NESO ten hmarchhak state-ah ILP hman vek an duh

North East Students’ Organization chuan Inrinni khan thuchhiah siamin, sorkar laipui chu hmarchhak huam chhunga Inner Line Permit hman mekna te chu ennawn tur leh, ILP chu hmarchhak state zawng zawngah hman vek an duh thu an sawi.

NESO te hian he mi chungchangah hian Meghalaya Governor hnenah memorandum an thehlut a ni. NESO member V Shanmuganathan chuan Meghalaya state Governor hnena an memorandum thehluh ang chiah hi, hmarchhak state zawng zawnga Governor te hnenah pek a nih tur thu a sawi. Memorandum-ah hian Prime Minister Narendra Modi chu Armed Forces (Special Powers) Act, 1958 hlip tura an ngen thu an ziak tel bawk.

NESO president Samuel Jyrwa chuan, “Minority community te chimral an nih lohna tur leh an dinchhuah theih nana ṭanpui chu India danpui pawhin a remti ti a, humhalh bik ngai hmarchhak state-a hnam hrang hrangte tan 'special constitutional status' siam a ṭul tak zet a ni,a ti.

Sorkar laipui chu Central office leh institution hrang hrang hmarchhak huam chhunga awmah te hna lak a nihin, chung office awmna state-a mite tan chuan 100% reservation siam nise an duh tih NESO chuan an sawi. Heng bakah hian National Register of Citizens (NRC) chu hmarchhak state zawng zawngah kalpui tura an duh thu an sawi bawk. National Register of Citizens (NRC) hi hmarchhak state Assam-ah chuan kalpui mek a ni.

NDA sorkarin a kalpui mek ‘Act East Policy’ chu chak zawka kalpui nise an duh thu North East Students’ Organization te chuan an tarlang bawk. Jyrwa chuan,"Act East Policy chu tun dinhmunah hmarchhak state-te chu ramdang nena inthlunzawmna kawngah a luhka chauhah hman a ni" a ti. Jyrwa chuan Governor hnnea an memorandum thehluh chuan Prime Minister beng a thlen ngei an duh thu a sawi bawk.