Golden State Warriors star guard Klay Thompson chu training an neih laiin a ke artui a hliam a, season thar lo awm tur chu a inkhelh theih a beiseiawm loh niin GSW chuan an puang.

Kum 30 mi Thompson hi Nilaini khan California chhim lama an insawizawina lamah a inhliam, Ningani khan a hliam hi endik niin hun rei tak chhung a chawlh tur thu hi tihchian a ni.

Season liam ta pawh khan Thompson hi a inlan lo, 2019 NBA Finals khan a khup a hliam vangin season a hmang thei lo chhunzawm. Beiseina sang tak nen season thar khelh tum mah se hliam vang bawkin a buai nawn dawn.

Thompson-a agent Greg Lawrence chuan, "Kay hi pa rilru khauh tak a ni, chutihrualin atan chuan hun harsa tak a ni mek," a ti. Warriors general manager Bob Myers pawhin an player duhlai hliam chu pawi an tih thu a sawi bawk.

Season hmasa khan Golden State hian Thompson bakah an thiampuipa Stephen Curry chu hliam vangin an chhawr thei lo. Regular season bikah vawi 15 chauh hnehna changin Western Conference table mawngphah luahtu an ni.

Steve Kerr-a'n a team hi thawh chhuah pui ngei a tum. December 22 aṭangin 2020-21 season an ṭan dawn a, season dang aiin match an khel tlem dawn. Hrileng vanga buaina a awm a nih chuan an ruahmanna siamsa pawh tih danglam leh theih a ni ang.

---

Share this Post