Champion lai Alcaraz a inpeih

Wimbledon an ṭan hnai a, player ṭhenkhat dinhmun chiang lo awm nual mah se Carlos Alcaraz erawh a inlan ngei dawn - mipa champion lai hian inelna hmachhawn turin a inpeih tawh tih a sawi.

Spanish star hian season hmasa khan Wimbledon title a la, a hmain US Open champion a nih tawh bakah kuminah French Open nomawi a chawi leh bawk - grass, hard leh clay court-ah a inkhel thiam vek.

World number 2 Alcaraz chuan, "Nikum khan duhthusama ṭhain inbuatsaihna ka nei thei a. Wimbledon hmain Queen’s Club nomawi ka chawi a, a hnuah inelna lianah ka hlawhtling zui thei hlauh bawk.

"Tun hma chuan grass-ah ka inkhel tam lo, tunah erawh match ka khel tam tial tialin grass pawh ka hmang thiam viau tawh, kuminah pawh thil a danglam tam loh ka beisei," tiin a sawi.

Grass chungchang bik sawi zuiin Alcaraz chuan, "Grass chunga inkhel turin ka puitling tawk tawhah ka ngai, training pawh ka nei ṭh hle. Ka chevel a zangkhai a, nikum ang thlap kha la ni lo deuh mah se hmasawnna hun a la awm.

"Tournament ṭan hmain training hun tlem ka la nei, he hun hi ka hmang ṭangkai hle turah ka ngai," a ti. Queen’s Club title hloh mah se Wimbledon nomawi erawh hun ngei a tum.

Tennis grass court inelna lian ber Wimbledon hi qualifying round an khel mek a, inelna pangngai (main draw) chu July 1, Thawhṭanni aṭangin an khel ṭan ang.

Alcaraz chuan, "Wimbledon ka match hmasa ber chu Centre Court-ah ngei mai ka ṭan thei dawn, hei hian min tiphur hle. Tournament kan khel a, kan chak loh hnuah tak hian ṭha zawka thawh chhuah leh a châkawm ṭhin," a ti.