BRICS Games-ah Mizo tlangval

Ram hrang hrang pakua - Brazil, Russia, India, China, South Africa, Iran, Egypt, Ethiopia leh United Arab Emirates te buatsaih BRICS Games 2024-ah Hmangaihsangpuia a tel dawn.

Kawrtethawveng Tlangval, tuna Bungkawn Veng, Aizawla cheng mek Hmangaihsangpuia hi Karate khel tur a ni a, India aiawhin Senior -67 kg category-ah a inlan dawn a ni.

Sangpuia hian Sports Authority of India, Mission Vengthlangah kum 2009 aṭang khan training neiin National level-ah gold medal eng emaw zat a lo hlawh chhuak tawh a. Commonwealth Championship-ah pawh gold medal a la tawh.

Asian Games 2023 Hangzhou, China a neihah khan Sangpuia hi a lo tling tawh a, mahse Indian National Karate Team kha tirh an ni lo a, a kal thei ta lo a ni.

Nimin khan Delhi aṭangin Moscow panin an chhuak a, zan lamah Moscow aṭangin inelna neihna tur Kazan an pan nghal dawn a ni. India hian Karate Discipline bikah mi 8 tirin; Indian Contingent hi mi 123 an ni.