Real Madrid leh Mbappe an inrem ta!

Champions League nomawi an chawi zo chiah a, chanchin lawmawm a nei zui leh nghal - Real Madrid chuan Kylian Mbappe an la lut a, inremna an ziak fel tawh niin British media rintlak BBC chuan an tarlang.

Mbappe hian Paris Saint Germain tan June 30 thleng daih contract a nei a, a pawtsei dawn lo. Kumin January thla aṭang khan a duh ang thlapin club dang a be thei tawh - Spanish club lian nen hian an inrem ta a ni.

Tun karah

Kum 25 mi Mbappe leh Real Madrid an inrem tawh a, tunkar chhung hian La Liga champion hian an player thar hi an phochhuah hman a rinawm - July 1 aṭangin La Liga bazar a inhawng dawn, chumi hunah chuan club a zawm thung ang.

June 14 zanlai aṭangin European Championship khelh a ni dawn, tunah chuan Mbappe hi France training-na hmunah a awm a, ram leh ram inelna lian an ṭan hma ngeiin Real chuan an player thar hi pho chhuah an duh.

Real Madrid leh Mbappe inremna hi kum 2029 thleng daih a ni a, season khatah pound maktaduai 12.8 zel a hlawh ang a, contract a ziah avang hian pound maktaduai 128 a dawng bawk ang, hei erawh kum nga chhunga pek tur a ni thung.

Mbappe hian a club hmasa PSG tan goal 256 a khungsak hman a, an club tana goal khung tam ber a ni. France rama inelna hrang hrangah a champion kim tawh, tunah chuan a duhthusam angin UCL nomawi lak ngei a tum dawn a ni.

Real lamah chuan

Champions League nomawi vawi 14 an chawi tawh a, European football inelna sangah Real Madrid an chungnung hle. Mbappe tan chuan a naupan lai aṭanga a khelh châkna a ni bawk a, a tan hei aia duhthlan tur ṭha hi a awm tawh chuang lo.

Player tawnhriat ngah zinga mi Toni Kroos chawl tawh mah se Luka Modric erawhin kum khat daih contract a ziah belh dawn niin an sawi a, kum 38 mi Modric hian Mbappe-a um tur ball a pe chhuak thei dawn niin a lang.

Tlarhma lamah Vinicius Junior a awm a, Brazilian forward hi mual sir lama awm thiam a ni - coach Carlo Ancelotti-a'n engtiangin nge a remkhawm ang tih hriat a chakawm tawh hle, forward ṭha Rodrygo an la nei bawk.

Jude Bellingham an nei bawk a, English midfielder hi tlarhma lam puitu pawimawh niin Mbappe tha tichak zualtu a nih a rinawm. Sawi lawk vek a harsa, sawi lawk theih erawh chu Real Madrid tlarhma an hlauhawm hle dawn tih hi a ni.