Rossi-a'n Covid-19 a kai

Valentino Rossi chu coronavirus a kai tih hmuhchhuah a ni a, hri leng vang hian bike intlansiakna sang berah hian inelna pahnih a hmachhawn thei lo tura ngaih a ni.

Pathianni tlai dar 4:30 hian Ciudad del Motor de Aragon-ah Aragon Grand Prix an tlan dawn, tlankawng ngaiah bawk hian kar khat hnuah Teruel GP tlan a ni leh bawk ang, heng inelna pahnihah hian Rossi a inlan thei dawn lo.

Yamaha rider Rossi chuan, "Ka zing tho kha ka nuam lo a, ka khua a sik bakah ka ruh chuaktuah a kham ṭhem ṭhum bawk. A rang thei ang berin doctor ka ko a, vawi hnih min endik. Coronavirus ka kai tih hmuhchhuah a ni a, ngaihtuahawm erawh ka ni lo.

"Aragon GP-a ka inlan thei lo tur hi pawi ka ti takzet a, inelna pakhat aia tam ka chawlh a ngaih loh hram ka beisei," a ti. Season kal laiah Italian rider hi 13-na dinhmun luahtu a ni mek, rider kal fawr an awm loh avangin champion turin kawng a la inhawng.



Share this Post

Login to comment
No Comments