Inzir nan kan hman a ṭul - Low

Germany-in kum 2020 atana an match hnuhnung berah Spain 6-0 in an hneh lo a, Nations League finals an thleng pha lo bawk.

Kum 89 chhunga Germany chak loh chian ber ṭum a ni a, coach Joachim Low chuan, "Kan tan chuan mangchhia a ni a, a dik lo vel vek. Pawi kan ti a, kan thinrim bawk. Mimal anga inmawhchhiat theih a ni lo a, Spain khan kan chak lohna takah zel min rawn chhu let a ni," tiin a sawi. 

Germany hi nakkum March-ah chauh an inkhel leh dawn a, Low-a'n a tihsualna en let hun ṭha tak a nei dawn. Low chuan, "Euro atana player thlan dan tur sawi lawk theih a ni lo. Ka player-te hi ka ringtawk a, thui tak min thlenpui turin an ṭha tawk tih ka hria," tiin player thlan dan tur chungchanga zawhna a chhang. 

Low hian World Cup 1998 zawhah Bayern Munich player pawimawh Thomas Muller leh Jerome Boateng te bakah Borussia Dortmund defender Mats Hummels te a thlan tawh loh tur thu a sawi.

Tunah erawh a inngaihtuah ṭhat a ṭul dawn. Captain  Manuel Neuer meuh pawhin, "Player pathum hian kan thil tum hi min hlawhtlinpui thei tih an khelh tawh danah an lantir. An pathum hian ram tana inkhelh an la chawlhsan lo," tiin Joachim Low-a'n a ngaihdan thlak se a tih thu a sawi.

Zanin dar 8:00 hian Bayern-in Werder Bremen an mikhual dawn a, Muller leh Boateng ten en bik an hlawh ang. Borussia Dortmund-in zanin dar 1:00-ah Hertha Berlin an tlawh dawn a, Hummels a inlan ngei  a rinawm. German player pathum hi ram tana koh an nih loh avangin hahdamna hun ṭha an nei a, an che ṭha a nih chuan media lamin Joachim Low chuk nan an hmang ang.



Share this Post

Login to comment
No Comments