,000 chu Cyclone Remal tuartute hnenah pek niin a bang zawng chu Chief Minister's Relief Fund-ah an chhunglut.

Sum hlanna hun hi July 2, Thawhleni zan khan Hyve Aizawl City Hall-ah neih a ni. MFA honorary secretary Lalrengpuia chuan, "Ticket min lei saktu Zoram mipui te, All star team players, I League & ISL Team players, kan sponsors - Nexa GIG, Vakiria, Active Sound & Mark Advertising te bakah thawhpui Zonet te chungah kan lawm hle a ni," tiin Charity match hlawhtlin theih nana hma latute chungah lawm thu a sawi.

Cyclone Remal vanga nunna chânte hi mi pakhat zelah Rs 40,000-in an ral a, veng tuar na zual Hlimen Branch YMA leh Melthum Branch YMA te chu Rs 2,00,000 leh Rs 1,00,000-in ṭanpuina pek niin, thlanmual chhia veng pathum Melthum, Republic Veng leh Kanan Branch YMA hnenah Rs 10,000 ṭheuh pek an ni bawk.

Santosh Trophy-a Mizoram coach Lalsangzuala Hmar te chhungkua pawh Cyclone Remal vangin an chenna in aṭangin an insawn a ṭul a, MFA-in Rs 10,000-in ṭanpuina an pe.

Sum hlanna hunah hian MPFA secretary Lallianzuala Chhangte leh GIG neitu John Lalpeka ten thusawina hun an nei a, Mizo mipuite ṭanpui ngaite ṭanpui kawnga an pen chhuak ṭhin chu lawmawm an tih thu a sawi. Tun ṭuma Charity match hi mipuiin an hlut a, RG Stadium-a mipui pungkhawm tam ber ṭum ang hiala ngaih a ni.