Gattuso-a'n Ibra leh Milan a mikhual dawn

Gennaro Gattuso enkawl Napoli chuan Pathianni zan dar 1:15 hian Zlatan Ibrahimovic awmna AC Milan an mikhual dawn a, tun kar tawp Serie A inkhel ngaihven hlawh ber a ni ang.

Hmahruaitu Milan hian point 17 an nei a, manager Gattuso nauten hnehna an chang a nih chuan Milan hi an nihrual chiah ang - inkhel pawimawh bik zinga mi a ni. Italian manager hian player a nih laia vanglai a hmanna leh, manager a nih hnua enkawl tawh team hi hneh a tum dawn.

Gattuso enkawl

Season hmasa khan Gattuso kaihhruaina hnuaiah Napoli hian Coppa Italia nomawi an chawi, final a an hneh chu Juventus an ni. Nidang ang bawkin an tlarhnung rem phui ṭhin chu zaninah pawh an hmachhuan leh tur a ni ang.

Napoli hian hrileng vangin Juventus nen Serie A match an khelh tur an khel thei lo a, chak loa puan an nih bakah point khat an paihsak - khel thei ni ta se tuna an dinhmun ai hian an awmna a sang hialin a rinawm.

Gattuso chuan, "Nomawi sawi hun a la ni lo, ka naute chu dawhthei leh helhhawlh lo turin ka fuih," a ti. Champion lai Juventus hi rinkai lai ni mah se elphaktu an awm mek a, season hmasa pahnihna Inter Milan bakah AC Milan leh Napoli ten na takin 'Scudetto' an chuh dawn.

Ibra awmna

Milan coach Stefano Pioli leh assistant coach Giacomo Murelli ten Covid-19 an kai a, zaninah team an kaihruai thei dawn lo. Assistant coach pakhat zawk Daniele Bonera chuan khelmualah Milan a kaihruai ang.

Season bul an ṭan fuh theih nana mi ṭangkai Ibrahimovic chu zaninah a inlan thei dawn. Swede striker hian tun season inelna hrang hrangah match kua aṭangin goal kua a khung tawh a, league bikah match nga aṭangin goal riat a khung thei!

Zaninah pawh Ibra hi Milan hmachhuan a ni leh dawn. Tlarhnung phui vanga fak hlawh Napoli nen an in hmachhawn tur hi a hmuhnawm dawn, defender tharum ngah Kalidou Koulibaly nen an in nawk vel chu a hmuhnawm khawp ang.

Inkhel dang

Champion lai Juventus chuan zanin dar 1:15 hian Cagliari an mikhual dawn a, hun rei tak chhung hliam vanga chawl tawh Matthijs de Ligt chu khelmualah inlan thei tawh tura beisei a ni.

Kum 36 mi Giorgio Chiellini leh kum 33 mi Leonardo Bonucci te dam mah se an vanglai a pel tawh a, match zawng zawnga inlan tur chuan an tha in a tlin chiah tawh lo - Dutch rawlthar De Ligt hi Andre Pirlo-a'n a mamawh.

Portugal tana feh chhuak Cristiano Ronaldo chu inkhel turin Turin khawpuiah a kir leh tawh. Real Madrid forward hi zin chau viau mah se league match khel chhunzawm nghal tura ngaih a ni bawk.



Share this Post

Login to comment
No Comments