Zirtawpni zing aṭangin Copa America 2024: World champion Argentina an inlan dawn

Argentina hian World Cup leh Copa America nomawi an kawl mek - South American ramte inelna Copa America 2024 an match hmasa ber chu Zirtawpni zing dar 5:30 hian Mercedes-Benz Stadium, Atlanta-ah Canada nen an khel ang.

Lionel Messi leh a ṭhiante inkhel hi TV lamah chuan Sony Sports-in an live dawn a, online hmanga en duh dan Sony Liv leh Fancode aṭanga en theih a ni bawk - Mizoram aṭang chuan zing thawh hma a ngai ṭhin dawn hle a ni.

La Albiceleste hian Group A match dangah Peru leh Chile te an hmachhawn dawn bawk - June 22 zing lam dar 5:30-ah Peru leh Chile te hi an intawng ve thung dawn a, an inkhelh kual hnuah a sang pahnihin quarterfinal an lut ang.

Messi awmna

Player ropui bik Lionel Messi-a'n an ram Argentina hi World Cup leh Copa America a champion pui tawh a, club lamah nomawi chawi theih a chawi kim tawh bawk, hahdam zawka football khelh theih beiseiin United States lam a pan.

Messi hian football huangah a tih theih leh hlenchhuah tur ang a ti zo tawh niin a sawi tawh a, inkhelh erawh a la chawlhsan lo. Copa America chungchang sawiin Messi chuan, "Nomawi humhim hi a harsa dawn a, mahse thil harsa chu tih kan tum ang," a ti.

Inter Miami forward hian squad a zawm tlai hret a, inbuatsaihna an neih hnuhnung berah erawh goal hnih a khung bakah a ṭhiante khung tur a siamsak a, penalty chu Lautaro Martínez a kian bawk - naktuk zingah inritawkna sang tak nen a inlan thei dawn.

Messi hian football khawvelah a hun hnuhnung lam a hmang mek - June 24 hian kum 37 a tling dawn. A vawi hnih nan Copa America chawi a duh dawn a, coach Lionel Scaloni leh a naute hian an thei ang em, tih chu khawvel hriat châk a ni.

Inlan tura rin

Angel di Maria pawh inkhel turin a inpeih - ani hi World Cup, Copa America leh Olympic champion an nih theih nana mi pawimawh a ni a, tun ṭumah hian match a khel tluan vek lo a nih pawhin hmun pawimawh a la chang leh ngei ang.

Messi kianga khel tur hian Manchester City hmatawng Julian Alvarez a awm a, Inter Milan captain Martinez leh Manchester United forward Alejandro Garnacho an la nei bawk - tlarhma lam chu an ngaihtuahawm lo hle tura ngaih a ni.

Midfield laiah chuan Premier League lama kan hmelhriat - Chelsea midfielder Enzo Fernandez leh Liverpool ball semtu Alexis Mac Allister te an nei a, anni - pahnih tha tichak turin Rodrigo De Paul an nei bawk, ram dang tan chuan hmachhawn châkawm lo tak an ni ang.

Goalkeeper Emiliano Martinez a la awm - Aston Villa si ban nghaktu hian vanneihna a keng tel emawni tih mai tur a ni ṭhin a, tun ṭumah pawh hian Argentina innghahna pawimawh tak a ni leh ngei ang, a nungchang danglam ve tak avangin boruak a siam ṭhin bawk.

Argentina Squad:

Goalkeepers: Franco Armani, Geronimo Rulli, Emiliano Martinez.

Defenders: Gonzalo Montiel, Nahuel Molina, Cristian Romero, German Pezzella, Lucas Martinez Quarta, Nicolas Otamendi, Lisandro Martinez, Marcos Acuna, Nicolas Tagliafico.

Midfielders: Guido Rodriguez, Leandro Paredes, Alexis Mac Allister, Rodrigo De Paul, Exequiel Palacios, Enzo Fernandez, Giovani Lo Celso.

Forwards: Angel Di Maria, Valentin Carboni, Lionel Messi, Alejandro Garnacho, Nicolas Gonzalez, Lautaro Martinez, Julian Alvarez.

Canada Squad:

Goalkeepers: Maxime Crepeau, Thomas McGill, Dayne St. Clair.

Defenders: Moise Bombito, Derek Cornelius, Alphonso Davies, Luc de Fougerolles, Kyle Hiebert, Alistair Johnston, Richie Laryea, Kamal Miller.

Midfielders: Ali Ahmed, Mathieu Choiniere, Stephen Eustaquio, Ismael Kone, Jonathan Osorio, Samuel Piette.

Forwards: Theo Bair, Tajon Buchanan, Jonathan David, Junior Hoilett, Cyle Larin, Liam Millar, Tani Oluwaseyi, Jacen-Russell Rowe, Jacob Shaffelburg.