Team hmuhnawm Netherlands kan hmu ta

Euro 2024-a beisei phak lo Netherlands-in an theihna tak tak an pholang ta a, European champion ni turin an ṭha tawk tih khelmualah a takin an lantir - round of 16-ah Romania chu 3-0 a sawpin quarterfinal an lut.

Netherlands tan Cody Gakpo chuan goal hmahruai a khung a, Donyell Malen chuan goal hnih dang a khung ve bawk. Romania-in a chhanletna tur an nei lo a, a thiam pariat zingah Netherlands an tel.

Liverpool forward Gakpo hian goal hmahruai a khung bakah, Malen-a goal khung tur a siamsak a, Xavi Simons chuan assist vawi hnih a nei ve bawk. Netherlands ṭha ber kan hmu a, fans an phur khawp ang.

Round of 16 inkhel dangah rin hlawh lo zawk Turkey chuan 2-1 in Austria an hneh a, quarterfinal an lut. Netherlands nen semifinal luh an inchuh dawn a, Ronald Koeman nauten nomawi an mitthla ṭan ang.

A tirah Romania

Romania-in tlarhnung lam vengin, fimkhur takin Netherlands an hmachhawn dawn emaw kan ti a, mahse, Edward Iordănescu naute hian inringtawk takin a tirah team ṭha zawk Netherlands an nawr ngam a, Ronald Koeman-a naute an talbuai leh dawn niin a lang.

Tricolorii (Romania sawina) lamin an nawr nat avangin Netherlands an chesual leh ṭhin a, an chetsual karah Memphis Depay chuan chance nei zuai mah se a chhawr thei lo - tun inelnaah beisei a la phak lo tluang zel.

Minute 15-naah Romania-in passing mawi tak an lantir a, Parma winger Dennis Man chuan chance duhawm a nei - mahse, a hun ṭha neih goal-ah a chantir thei lo a, kha goal kha lut ta ngat se, inkhel a danglam ang.

Minute nga a liam a, Netherlands an hlim ta zawk. Xavi Simons-a ball pek chu Gakpo-a'n ṭha taka a lakluh hnuah, mawi zetin goal-ah a chantir a, tun inelnaa goal thum a khungna chiah a ni nghal - bul ṭan ṭha lo Netherlands-in hma an hruai.

A tawpah Netherlands

Gakpo-a'n goal a khung hnuah Netherlands an inringtawk sawt a, an match hnuhnung bera 3-2 a Austria ngam lotu kha an ni ang tih awih a harsa zawk - chawlhlawk hma hretin Simons chuan chance a nei a, mahse, Paris Saint-Germain attacking midfielder hian a chhawr lo.

Goal dang lut loin chawlhlawk hman a ni a, mahse, an khelh ṭhat avangin Dutch fan-te an hlauthawng lo. Second half ṭantir erawh Romania bawkin bul an ṭan ṭha a, first half ang thoin rei daih erawh an harsat.

Netherlands tan Depay bawkin hun duhawm nei mah se, a che rang tawk lo a, minute 57-naa Virgil van Dijk-a'n post a tauh perte chu uiawm tak a ni - Gakpo-a'n an goal hnihna khungah inngai mah se, VAR rawn a nih hnuah offside vangin pawmsak a ni lo bawk.

Mahse, a khel ṭha zawk an ni miau a, Netherlands-in goal an hlawh chhuak ta nge nge. Malen chuan minute 83-naah chak nemnghehna goal a khung a, hun pek belhah a belhchhah leh sak bawk - Netherlands-in 3-0 in hnehna an chang a, quarterfinal an khel dawn.

Mangṭha Romania

Kum 24 hnua a vawi khat nan Romania-in European Championship-ah knockout match an khel a, kum 2016 hnua major tournament an khelh hmasak ber a ni bawk - an thlen chin ringawt pawh a ropui.

Allianz Arena-a inkhelah pawh hian fan-ten an thlawp ṭha a, goal an chhuah hnuah pawh fan-ten ring taka zai, au leh lam chungin an ram team hi an ṭan - Netherlands meuh erawh an chelh ta ngang lo.

Netherlands tan pawh kum 2008 hnua Euro quarterfinal an khelh leh hmasak ber tur a ni - kum 2012 khan group stage-ah an tawp a, kum 2016-ah an tling zo lo a, kum 2020-ah round of 16-ah an zinkawng a tawp.

Barcelona-in an ban hnua Netherlands enkawl tura kir Ronald Koeman tan tun hi a hming chhe tawh hnu tihṭhat lehna remchang a ni a, kum 61 mi coach hian kum 1988 khan player ni chungin Euro nomawi a lo chawi tawh a, coach ni chunga nomawi chawi leh a duh dawn.