MFA leh MPFA buatsaih Charity match : RG Stadium-a mipui pun khawm tam ber ṭum?

MFA leh Mizo Professional Footballers Association (MPFA) ṭangkawpin an buatsaih Charity Match vanga mipui pungkhawm an ṭhahnem a, RG Stadium-a mipui pungkhawm tam ber ṭuma ngaih theih a ni.

July 21, Zirtawpni zan khan Cyclone Remal vanga chhiat tawkte ṭanpui nan Charity Match hi buatsaih a ni a, inkhel ngaihven hlawh berah ISL leh I League player-te 2-2 in an inhnehtawk. Hemi hma hian All Star match khelh a ni a, kawng hrang hranga Mizo hriat hlawhte inlanin, mipuiin an hlut hle.

Mipui an tam!

RG Stadium tlai dar 4:00-ah an hawng a, tlai dar 5:00-ah chuan mipui ṭhahnem tak an pungkhawm tawh. Dar 5:30-ah All Star football match khelh a ni a, khua a ṭha bawk nen MPL final entu zat zet mipui an awm tawh a, an la kal zel bawk.

Zan dar 8:00-ah I League leh ISL player-te an inkhel dawn a, zan dar 7:00 chhoah chuan mipui an tam tawh hle. Mipui an ṭhahnem si a, panna kawngin a dawl zo lo - inkhel tur ngei ngeite pawh traffic jam-ah an tang.

Mualpui zero point-ah lirthei dah a ngai tawh a, two wheeler pawh a che thei tawh lo a ni ber. Stadium pan turin kea kal a ngai a, motor a jam nasat avangin RG Stadium thleng ta lo pawh an awm ṭheuh.

Inkhelh ṭantir lamah ruah sur ṭan a, inkhel entu tan hul hliap a awm lo. Mahse, football ngainatuten ruah doin inkhel an thlir tho. Inkhel entu zat hi hriat theih ni lo mah se Aizawl FC champion season-a Mizo club leh Mohun Bagan inkhelh ṭum aiin an tam tura ngaih a ni a. RG Stadium-a mipui pun khawm tam ber ṭum a ni thei hial ang.

MFA an lawm

Mizoram sports minister leh MFA president ni bawk Lalnghinglova Hmar (Tetea Hmar) in inkhelh hmain thu tawi fel takin a sawi a, Tetea Hmar chuan, "Infiamna kan ngaihnat avang te, kan Mizo pui leh hnamdang chhiat tawk te, kan tawrhpuina lantirna atan te, heti zat mipui kan kalkhawm hi, a lawmawm ka ti a, in za vaia chungah lawmthu ka sawi," tiin kalkhawmte chungah lawm thu a sawi.

Charity Match an buatsaih dan sawi zuiin Tetea Hmar chuan, "MPFA-a an general secretary Lallianzuala Chhangte hian message min lo thawn a, footballer-ten tih ve theih kan nei ang a ti a, kan thu a inhmu hle a ni," tiin MFA leh MPFA te thawhhona ṭhat thu a sawi a, mipui ko khawm thei chu footballer-te an nih thu a sawi bawk.

Organising chairman leh MFA finance secretary LV Lalthantluanga chuan, "Khua a chhiat tak avangin kan nghahhlelh em em ISL leh I-League Mizo player-te inkhel kan en mumal thei ta lo kha a pawi kan ti takzet. RG Stadium-ah inkhel en tuma kan la pun khawm hnem ber niin ka hria a, a uiawm hle a ni.

"Amaherawhchu kan tihchhan ber chhiat tawkte puih chungchangah chuan kan hlawhtling viauin ka hria a, sum thawhkhawm hi tun karah kan chingfel dawn a, ticket leite leh pawisa petute zawng zawng chungah lawm hle a ni," tiin Vanglaini a hrilh.

Chhum zing karah

Charity match a nih avangin chak a pawimawh ber lo a, chutihrualin GIG ISL Team leh Nexa I League Team ten chak loh an tum lo. Mahse, inkhelh ṭan aṭanga minute thumna lekah I League keeper Lalbiakhlua Jongte a chesual.

Mual vei lam aṭangin Sairuatkima'n ball a pe let a, Mohammedan SC goalkepeer Biaka'n a pet ṭhelhin goal-ah a lut. ISL-in hma an hruai nghal. Entu an ṭhahnem a, player-te pawhin an theihna tak lantir an tum tih a lang. Edmund Lalrindika a nung ṭha a, Inter Kashi forward hian mual vei lamah ball a rawn khalh nalh thei hle.

ISL lamah Lianzuala Chhangte leh Isak Vanlalruatfela ten ball an chang tam a, chance insiam bawk mah se goal an khung thei bik lo. I League lamah Mohammedan captain Adinga a khawng ve tlat a, chutihrualin ruah sur vangin ground a nal a, player tan khelh a harsa hle.

Minute 30 pawh khelh tlin hmain chhum zing vangin inkhelh chawlh a ni a, mipui tih hnual hlauh vangin chhum zing karah inkhelh chhunzawm a ni a, Zotuitlang tlangval Lalchungnunga'n a pet lut. Chhum a zin avangin thil thlen dan hmun a har.

Minute 35-naah chhum zing vangin inkhel tihtawp a ni a, an chawlh rei avangin first half a tawp nghal.

Goal mawi 2

Hun rei tak chawlh a nih hnuah second half khelh a ni a, player an inthlak bawk. Bench aṭanga rawn lut. ISL bawkin bul a ṭan ṭha a, Lalrinliana Hnamte ball pek chu Lalremtluanga Fanai-in changin Santosh Trophy-a Karnataka champion tawhtu Tluangtea ball fing chu Lallianzuala Chhangte-in a umlut.

India international forward LZ-a a tlan chak avangin I League tlarhnungin an dang hman lo a, keeper chauh a hmachhawn hnuah kawh zetin goal kilah a pet lut - goal ṭha a ni.

I League lamin si an phurh hnuah awmze neiin ball an inpe kual thei a, tlarhnung aṭanga ball inpe chhuakin an game a mawi hle. Minute 65-naah I League player-ten mawi zetin ball an inpe kual a, Jeremy Laldinpuia'n mawi zetin a hmawr a bawk. Hnahthial tlangval hian mual vei lam aṭangin a ke dinglamin goal kilah a pet lut a, keeper Thuammawia tan dan ngaihna a awm lo.

Minute 70-naah inkhel tihtawp a ni a, 2-2 in an inhnehtawk. Ruahsur leh chhum zing vangin besei ang inkhel chhawp theih a ni lo a, chutihrualin ISL leh I League player-ten theihtawp an chhuah - an fakawm hle.