Alcaraz leh Tsitsipas te an tlang; An intawng chhunzawm dawn

French Open mipa champion ni thei tura rinkai Carlos Alcaraz leh Stefanos Tsitsipas te chuan an khingpui ve ve hnehin last 16 an paltlang a, player pahnih hi quarterfinal-ah an inhmachhawn chhunzawm leh nghal dawn a ni.

Pathianni zan Court Philippe Chatrier-a inkhelah Alcaraz hian Felix Auger-Aliassime chu 6-3, 6-3, 6-1 in a hneh. Paris khawpuiah khua a ṭha a, ruah surin a tihbuai loh avangin nuam leh engthawl takin match an khel zo.

Inkhel dangah Tsitsipas chuan world number 35 Matteo Arnaldi lakah set hloh hmasa zet mah se, huaisen taka bei letin 3-6, 7-6 (7-4), 6-2, 6-2 in a chak a, a vawi khat nana Grand Slam champion nih a tumna a vawng nung.

Alcaraz a nghet

Mak deuh mai chu - Rafael Nadal ang bawkin Carlos Alcaraz hi Spanish mi a ni a, an rama an inkhelhna ṭhin clay court chu a hman thiam a ni. Clay court-a inkhel thiam ni mah se US Open leh Wimbledon chu a champion hmasakna hmun a ni daih thung.

Kuminah French Open title lak ngei a tum a, duhthusama ṭhain inbuatsaihna nei thei lo mah se tournament takah erawh a khel ṭha rih hle. Alcaraz chuan, "Ka service, ball ka lo dawnsawn dan leh chetvel danah ka lawm hle, harsatna nei loin ka inkhel.

"A nihna takah chuan Grand Slam hi a harsa a, a bik takin a tir lam hi a harsa duh hle bawk. