Cristiano Ronaldo chu Turin khawpuiah mimal thlawhtheihna hmangin a thlawk lut leh tawh a, team training la zawm thei loin a chenna in lamah khung hran chhunzawm rih a ni ang.

Portugal tana a feh chhuahna lamah Ronaldo hian Covid-19 a kai, Italy rama inkaihhruaina angin ni 10 chhung inkhung hran tur a ni dawn. Ronaldo awm loh laiin Juventus pawh an squad pumpui chu midang tlawh pawh lo tura awmkhawmtir an ngai.

Juve hi an player zinga mi, American midfielder Weston McKennie chuan coronavirus a kai a, midang in kai ve lo mah se an squad hi khunghran an ni a, zanin dar 12:15 hian Serie A match khel turin Crotone an lenchilh tho ang.

Hri kai chungin Ronaldo-a'n Turin a pan a, Italy sports minister Vincenzo Spadafora chuan Portuguese forward hian dan a bawhchhiah niah a ngai. Spadafora chuan, "Thuneitu lam aṭanga phalna pek a nih loh chuan a dik lo," tiin a sawi.

Italian champion Juve erawhin an player hian phalna a nei niin an sawi. Thu chhuah siamin Juve chuan, "Cristiano Ronaldo chu Turin-ah a lo kir leh tawh a, damdawi lam thiamte duh ang thlapin a thlawhtheihna pawh sawngbawl a ni," tiin an sawi thung.

Covid-19 vang hian football huangah pawh buaina a la awm chhunzawm zel dawn niin a lang. Juventus hi an league match hnuhnung bera an hmachhawn tur Napoli chu hri leng vangin an inlan thei lo a, Old Lady lam hian inkhel hah loin point thum an hmu.

---

Share this Post