2016 NBA Finals Golden State Warriors vs Cleveland Cavaliers
Basketball ngainatute hmuh chak leh en chak, kum tluana an lo nghahfak chu a hun a thleng dawn ta! Golden State Warriors leh Cleveland Cavaliers te chuan Zirtawpni zing dar 6:30 hian Oracle Arena, Oakland-ah National Bas-ketball Association (NBA) Finals 2016 Game 1 an khel ang.
June 16, 2015 khan Warriors hian NBA Finals Game 6-ah Cavaliers hnehin series 4-2 in an lo la tawh. Nikum final-ah hian Cleveland hian game hmasa pathumah vawi hnih hnehna chang thei mah se Golden State hian game li ngawt la zawnin an champion. NBA chanchina player ropui an sawi apianga an sawi hmaih tawh loh tur LeBron James leh Stephen Curry te inhmachhawn tur hi khawvelin a hmu chak tawh.
NBA Finals hi
National Basketball Asso-cia-tion Finals hi Western leh Eastern Conference champion ten best of seven series hmangin an khel ṭhin. Champion hnem ber chu Boston Celtics niin vawi 17 an champion tawh a, an hnuaiah hian Los Angeles Lakers (16), Chicago Bulls (6) leh San Antonio Spurs (5) te an awm. Golden State Warriors hi vawi li champion tawhin kumin final-a an hmachhawn tur Cleveland Cavaliers erawhin ṭum hnih final hi khel ve tawh mah se an la champion lo thung.
Team ṭha pahnih
Western Conference cham-pion Golden State hian an vanglai an tawng mek a, regular season-ah match 82 an khelh aṭanga ṭum 73 zet hnehna changin regular season khat chhunga hnehna chang hnem ber record thar an siam. Michael Jordan leh Scottie Pippen te vanglaia Chicago Bulls-in kum 1995-96 a record an lo siam tawh vawi 72 hnehna chan theih chu an rawn khum! Playoff-ah duhthusama ṭhain khel lo mah se Conference Finals-ah Oklahoma City Thunder chu 4-3 in an hneh hram a, NBA playoff chanchinah 3-1 a an hnufual hnuah hnehna chang let thei team 10-na chiah an ni.
Eastern Conference cham-pion Cleveland hi regular season-ah vawi 57 hnehna changin ṭum 25 an chak lo thung. Playoff-ah erawh beisei ang ngeiin an khel ṭha a, an match hmasa 10-ah hnehna an chang vek! Kum 1989 leh 2001 khan Los Angeles Lakers chuan playoff match hmasa 11-ah hnehna an lo chang zawn tawh a, Cleveland hian Lakers record nihrual theihna hun nei mah se Conference Finals Game 3-ah Toronto Raptors chuan 99-84 in an lo tih tawp sak. Mahse, Cleveland hian 4-2 in series an la ta tho.
James vs Curry
American Power forward James hi team khaidingtu leh chakna thahrui a nihzia chu inhrilh nawn fo a ngai lo. James hian Miami Heat chu NBA Finals ṭum li a khelh pui hnuah Cleveland hi zawmin a zawnin final a hruai thleng leh ta a, NBA Finals a zawnin kum ruk a khel dawn tihna a ni.
Kum 31-a upa James hi NBA chanchina player ropui berte zing ami a ni tawh chiang a, NBA Most Valuable Player Awards ṭum li (2009, 2010, 2012, 2013) bakah NBA Finals MVP Awards vawi hnih (2012, 2013) a dawng tawh bawk.
Golden State point guard Curry hi basketball chauh pawh ni loin infiamna khawvel pumpui thlir pawhin a langsar ber pawl a ni phak. Kuminah a vawi hnih nan NBA MVP atan thlan a ni a, NBA chanchinah Curry hi he chawimawina a zawna dawng thei 11-na niin Curry chiah hi vote thlak-tu 131 ten inlungrual taka pakhat-na dinhmun luah tura an thlanchhuah hmasak ber a ni hial.
Nikum October leh Novem-ber bakah kumin February khan Golden State Warriors tana player pawimawh ber Curry hian Western Conference Player of the Month chawimawina a lo dawng tawh bawk a, season khat chhunga he chawimawina ṭum thum dawng thei hmasa ber a ni bawk.