Lalhmingliana Saiawi (76) vui liam a ni

IAS officer hlui leh lehkhabu ziaktu lar, Lalhmingliana Saiawi (76), Chaltlang chu Pathianni zan dar 12:10 khan a thi a, nimin khan vui a ni.

Thu dawn danin, Lalhmingliana Saiawi hi tun hnaiah a hriselna a ṭha tawk lo a, June 5, Pathianni tlai lam aṭangin thâwk lamah harsatna a nei a, zanah Synod Hospital panpui a nih laiin, zanlai pelh hnuah a thi.

Lalhmingliana Saiawi hian a nupui Lalthankhumi, a fate pathum - Ramdinsanga Saiawi, Ramzauva Saiawi leh Muanpuii Saiawi (IFS) leh a tute a kalsan.

Lalhmingliana Saiawi hi Janua-ry 1, 1940-ah Kawlkulhah a piang a, Mizo High School, Aizawl aṭangin kum 1955-ah first fivision-ah matric a zo a, kum 1961-ah St. Edmund’s College, Shillong aṭangin BA. a pass a ni.

Lalhmingliana hi kum 1964-ah IAS-ah inziak tlingin, Maharashtra cadre pek a ni a, IAS-ah kum nga service a la neih laiin March 1993-ah voluntary pension-in a chhuak. April 1993 aṭanga March 1998 thleng Maharashtra Administrative Tribunal member a ni a, April 1999
aṭanga December 2001 thleng Central Administrative Tribunal, Patna Bench-ah member a ni leh a; chumi hnuah Mizoramah a rawn chhuak a ni.

Lalhmingliana Saiawi hi thu ziak mi a ni a, lehkhabu 15 leh article/ essay eng emaw zat a ziak tawh. A essay ziah 'Hmangaihna' tih leh a novel 'Lungrang Laiawrha' tihte chu college-a Mizo subject zirlaiah telh a ni tawh ṭhin. A lehkhabu ziah zingah - Lungrang Lai-awrha, Lungrang Hma-ngaihna, Nukawki, Keimah Unionliana, Nukawki Fanu, A na lua leh Tawi-tawkawn Chemangi tihte a tel.

Vanglaini chanchin-bu-ah pawh article eng emaw zat a ziak tawh a; Vanglaini-in Mizo Award 2011 a sem turah pawh nominee zingah a tel a ni.