Fenerbahce-in Mourinho an tlangzarh - a ngaihnawm nghal!

Mi 50,000 chuang lenna Sukru Saracoglu Stadium khat hmurin fans an pungkhawm a, inkhel hmuhnawm a awm vang erawh a ni lo - Fenerbahce coach thar atana lakluh Jose Mouruinho tlangzarh inkhawm a nih vang a ni.

Fans an haw haw dur dur reng a, an club flag an vai a, ṭhenkhatin halmawi an hal bawk. A lan dan maiah chuan inkhel hmuhnawm tak en tur awm ang mai a ni a, hei hian Jose Mourinho ropuizia a hrilhfiah a, tun hma phak tawh lo mah se, ngaihhlut a la hlawh reng tih a pholang.

Mourinho hian, "He club jersey hi ka tisaa bet ang mai a ni ta," tiin mawi takin ṭawngkam a chhep a, Turkish club ṭantute thawm chu ring tak a ni - 'The Special One' hi a lo la 'special' reng mai.

Kum 61 mi Mourinho hi January thla khan Serie A club AS Roma chuan a hna aṭangin an ban a, club dang nei loa a awm reng hnuah Turkey lam a pan ta - Turkish football-in ngaihven a hlawh leh sawt ang.

Thawnthu ngaihnawm lo

Football khawvela coach ṭha sawi a nih apianga lam hmaih ni tawh lo tur Mourinho hi tun hnaiah a hnawng tiin a sawi theih - a club enkawl hnuhnung panga Real Madrid, Chelsea, Manchester United, Tottenham Hotspur leh Roma ten an ban vek!

Mahse, Spurs tih lohah hian nomawi a chawi vek tho a, Spurs-ah pawh hian League Cup final hruai thlengin, final khelh hmaa ban a ni. Roma pawh 2021-22 season khan Europa Conference League-ah a champion pui a, 2022-23 season-ah Europa League final a hruai thleng bawk.

Roma a enkawl lai hian Saudi Arabia lam aṭangin sum mawm tak nen dawr ni mah se, sum tam tak aiin hmingṭhat a thlang a, Italian club hi nuam a ti bawk. Mahse, heti chung hian Roma erawhin a chungah zahngaihna an lantir ve lo a, January khan an ban.

Mourinho hian, "Engtinnge European final a zawna lut coach hi an ban theih zawk? Hriatthiam a har a ni," tiin Roma a kap zui a, sum tam tak hlawh tura sawm a nih laia a phatsan duh loh club-in an ban chu a hrethiam lo hle.

The Special One chu!

Mourinho hian heti tak hian ban tawk ngun tawh mah se, Fenerbahce fan-te erawh amah lawm turin khati zat kha an la pungkhawm thei tho a, hei hian Portuguese coach ropuizia a hrilhfiah.

A sulhnu hi en ila, a ropui hrim hrim bawk. Porto a enkawl laiin Primeira Liga (2), Taça de Portugal (1), Supertaça Cândido de Oliveira (1), Champions League leh UEFA Cup-ah te a champion a, budget nei tlem tak chunga CL nomawi a chawi thei kha a ropui hle.

Chelsea chu vawi hnih enkawlin, Premier League (3), FA Cup (1), League Cup (3) leh FA Community Shield-ah a champion pui a, Inter Milan tan 2009-10 khan treble champion niin, Serie A-ah hian vawi hnih a champion pui a, Italian Super Cup a chawipui bawk.

Real Madrid tan La Liga, Copa del Rey leh Supercopa de Espana vawi khat ṭheuh a chawi a, Manchester United pawh League Cup, Community Shield leh Europa League a champion pui a, Roma-ah lah ECL nomawi a chawi bawk - European football inelna pathuma champion thei coach awmchhun a ni.

Aw hmangaihna...

Mourinho-a'n amah lawmtu fan-te lawmna tur ṭawngkam mawi a ui lo a, Portuguese coach chuan, "A tlangpui thuin, coach-te chu nomawi an chawi hnuah lawm an ni chauh ṭhin a, he hmunah erawh engmah ka tih hmain min lawm nghal em em mai a ni.

