Chawnpui FC-in Sawmtea an lut

MPL club Chawnpui FC chuan team enkawl turin I League-a Aizawl FC chet ṭhatpuitu B. Malsawmzuala an lalut a, MPL11 boruak a nun phah sawt ang.

MFA-in MPL11 fixtures a tichhuak tawh a, Mizoram chhunga inelna sang ber hi July 9, Thawhlehni aṭangin khelh ṭan a ni dawn. Chawnpui FC hian July 10, Nilainiah Aizawl FC nen an inkhel dawn a, Sawmtea hian a club hlui a hmachhawn nghal dawn tihna a ni.

MPL10-ah Chawnpui FC-in coach Lalrindika Hmar hnuaiah semifinal an thleng a, tun season-ah pawh team ṭha zinga mi an ni leh ang. Sawmtea an lakluh hma hian player ṭha Laltluangliana (defender), Buanga (keeper), Jerry Lalchhanchhuaha (striker), K. Lalrosanga (winger) leh Thangzawmsanga (midfielder) te an lalut tawh a. MPL11-ah champion beisei ngam zinga mi an ni ang.

Inkhelh thiam

B. Malsawmzuala hi a inkhelh laiin Mizo player talent nei ṭha zinga mi a ni. August 2006 khan Nike Cup-ah India aiawh Mohun Bagan U15-in Manchester United U15 chu Carrington Ground-ah an hmachhawn a, David Lalrinmuana'n goal hmahruai a khung. David-a goal khung tur siamsaktu hi Sawmtea a ni.

Second half-ah mualneitu Man United 4-1 in chak mah se India rawltharte hian fak an hlawh hle. Sawmtea hian MPL-ah pawh sulhnu ṭha tak a nei a; Aizawl FC, Luangmual FC, Mizoram Police, Zo United leh Ramhlun North tan a khel tawh. MPL2-ah an veng club Luangmual tan captain-in final a hruai thleng.

Tawnhriat nei ṭha

Kum 2017 aṭangin Sawmtea hian coaching hna a thawk ṭan a, Aizawl FC academy a enkawl. I League-ah pawh Santosh Kashyap leh Standly Rozario te hnuaiah Aizawl FC assistant coach hna a chelh tawh.

Season liam ta khan Calcutta Football League first divison club Kalighat Sports Lovers Association a enkawl a, result ṭha tak a neihpui hnuah Aizawl FC-ah rawn kirin youth team a enkawl. AFC-in result ṭha an neih tawk loh avangin Sawmtea hi senior team enkawl tir a ni a, Mizo club-in I League season chawhma lamah result an neih ṭhat phah hle.

Season chawhnu lamah erawh AFC-in Bobi Stojkoski an lalut a, North Macedonia coach hnuaiah result an neih ṭhat loh avangin Sawmtea chungah bawk rinna a nghat. MPL11-ah Chawnpuiin Sawmtea an lalut a, beisei an neihsan phah khawp ang.