July thlaah Mizoram Premier League Season 11

Mizoram Football Association chuan hruaitu thar an neih hnuah 2024-25 Season atana MFA Executive Committee Meeting hmasa ber chu June 3, Thawhṭanni khan an nei a, ruahmanna ṭhahnem tak an neih zinga langsar ber chu Mizoram Premier League Season 11 ṭan hun a ni.

Mizoram chhunga football inelna sang ber MPL11 chu July thla kar hnihnaah khelh tum a ni a, kum dang aiin a hma dawn. Kum dangah chuan I Day Football tournament zawhah neih ṭhin a ni a, September thlatirah neih a ni tlangpui. Tuna thutlukna hian tualchhung football kalhmang a tidanglam ang.

Eng nge a chhan?

AIFF chuan 2024-25 season atan competion calendar a tichhuak tawh. Santosh Trophy group stage chu November 5 - November 15, 2024-ah khelh tur a ni a, final round chu December 1 - December 15, 2024-ah khelh a ni dawn bawk.

AIFF ruahmannaah hian I League chu October 19, 2024 - April 30, 2025 chhunga khelh tur a ni bawk. Aizawl FC-in I League an khelh avangin MPL-ah harsatna an tawk ṭhin.

MFA honorary secretary thar Lalrengpuia chuan, "Mizoramin football hmanga ram pum huap inelnaa result ṭha neih hi kan duh a, chumi tur chuan AIFF calendar mila kan inher rem ve hi a ṭul. Santosh Trophy awm laiin MPL khelh ngaihna a awm lo a, I League vanga Aizawl FC harsatna hi kan hrethiam bawk. Tun season-ah club-te harsatna sut kian dan kan zawng a ni," tiin Vanglaini a hrilh.

Mizoram hian Santosh Trophy hnuhnung berah semifinal an lut a, National Games khel turin an tling. 38th National Games of India hi Dehradun-ah nghah tur a ni a, official-in inelna neih hun hi la tihchian ni chiah lo mah se October 26 - November 9, 2024-a neih tur niin national media lamin an ziak. MPL hi ṭan hma a, zawh hma theih a nih chuan National Games vanga buaina sut kian a ni bawk ang.

Transfer a nghawng

MPL11-ah Mizoram Police, Chanmari FC, Chhinga Veng FC, Chawnpui FC, Aizawl FC leh Electric Veng FC te an la awm chhunzawm dawn a, MPL Qualifier aṭangin FC Bethlehem an rawn kir. MPL Playoff-ah SYS FC-in Kolasib club Project Veng FC hnehin Lunglei club hi MPL11 khel turin an tling bawk.

MPL ṭan hmain chanchin ngaihnawm tak tak la awm tura ngaih a ni a, MPL champion tawh zinga mi pakhat chuan neitu thar an neih a rinawm a, club hming pawh an thlak ang.

Hetihlai hian MPL hmasa ber aṭanga tun thlenga la awm Chanmari FC leh Aizawl FC te chu champion rinkai zinga mi an la ni zel dawn. Chanmari FC chuan March 25, Thawhṭanni khan coach atan MPL history-a coach hlawhtling ber Lalsangzuala Hmar an lakluh thu an puang tawh.

Chanmari FC hian champion ngei tumin player an zawnna a rei tawh a, chutihrualin champion lai Mizoram Police FC leh champion ngun ber Aizawl FC ten nomawi chawi leh turin player ṭha an lakluh a ṭul dawn. July thla aṭanga MPL ṭan a nih dawn avangin tualchhung bazar a nung ṭan nghal a, player-te pawhin season ṭan phat aṭanga ṭha thei ang bera an khelh theih nan mimalin training an bei ngawrh viau hlawm bawk.