World bicycle day rally nei

World Bicycle Day (WBD) denchhenin, nimin zing khan Cycle Rally neih a ni. Mizoram Cycling Association leh Ministry of Tourism, North East Regional Office, Guwahati bultuma rally neihah hian mi 25 thawkchhuakin AMC office kawt aṭangin Subhash Nayak, Tourism Manager India Tourism Field Office, Aizawl chuan vailiamin, Vanapa Hall kawt thleng an tlan.

WBD hi kum 2018 aṭanga hman ṭan a ni a, kum tin thupui thlan bik neih ṭhin a ni; kumin thupui hi “Projecting Health, Equity and Sustainability through Cycling” tih a ni a, khawvel ram hrang hranga Bicycle Day lawmna hun hi kawng hrang hranga hman a ni a, thupui thlansa bakah hian a ram milin thupui tesep thlan belh ṭhin a ni bawk. India ramah chuan thirsakawr khalh te himna tur au hla #Give4FeetToCycle tih leh #respectcyclists tih te hman a ni bawk.

Mizoram Cycling Association hian thirsakawr hmanga intihsiakna kawnga Mizo ṭhalaiten hma an sawn theihna turin kawng hrang hrangin hma a la a, intihsiak hrang hrangte buatsaihin, rampum huap intihsiaknaah te a tel ve ṭhin bawk. July thlaah thirsakawr intlansiak rothap “Mizoram XCO 2024” chu Lungleia neih tumin a inbuatsaih mêk bawk.