Man City-ah Guardiola a nghet Zaninah Spurs Vs Man City

Manchester City-in manager ṭha bik Pep Guardiola an chelh. Spanish manager hian kum hnih dang contact ziakin Etihad Stadium-ah kum 2023 thleng a cham dawn a, Premier League-ah Lionel Messi hmu thuai tura inngaitu pawh an tam nghal hle. 

Khawvel player ṭha ber ti hiala an chhal ṭhin Messi chungchang hi chu thuthang chauh a ni a, thuchiang erawh zanin dar 11:00 hian Guardiola enkawl Man City-in Jose Mourinho kaihhruai Tottenham Hostpur an tlawh dawn.

Manager pahnih hi La Liga aṭanga inhal tawh an ni a, Man City chungah Spurs an awm lehzel bawk nen, zanin inkhel tur hi a chhehvel nen lam a ngaihnawm vel vek a ni.

City manager Pep

Pep Guardiola hian club pakhat a enkawl rei ngai lo, bul a ṭanna Barcelona-ah pawh season li chhung chauh a cham. German club ropui ber Bayern Munich enkawl lehin kum thum hnuah chona thar hmachhawnin Man City a zawm.

Spanish manager hian a contract neih ang hi a hmang zo a nih chuan kum sarih a cham dawn tihna a ni a, Barcelona leh Bayern aiin hun a hmang rei zawk dawn.

Pep hi Man City chhuahsan tur anga sawi a awm ṭhin a, amaherawhchu Spanish football hrechiangtu Guillem Balague chuan chhuah tumna a neih ngai loh thu a sawi.

Balague chuan, "Juventus, Paris St-Germain leh club dang aṭangin sawmna chu a hmu ngei a, amaherawhchu Man City-ah a hlim miau avangin chhuah tumna a nei ngai lo.

"City-a a thawpuite a ringtawk a, team kaihhruai chungchangah thuneihna a nei a, Bayern leh Barcelona angin dressing room-a thil thleng hmun dangah a chhuak ngai lo," tiin Pep-a dinhmun a sawifiah.

Man City hian Guardiola hnuaiah hian match 245-ah match 181 an chak a, an chak percentage hi 73.87%. a tling pha. Spanish manager chuan, "Beng sikin kan ngaihtuah a, keimah leh club tan contract ka ziah hi a ṭha zawkah kan ngai. 

"Chairman vangin contract ka pawtsei tihin a sawi theih a, kan inbiaknaa a thusawi khan hma kan sawn zel theih rinna lian tak min pe. Hma chhawp zawh loh kan nei a, hna ka la neiah ka ngai," tiin a sawi.

Messi hming a ri

Nakkum January 24-ah Barcelona-in president thlanna an nei dawn a, Guardiola lak let hi Catalan club president nih tumte au hla pakhat a ni. Amaherawhchu Pep-a'n contract a pawhsei takah chuan campaign au hla atan a hming lam rik a rem tawh lo ang a, Lionel Messi chelh chu au hla ṭha zawk a ni thei ang.

Kumin nipui bazarah Argentine forward Messi-a'n chhuah a tum a, thuthang a ni lo - thil tak tak a ni. Messi-a'n Catalan club a chhuahsan loh chhan hi amah siam liantu a club hmangaih hi court-ah a khing theih loh vang a ni a, nakkum nipui transfer-ah chuan a chhuah ngei an ring.

Messi hian Man City a zawm chuan Pep Guardiola leh Sergio Aguero te contract pawhsei a ngiat tih a sawi Guardiola-a'n contract a pawt sei a, thuthang hi a dik a nih chuan Premier League-ah Leo kan hmuh hmel ta hle.

Guardiola hian chairman Khaldoon Al Mubarak nen an inbiak hnuah a rilru a hmin thlap thu a sawi a, Man City hotute hian Messi lakluh an tiama ngaitu an awm bawk. 

Spanish manager hnuaia Messi-a'n season a hman tluan hnuhnung berah Argentine forward hian match 60 khelin goal 73 a khung a, assist vawi 33 a nei. Hemi a nih avang hian Messi hian Barca hi a chhuahsan a nih chuan Man City bak pan tur a nei loah a ngaih theih.

Manager ṭha rual

Kum 49 mi Pep awm hnuah English football kalhmang a inthlak a, Liverpool manager Jurgen Klopp nena inelna boruak nung ṭha tak chuan Premier League a ti hmuhnawm hle. Klopp hian kum 2024 thleng Reds-ah contract a nei a, hun engemaw ti chhung chu an an inel chhunzawm dawn.

Premier League-ah khawvel manager ṭhaa chhiar phak Marcelo Bielsa, Jurgen Klopp, Jose Mourinho leh Carlo Ancelotti te bakah Mizo chhungkaw nawlpuiin TV an neih hnua vanglai hmang Frank Lampard, Ole Gunnar Solskjaer leh Mikael Arteta te an awm a, English football a vul zel dawn.



Share this Post

Login to comment
No Comments