BR Studio MFA Futsal League-ah Thlangtiang FC an champion

24th June, 2024

BR Studio MFA Futsal League 2023-24-ah Thlangtiang FC an champion a, June 22, Inrinni zan final-ah Senator FC 4-2 in an hneh. Luangmual club Thlangtiang hian coach Thomas Lalengkima enkawlna hnuaiah a vawi khat nan MFA League-ah an champion.

R. Dengṭhuama Hall-ah final hi khelh a ni a, Tuikual South club Senator-in Aron Vanlalrinchhana hmangin an khung hmasa. Semifinal-a hattrick siamtu Aron hian tlarhnung aṭanga chak taka la chhuakin Hrangvula nena wall pass neih hnuah goal a khung a, minute 19-naah 1-0 a ni.

Second half-ah Thlangtiang an rawn insiamrem a, India sub junior team tan pawha khel tawh Lalremruata'n (Bat-a) kawh zetin minute 30-naah koh zetin a pet goal. Goalkeeper Samuel-a tan pawh dan ngaihna a awm lo. Minute li hnuah captain Lalmuankima ball pek chu Bat-a'n a khung leh bawk.

Mahse, Aron bawk a rawn lang. Senator forward hian Thlangtiang defender back pass sual chu goal-ah a chantir a, minute 35-naah 2-2 a ni. Final inkhel a nung ṭha a, Thlangtiang chungnung hret mah se counter attack-ah Senator an hlauhawm ṭhin.

Thlangtiang tan Jonathan Lalrawngbawla a rawn lang a, minute 40-naah freekick aṭangin a khung. Minute 47-naah Bat-a siamsak chu Zomuansanga'n kawh zetin a pet goal a, Thlangtiang 4-2 in an chak.

Thlangtiang coach Thomas Lalengkima chuan, "A hmasa berah chuan Pathian ropui ber se; kan champion hi club neitute, coaching staff-te leh player-te thawhrim rah a ni. Sorkar hna chauh ni loa private company-a thawhna te a awm ang hian, football-ah ringawt ei kan zawng vek thei lo ang hian futsal khelte pawh hian hlawh tlem a zawng an lo neih te pawh hi a hlu em a ni," tiin a sawi.

Thomas chuan sawi chhunzawmin, "Football leh futsal hi a kal kawp ve thei a ni tih hi ram changkang zawk kan en chuan a hriat. Sports pakhat ve tho a ni a, kan cable tv-te, kan sports writer-te leh kan sports page lian tak takte hian tun aiin han thlawp ṭha se ka ti. An thlawp ṭhat chuan tun aiin player-te pawh kan chherchhuah nasat lehzual ka ring," tiin Vanglaini a hrilh.

Futsal League aṭang hian Lawmna FC (Dinthar), MFN FC (Laipuitlang) leh KFC (Republic Veng) te chu an relegate a; Division One aṭangin Delija FC (Chawnpui), Ramhlun North FC leh JKFC (Chanmari) te Futsal League khel turin an tling thung. Tun season Futsal League hi BR Studio bakah Roland, Aizawl Rice Bowl, Daphalsa Enterprise (Durtlang Leitan), MJ Futsal leh CellCare ten an sponsor a ni.