Vanglaini - Ami'z'os an inlan kim thei dawn lo

KHAWTHLIR

Hnam dang truck phalsak rih lo

Champhai Import-Export Transport Forum (CEITU), Mizoram Export-Import Union, Importer Exporter Syndicate, MTOA leh MTDA-te November 19, 2020-a ṭhukhawm chuan, Covid-19 hripui laka mipui an him zawk nan hnam dang truck-te'n kumin chhung chuan Champhai aṭangin bungrua phur chhuak ve tawh rih lo se, an ti.

Inhlawhna siamsak

Aizawl North-II MLA Dr Vanlalthlana chuan Covid-19 lockdown avanga a bial chhunga khawsak harsa zawkte tan inhlawhna a siamsak. Covid-19 léng vanga sorkarin inkhàrkhip a kalpui a ngai a, mi tam takin hna thawk thei loin harsatna an tawh avangin, MLA hian a biala chhungkaw 200 chuang tan inhlawhna a siamsak a; thlànmual leh veng chhung hmun ṭhenkhat tihfai a ni.

SRH-ah mi 45 awm

State Referral Hospital-ah nimin khan Covid-19 vei mi pakhat dah luh a ni a, ani nen mi 45 an awm mek a, an zingah kum 60 chung lam mi 16 an tel. SRH-ZMC Bulletin tarlan danin, mi 45 zinga pathum chu ICU-ah enkawl an ni a, mi dang zawng chu Isolation ward-ah an awm a ni.

Journalist thi rál

Chanchinbumi July 14, 2020-a thi Francis Paul (Gerrard-a Pa) chhungte hnenah Mizoram sorkarin a ràlna Rs. 1,00,000 chu nimin khan IPR director Lallianpuii'n Mizoram Journalist Welfare Society kaltlangin a hlàn. Ràlna inhlanna hi IPR Director pisaah neih a ni a, MJA hruaitute an tel. Francis Paul hi Doordarshan Kendra, Aizawla sports magazine buatsaihtu ṭhin a ni a, MJA member a ni.

Complaint tum

ZPM chuan, January 16, 2020-a Tripura leh Mizoram sorkarin Ministry of Home Affairs kaihhruainaa inremna an siam tawh hnu pawha Tripura-a khawsa zui ta Bru-te Mizoram Electoral Roll aṭanga tun thlenga paih an la nih loh avangin Election Commission of India-ah complaint thehluh an tum thu an tarlang. ZPM hian ECI-a zualkona hi Mizoram Chief Electoral Officer kaltlangin November 23, 2020-ah thehluh an tum a ni.

DAWNTISEI

Ami'z'os an inlan kim thei dawn lo

NorthEast United-in zanin dar 7:30-ah tun season Indian Super League-a an match hmasa ber an khel dawn a, Mumbai City an mikhual dawn.

Highlander hi Mizo awm tamna squad a ni a, 'Ami'z'os' tia hminglem an pek midfielder Lalengmawia (Apuia), Lalrempuia Fanai, Lakhawpuimawia (Mapuia) leh Rochharzela-te an kawl.

Mahse, Mizo player pali hi zaninah an inlan kim thei dawn lo. Highlander hian tun hnaiah an squad-a player pahnihin Covid-19 an kai thu an puang a, hming tarlan loh player pahnih hnaihtu zingah Mapuia leh Rochharzela an tel.

Mapuia chuan, "Covid-19 kai player-te nen kan lo inkawm hnai deuh a, hei vang hian Rochharzela nen khunghran zingah kan tel rih a, kan inlan thei dawn lo," tiin Vanglaini a hrilh.

Mumbai City-ah hian Hmingthanmawia (Valpuia) chu Mizo awmchhun a ni a, bul a ṭan erawh a beiseiawm loh.

Pathianni zan dar 7:30-ah FC Goa-in Bengaluru an mikhual dawn a, FC Goa-in Mizo player kawl an neih loh laiin Bangalore club-ah erawh Mizo pali an awm thung.

Bengaluru hian goalkeeper Lalthuammawia Ralte, striker Edmund Lalrindika, defender Joe Zoherliana, leh midfielder Emanuel Lalchhanchhuaha te an kawl mek.

Share this Post

Login to comment

No Comments