Eithad Stadium-ah Arteta a kir dawn Inkhel turin Sergio Aguero a dam tawh

Arsenal manager Mikhel Arteta chu team enkawl tura a inchher hriamna hmun Etihad Stadium-ah zanin dar 10:00 hian a kir dawn a, a club hlui Manchester City nen Premier League match pawimawh an khel ang.

Man City lam hian tun season chhunga a vawi khat nan Sergio Aguero chu chhawr theih an inbeisei a, Gunners erawhin an player thar Thomas Partey erawh an chhawr a la rinawm chiah loh thung a ni.

Tierney a chiang lo

Arsenal defender Kieran Tierney dinhmun a chiang lo, Scotland international hi ram tana a feh chhuahna lamah coronavirus kai nen an inhnimhnaih vangin khung hran a ngai a, hri erawh a kai lo - City a hmachhawn thei ngei dawn em tih erawh sawi theih a la ni lo.

Arteta chuan, "Thuneitu lamin dan leh hrai an siam a, zawm a ngai ang. Premier League thuneitu lam nen kan inbia a, an remtih ngei ka ring, a inkhelh theih pawh ka beisei," tiin a sawi.

Tierney hi season kal laiah Gunners tlarhnunga player pawimawh ber pakhat a ni a, a inlan thei lo a nih chuan Arteta tan channa lian tak a ni dawn. A inlan thei a nih erawh chuan David Luiz leh Gabriel te nen an inkawp leh ang.

Partey chungchang zawhna chhang zuiin Arteta chuan, "A rawn thleng hlim ve chiah a ni a, training pawh a nei ṭan ve chauh a ni. Chutih rualin club nen hian engkim a inrem nghal vek a, kan lakluh khan fit sa a ni bawk," a ti. Atletico Madrid midfielder hlui hian City a hmachawn thut mai thei.

Pep-a zirlai

Mikel Arteta hi Pep Guardiola hnuaiah assistant coach a ni ṭhin, a zirlai (student) hlui tih pawhin a sawi theih. Tunah chuan Arteta hi manager puitling a ni tawh a, season hmasa khan FA Cup an chawi theih nan amah zirtirtu hi a hneh hial.

Arteta chuan, "Manager dang nen kan la thawkdun ngai lo a, chuvangin an chanchin ka hre tam lo. Pep erawh season li chhung kan inzui tawh a, harsatna thleng thei hrang hrang hmachhawn dan kan lo zir dun tawh, chungah chuan manager ṭha tak a ni tih ka hria.

"Mahse team enkawl hna hi pawn lam aṭanga thawh zawh vek theih a ni lo, khelmual chhungah player ten eng angin nge an hlen chhuah tih pawh a pawimawh. City hian season bul ṭan fuh tawk lo mah se tu team mah hmachhawn châk an ni lo," tiin fimkhur a pawimawh thu a sawi.

Aguero a dam

A khup hliam zai a nih vangin tun season-ah Sergio Aguero hmel kan la hmu lo, tunah chuan Argentine striker hi a dam tawh. Beisei anga season bul ṭan fuh lo City tan Aguero dam ta hi chanchin ṭha a ni a, zaninah inkhel bul a ṭan lo a nih pawhin mamawh hunah a chhawr theih ang.

Pep Guardiola naute hi Leicester City lakah 5-2 in an mualpho a, kai thar Leedes United nen 1-1 in an inhnehtawk leh bawk. Season hmasa ang bawkin an tlarhnung a phui lo, an tlarhma lam an bil tel bawk hi an buaina tizualtu a ni.

City tana league match 263 a khelh aṭanga goal 180 khung thei Aguero a awm a nih erawh chuan an buaina hi chinfel a nih a rinawm, chutih rualin Aguero hian match pangngai a khelh lohna a rei deuh tawh avangin a dinhmun tur tak hriatthiam a har.

KDB leh Sterling

David Silva awm loh hnuah Kevin De Bruyne mawhphurhna a sang zual a, forward Raheem Sterling pawimawhna a la pangngai reng bawk. Belgium leh England international hian hliam tenau an nei a, an ram squad aṭangin an inghnukdawk - Arsenal lakah an inlan a nih pawhin 100% chu an ni lo mai thei.

Man City tana chanchin lawmawm pakhat chu Bernardo Silva a ni. Portugal international hi season tir lamah coronavirus vangin a inlan thei lo, tunah erawh dam tawhin ram tan pawh ṭha takin a inkhel leh tawh; Gunners tlarhnung chhaih buai turin a hriam tawk.

Guardiola-a'n tlarhnung laiah Aymeric Laporte leh Ruben Dias te a inkawptir a rinawm a, defender pahnih hi champion pui turin an rintlak takzet em tih chu zanin hian fiahin a awm ang - a sirah Kyle Walker leh Benjamin Mendy te an awm bawk a, an inkawp rem chuan paltlang an harsa dawn.



Share this Post

Login to comment
No Comments