Chelsea eng nge an an zel dawn?

Chelsea-in Manchester United nen goal awm loa an inhnehtawk hnuah match li an khel leh tawh a, chiang takin an chak vek. Blues hian vawi thum clean sheet an nei a, goal 14 khungin goal khat chiah an chhuah.

Frank Lampard-a hote chet ṭhat vanglai takin international break a awm a, an che ṭha tluang hi a ti buai ang em tih chu zaninah chhanin a awm ang. Chelsea hian zanin dar 6:00-ah St James Park tlawhin Newcastle United an hmachhawn dawn a, attacking football hmuhnawm a beisei ngam ang.

Blues player-te ram tana an fehchuahnaah an che ṭha hle. Hakim Ziyech-a'n Morocco tan goal thum leh assist vawi hnih a nei a, Timo Werner (Germany), Olivier Giroud (France) leh Mateo Kovacic (Croatia) ten goal hnih ṭheuh an khung. 

Midfielder pathum Mason Mount (England), N'Golo Kante (France) leh Jorginho (Italy) ten goal khat ṭheuh an khung a, Callum Hudson-Odoi pawhin England Under 21 tan goal hnih leh assist vawi hnih a nei bawk. Chelsea tlarhnung siam ṭhatu pahnih Thiago Silva (Brazil) leh keeper Edouard Mendy (Senegal) te match hnih ve ve an clean sheet a, an record thlir hian Blues hi point thumin a hmuak a tih theih.

Amaherawhchu Newcastle hian an mualah chuan Chelsea hi an ngam hle. St James Park-a Premier League match hnu hnung pasariha an inhmachhawnah vawi khat chauh chak loin vawi nga an chak. Magpies hian an match hnuhnung berah Southampton hneh lo mah se Everton an hneh bakah Wolves an chelh tawh a, Lampard-a hote tan fimkhur a ṭul ang.



Share this Post

Login to comment
No Comments