Nadal-a'n semifinal a lut

Rafael Nadal chuan Stefanos Tsitsipas hnehin ATP Finals khelh laiah semifinal a inhlangkai a, champion lai Tsitsipas erawh group stage paltlang zo loin a zinkawng a tawp thung.

Group London 2020 aṭang hian Nadal leh Dominic Thiem an tlang, nizan khan world number 1 Novak Djokovic awmna Group Tokyo 1970 lamin an group match hnuhnung ber khelin, he thu buatsaih lai hian result kan hre hman lo.

Nadal a tlang

Ningani zan inkhelah world number 2 Nadal hian 6-4, 4-6, 6-2 in hnehna a chang. Spanish tlangval hian set hnihna a khel ṭha tawk lo, a bik takin a service a na lo. Mahse huaisen taka bei letin set hnuhnung leh pawimawh a la.

Inrinni zanah Nadal hian semifinal a khel zui dawn, group lehlama hmahruaitu Daniil Medvedev a hmachhawn leh ang. Russian tlangval Medvedev-a'n group match hmasa pahnih a khelhah hnehna a chan ve ve avangin a tlang chiang tawh a ni.

Grand Slam vawi 20 champion tawh Nadal chuan, "Tihsual chu nei ve bawk mah ila ka khel ṭha thawkhat chuan ka hria," a ti. Greek tlangval lakah hian vawi 32 ngawt winners a vaw chhuak a, ṭum 13 chauh unforced errors a nei thung.

Beiseina chu

Nadal hian tennis inelna lian hrang hrangah chuan hlawhtlinna a chang deuh vek tawh, a hmabak chu ATP Finals hi a ni. A thiam pariat inelnaah hian 2010 leh 2013 khan final thleng mah se a chak lo zawkah a ṭang.

Kum 34 mi Nadal chuan, "Player ṭha ber ber hmaah pawh ṭha taka i khel thei a nih chuan lawmna tur a ni ang. Inkhel hautak leh hahthlak takah hnehna ka chang thei hi ka lawm tazket, inrintawkna min pek belh," tiin a sawi.

Nadal hian a match hnuhnung zawkah Thiem a ngam lo. Austrian tlangval hian Ningani zan khan Andrey Rublev hmachhawnin 6-2, 7-5 in a chak lo. US Open champion Thiem hi semifinal lut chiang tawh a nih avangin inkhel awmze nei lo a ni thung.



Share this Post

Login to comment
No Comments