Vietnam Grand Prix an ṭhulh

A vawi khat nan Vietnam Grand Prix neih tum ni mah se kuminah neih theih a ni dawn lo. Asia rama inelna zinga pakhat hi April thla a neih tur kha ni mah se coronavirus vangin sawn lailawk a ni a, tunah erawh an ṭhulh fel ta.

Inelna neihna tur Hanoi chuan July thla thleng kha chuan beisei an la nei sang, thlasik tir lam November thlaah neih theih an inring. Mahse F1 thuneitu lamin ruahmanna an siam tharah chuan kumin chhungin China leh Vietnam ramah inelna a awm dawn lo.

Thu chhuah siamin Vietnam Grand Prix Corporation chuan, "Thutlukna harsa tak a ni, mahse keini chuan kawng hrang hrang ngaihtuahin hetiang aia ṭha thutlukna hi kan hre lo a ni," an ti. Vietnam-ah hian hri kai 1,110 chuang an awm a, an zinga 35 chu an thi.



Share this Post

Login to comment
No Comments