Messi a inkhelh theih a rinawm

Argentina chuan Copa America quarterfinal khel turin Zirtawpni zing dar 6:30 hian Ecuador an hmachhawn dawn, captain Lionel Messi chuan nimin khan team training pangngai a zawm theih avangin inelna a hmchawn theih a rinawm.

World champion Argentina hian Messi hian Canada leh Chile an hneh a, an group match hnuhnung berah erawh Messi hi a malpui vei lam hliam vangin a inlan thei lo, a hliam hi uluk taka enkawl a ni.

Argentina assistant coach Walter Samuel chuan, "Leo dinhmun hi kan sawi lawk thei lo, nitin a awm dan enfiah zel a ni. Doctor ten a ṭha thei ang ber turin an enkawl a, keini chuan a inkhelh theih kan duh ber," tiin Messi chungchang a sawi.

Kum 37 mi Messi hi a dam ṭha a nih chuan khawihchet thiang lo ang maiin a khel ziah, a kum a tam ve tawh avangin hliam tenau deuh nei chung pawha inkhel lui chi a ni tawh lo thung, a inlan theih chu an duh ber ni mah se a tel lo pawhin an tlarhma lam an ngaihtuah awm loh hle.

Lionel Scaloni-a'n duhthlan tur a ngah, chutihrualin inelna boruak sangah chuan tawnhriat ngah an pawimawh. Tun ṭumah pawh hian Messi leh Angel di Maria te chu bul ṭan thei tura ngaih an ni a, inelna hmang ṭha tak Lautaro Martinez pawh enkan a harsa tawh ang.

Messi nena World Cup leh Copa America champion tawh Di Maria chuan, "Leo dinhmun a ṭha, kan match hmabakah hian a inlan theih ngei ka beisei," a ti a, a tleirawl lai aṭanga a khelhpui tawh hi Ecuador laka inlanpui ngei a duh.

Argentina hian tun hnai khan Olympic khel tur squad an puang a, coach Javier Mascherano kaihhruai team-ah hian Messi a tel dawn lo, senior player langsar zingah Julian Alvarez leh Nicolas Otamendi te an tel thung.

Paris Olympic hi July thla tawp lama neih ṭan tur a ni dawn, tunah Copa America an khelh mek avangin Messi tan hun inhnaihchilh taka tournament khelh kha a harsa tawh. Beijing Olympic 2008-ah khan an ram tan gold medal a lo pet chhuak tawh a ni.