Germany-in an zia an chhuah

Euro 2016 nomawi chawi tura rin hlawh zinga mi Germany chuan Euro khelve tur tho Hungary lakah team ṭha an nihzia an pholang a, Inrinni zan khan friendly match-ah awlsam takin 2-0 in an hneh.

Veltins-Arena, Germany-a inkhel-ah Hungary defender Adam Lang chuan anmahni lamah ti lut palhin mualneitu team tan goal hmahruai a khung sak a, Thomas Muller chuan second half-ah an goal hnihna a khung ve leh bawk.

Germany coach Joachim Low-a'n karhmasa lawka Slovakia laka 3-1 a tlawm team aṭangin player a siksawi nual a, Manuel Neuer, Mesut Ozil, Toni Kroos, Benedikt Howedes leh Muller-te chu inkhel bul
ṭantir vek an ni.

Euro 2016-a an match hmasa ber June 12-a Ukraine nena khel tur Germany hian 4-2-3-1 formation hmangin Bayern Munich-a hmun chang mumal lo Mario Gotze chu striker angin chhawr a ni a, a hnungah amah thlawp turin Julian Draxler, Muller leh Mesut Ozil-te an ding tlar.

Defensive midfield-ah Sami Khedira leh Toni Kroos an inkawp a, Jerome Boateng, Benedikt Howedes, Jonas Hector leh Antonio Rudiger-te chu tlarhnung mawitu niin Euro 2016-ah Germany starting XI hi a danglam tamin a rinawm loh.

Germany tan an captain Bastian Schweinsteiger dam leh ta hi chan-chin lawmawm a ni thei a, a upat deuh tawh avangin game tichhetu a ni zawk thei bawk. Manchester United midfielder hi second half-ah khelmual chhungah tlan lutin Lukas Podolski, Andre Schurrle, Emre Can, Leroy Sane leh Mario Gomez te chuan second half-ah khelmual an mawi ve bawk.