"Mawhphurhna sang tak ka nei a ni tih ka hriat phah. Ka tiam a che u, tun aṭang chuan in mi leh sa ka ni a, he club jersey hi ka tisaa bet ang mai a ni ta," a ti a, Turkish club-ah a hlim hma hle.

Mourinho contract rei zawng hi chiang taka tarlan awm lo mah se, khawthlang media-te chuan kum hnih atan niin an tarlang a, an result-a zira pawhsei leh theihna dan a awm bawk - Mou-a'n Turkish club-ah a hming chher leh a tum dawn.

Chelsea coach hlui Mourinho hi tun hma ang ni tawh lo mah se, a hlawh pawh a la tam viau! Turkish media-te chuan kum khatah euro maktaduai 10 a hlawh dawn niin an sawi a, khawvela coach hlawh hnem pawl a la ni phak dawn tho tihna a ni.

A hautak dawn

European top five league club enkawl dawn lo mah se, Mourinho-a tan hna a hautak dawn - a thlak tak Turkish coach İsmail Kartal-a'n season liam ta khan Super Lig-ah Fenerbahce hi vawi khat chiah tlawm puiin, point 99 an hmu.

Mahse, point 102 hmua champion ta Galatasaray an phak loh avangin season tluana league match khat chiah tlawmpuitu Kartal hi an ban a, Mourinho lam an hawi - an duh chu nomawi a ni, tih a chiang.

Mourinho chuan, "Football hi chu thinlung chhun phak thil a ni a, chutiang ang suangtuahna nena hun hman nan hei aia hmun duhawm zawk a awm lo. He club suangtuahna neitu hi in ni a, chuvang chuan club President nen kan inhmuh aṭang khan he hmun hi pan ka châk nghal - in vai atana coach nih hi ka duh a ni," tiin Fenerbahce fan-te chu a hrilh.

Portuguese coach chuan sawi zawmin, "Turkish football-a hnathawh hi ka châk ṭhin a, in league hmasawn nana puih ka duh. Ka tana pawimawh ber erawh Fenerbahce a ni a, contract ka ziah aṭang khan in duhthusamte chu ka duhthusam an ni ve ta a ni," a ti.

An ṭha ve tawk?

Fenerbahce hian player langsar tak tak an kawl nual. Roma lama Mourinho nena thawk dun ṭhin Edin Džeko, Chelsea striker hlui Michy Batshuayi, Polish attacking midfielder ṭhangduang Sebastian Szymański, Manchester United midfielder hlui Fred, Serbia captain Dušan Tadić, Leicester City defender hlui Cağlar Soyüncü leh Croatia keeper Dominik Livaković te an kawl.

Season hman zawh takah khan Dzeko-a'n match 46-ah goal 25 khungin assist vawi 10 lai a la nei a, Batshuayi pawhin match 43-ah goal 24 leh assist vawi thum neiin hming a chher hle - kum 35 ni tawh mah se Tadic-a'n match 56-ah goal 16 leh assist 16 a la nei thei bawk a, an chhe lo.

Hei mai a ni lo. Mourinho hian Romelu Lukaku lakluh a duh nia sawi a ni nghal a, Roma lama a hman thiam sa Paulo Dybala hming lam rik a ni bawk, 2013-14 season hnua league nomawi la chawi lo Fenerbahce hian Champions League chu second qualifying round aṭangin an khel dawn a, player pahnih hi an lak theih chuan an tan an ṭangkai dawn.

Mourinho chuan, "Qualifier-ah round thum kan khelh a ngai a, kan player pariatin Euro an khelh dawn avangin pre-season an zawm thei lawk dawn lo bawk. Mahse, chona hmachhawn hi nuam ka ti tih inhriat kha - Champions League khel turin kan bei ang," a ti a, European football-a club inelna sang berah inlan leh a châk.