French Open Serena ngamtu Muguruza a champion

Spain nula Garbine Muguruza chuan a Grand Slam title hmasa ber chawi turin champion lai Serena Williams chu straight set a hnehin French Open champion nomawi a chawi.

Inrinni zan khan Philippe chatrier court-ah hmeichhe single final hi khelh niin seeded palina Muguruza hian world number 1 Serena lakah hian 7-5, 6-4 in hnehna a chang a, Spain nula zingah kum 1988-a Arantxa Sanchez-Vicario a champion hnuah Roland Garros-a hlawhtlinna chang leh thei hmasa ber a ni.

Nikum Wimbledon final-ah khan anni pahnih hi an lo inhmachhawn tawh a, Serena hian hnehna a chang. Kuminah erawh kum 22-a upa Muguruza hian ani aia kum 12 zeta upa lakah hnehna a chang let ve leh ta a ni.

A phu e...

Kum 1993-a piang chauh ni mah se Muguruza hian kumin French Open-ah player ṭha a nih zia a pholang chiang hle. A match hmasa berah Anna-Karolina Schmiedlova lakah set hmasa ber hloh nghal mah se final thleng hian set a hloh zui tawh lo!

Final-ah hian tunlai khaw-vela hmeichhe tennis roreltu, player dang zawng zawngin hmachhawn an chak loh leh an ṭih Serena lakah pawh a zam lo. Kum 1990 china piang zingah Wimbledon vawi hnih champion tawh Petra Kvitova leh Muguruza te chauh hi major tournament-a hlawhtling thei an la ni rih.

Clay court-a final a vawi khat khelhnaa champion nghal thei Muguruza hi a kum la tam lo deuh mah se a rilru a paukhauh a, Serena-in championship point ṭum li ngawt a tihkhawtlai hnuah pawh a buai phah lo. A hunah tharum a hmang thei a, baseline aṭangin ball na tak taka a vuak theih bakah dinhmun
ṭha zawka a din laiin a phili buai lo bawk a, French Open champion nih hi a phu hle.

A champion vanga a lawm--thu sawiin Muguruza chuan, "Final-a player ṭha bik hmachhawn theih hi chu a entu leh a kheltu tan pawh duhthusam a ni, kan inkhelh chhung zawng khan thildang engmah ka ngaihtuah buai hman lo a, engtiangin nge point ka hmuh theih ang tih chiah ka ngaihtuah. Spain-ah chuan Grand Slam pali zingah Roland Garros hi kan ngaihsan leh dah chungnun ber a nih avangin he hmuna ka champion thei hi ka lawm tak zet a, min ṭan tura lo kal khawm zawng zawng chungah ka lawm tak zet zet bawk a ni," tiin a sawi.

Serena hun a tawp?

Grand Slam vawi khat cham-pion pawh thil harsa leh intihtheih pui tham a nih laiin kum 24-a upa Serena hi chu ṭum 21 zet a champion tawh thung. Mahse, vawi 22 champion tawh Steffi Graf record erawh ala tluk thei rih lo.

American star Serena hian kum 1999 aṭang khan Grand Slam final vawi 27 tehmeuh a khel tawh a, heng zianga parukah chiah a chak lo zawkah a ṭang. Mahse, tun hnaia an khelh hnuhnung pathumah erawh a champion zo lo vek.

Nikum khan Serena hi Australian Open, French Open leh Wimbledon-ah te a champion a, US Open-ah erawh final a lut lo thung. A kum tam deuh tawh mah se a taksa a la fit ṭhat avangin mi tam tak chuan Steffi Graf record pawh a khum theih ngei an ring. Amaherawhchu, Serena hian hliam neuh neuh a tawrh ve fo bakah tun hma angin a khel ṭha tawk thei tawh lo a, Australian Open final-ah Angelique Kerber a hneh loh hnuin French Open nomawi a hloh leh phawt.

Serena chuan Muguruza a lawmpui thu sawiin , "Cham-pion tur khelhin ka khel chhuak zo lo a, set khatnaah kha chuan inbei tawk viau mah ila set hnuhnung zawkah erawh Muguruza khan champion phu zawk khawpin a khel ṭha a, ka lawmpui hle," tiin vawi thum a lo champion tawhna hmuna champion thar chu a lawmpui thu a sawi.

Khawvel tennis hmeichhe player zinga tharum ngah leh tawnhriat ngah berte zinga mi Serena hi a kum a tam ve deuh ta tih chu hai rual a ni lo, kumin French Open-ah pawh hian malpui na vangin harsatna tawk mah se a khel lui tho. A taksa a hrisel ṭha a nih phawt chuan ani aia naupang leh hnuhma nei tam lo zawkte hneh thei turin theihna a la nei a, a rawn tho chhuak leh thei ang em? tih chu thla leha khelh tur Wimbledon-ah a hriat ang.

Nizan khan mipa single final khelh a ni a, world number 1 Novak Djokovic leh champion lai Stan Wawrinka hnehtu Andy Murray te an inhmachhawn a, he thu buatsaih lai hian result kan hre hman lo thung.