Euro 2024 final tem lawkna? Spain vs Italy
European Championship 2024 group stage-a inkhel en châkawm ber thlang dawn ta ila, zanin dar 12:30-a Spain leh Italy inkhel tur hi tam zawkin kan thlang hial ang - champion beisei, player nei ṭha pahnih an intawng dawn a, men rei man a awm dawn!
Spain hian an match hmasa berah Croatia chu 3-0 ngawtin an sawp a, kawng tinrengah inkhel an thunun - an match hmasa ber aṭanga teh tur a nih chuan he team hian champion rim an nam ti ila, sawi uar lutuk kan ni lo ang.
Champion lai Italy an nep bik lo. Euro 2020 nena khaikhinin, team danglam hlak ang hiala sawi theih ni tawh mah se, an ṭhatna erawh a la kiam lo a, Luciano Spalletti hoin champion nomawi chawi an tum ngam.
Italy hian an match hmasa berah Albania chu 2-1 in an hneh a, scoreline-in game a hrilhfiah tawk lo. Inkhel thunun tak chungin Azzurri an chak a, Spain lakah pawh point thum aia tlema lungawi an tum lo ang.
Spain an ṭha
Luis de la Fuente-a'n Spain khelh dan phung langsar tak a thlak a, tun hmaa mawi taka ball in pass kual a, a tawpa a hmawr bawk ṭhin La Roja khan ball chan tam ringawt thupuiah an nei lo - 'direct' takin an khel ve tawh a, fullback an chhawr ṭangkai bawk.
Zaninah pawh Spain-in an kalphung an thlak lo ang tih a rinawm a, starting XI pawh a ngai bawk ni tura beisei an ni. Croatia lakah Rodri leh Alvaro Morata te chu hliam vangin lakchhuah ngai mah se, an dam tawh.
Chuti a nih chuan Spain hi Croatia laka an inrem dan thoin an inrem a rinawm. Unai Simon chuan si ban a nghak leh ang a, Dani Carvajal leh Marc Cucurella ten full back hna chelh lehin, tlarhnung laiah Nacho leh Robin Le Normand an ding dun leh ang.
Croatia lakah khan hliam vangin Aymeric Laporte chu a inlan thei lo a, mahse, De la Fuente-a'n player inhliam damkawr chhawr ai chuan a player rin sa chhawr chhunzawm a thlangin a rinawm.
An thiam ania!
Spain midfield en vang vang ila, zamna tham a tling. Tlarhnung venpui turin Manchester City midfielder Rodri an kawl a, Barcelona player ṭhangduang Pedri leh Paris Saint-Germain midfielder thiam zet Fabian Ruiz nen an inkawp leh ang.
Pedri thiamzia hriat sa a ni a, Rodri pawh Premier League en ṭhang tan hriat loh chi a ni lo. Kum 28 mi Ruiz hi a ṭhiante angin lar tawk lo mah se, a thiamzia chu Croatia lakah kan hmu tawh - Morata goal khung tur ṭha takin a siamsak a, Croatia tlarhnung a lam khum hnuah ṭha zetin a khung bawk.
Spain coach De la Fuente chuan, "A hming hi Fabian tih kher ni lo se la, a chanchin hi chawl loin insawi ang. Player ṭha bik neih tur zawng zawng a nei a, engtiklai pawha ṭha taka khelh dan hi a hre reng," a ti thlawt - zaninah en bik a sual lo ang.
Tlarhmaah Morata thiamzia kan hmu a, Ruiz-a siamsak khung tura a insiamrem dan leh goal khung tura a inrintawkzia kha sawi hmaih theih a ni lo. Mual sir lama amah thlawp tur Lamine Yamal hi kum 16 lek ni mah se a thiamzia hrechiangtu chu Croatia an ni a, Nico Williams a la awm cheu bawk!
Spalletti-a Italy
Italy boss Spalletti-a'n formation nghet a neih loh thu a sawi ṭhin a, an khingpui milin team a rem mai ṭhin - zaninah pawh Italy hian player an siksawi a rinawm a, Napoli boss hlui hian Spain goal nawr na tak tur chu dan chah dan a ngaihtuah dawn.
La Gazzetta dello Sport tarlan danin Spalletti-a'n Albania laka bul ṭan aṭangin player pathum siksawi a tum a, tlarhnung laiah tlanchhuah nuam ti ṭhin Riccardo Calafiori chu la chhuakin, Roma defender Gianluca Mancini chu Bologna centre back Alessandro Bastoni kawp turin a luh a rinawm.
Spalletti chuan man-marking lama ṭha tak Mancini hian striker pasang Morata a chelh theih a beisei. Midfield-ah pawh goal nawr nuam ti ṭhin pahnih Davide Frattesi leh Lorenzo Pellegrini chu a tu emaw zawk zawkin bench lamah hun an hman a ngai dawn a, defensive midfielder Bryan Cristante a lut dawn thung.
Italian media-ten Spain laka goal khung tura Gianluca Scamacca an beisei thu tarlang nasa mah se, Atalanta striker hian bul a ṭan lo mai thei. Spalletti chuan goal nawr nuam ti mi Mateo Retegui luh tir a tum - inkhelh dawna ngaihdan thlak thei erawh a ni.
Beiseina neitu
Spain-in De la Fuente hoin team thar an din mek a, khelh dan phung an thlak tel. Kum 62 mi coach hian Euro Under-19 2015 leh Euro U21 2019-ah te Spain a champion pui a, kum 2020 Olympics-ah khan U23 chu silver medal a lakpui bawk.
De la Fuente-a squad-ah age level-a a lo enkawl tawh an awm nual a, he coach hian a player-te a hrechiang hle tihna a ni tel nghal bawk - Unai Simon, Fabián Ruiz, Dani Olmo, Mikel Oyarzabal, Cucurella, Pedri leh Rodri te hi age level-ah a lo kaihruai tawh a, team boruak ṭha tak nen champion an inbeisei.
Napoli meuh Serie A nomawi chawipuitu a ni a, Spalletti-a'n champion a tum ngam hi a mak lo. He coach hian Italy kal dan phung chu thlak danglamin, tun Euro-ah pawh player upa zawk tam tak a thlauh thla a, squad naupang tak din a duh.
Spalletti hian, "Italy hian player naupang zawk, talent nei ṭha site kan chhawr lo ṭhin hle. Euro U17 leh World Cup U20 champion hlim kan ni a, talent chu a awm tih a chiang. Player naupang zawkah rinna kan nghat ngam ngai lo," a ti a, team ṭha tak din chunga Euro champion nih a tum - Spain an hneh chuan inrintawkna an nei sang sawt ang.