Iordănescu hma hun a chiang lo

January 2022-ah Edward Iordănescu-a'n Romania a enkawl ṭan a, Euro khel turin a hruai kai a, round of 16 a hruai thleng bawk. Mahse, kum 46 mi coach hian an ram team a enkawl chhunzawm dawn leh dawn loh a sawi chian theih loh thu a sawi.

Iordănescu chuan, "Tun dinhmunah chuan Romania national team-in min mamawhna aiin ka chhungten min mamawhna hi a sang zawk. Eng thutlukna pawh siam ila, he team hian hmabak êng tak a nei a, World Cup 2026 khelh kan duh. A zawna major tournament khelh hi kan team ṭhan zelna turah a pawimawh em em a ni," a ti.

Euro 2024-a Romania player 26 zinga 16 chu kum 26 hnuai lam an ni a, an tan chuan an major tournament hmasa ber niin, Romania hian hmabak an nei êng.

Iordănescu chuan, "Thawnthu ngaihnawm tak chu vawiin hian tihtawp a ni ta a, lungngaihna pawh a tel ngei alawm. Ni tin kan theihna zawng zawng kan hlan a, ka player, min thlawptu, in lama min ṭantu te leh khawvel hmun hrang hranga Romanian te chungah lawmthu kan sawi a ni," a ti.

Kum 46 mi Iordănescu hi a pa chu Romania coach hlui Anghel niin, a pa hian Romania hi 1993-1998, 2002-2004 leh 2014-2016 inkarah a enkawl a, World Cup 1994-ah khan quarterfinal a hruai thleng hial.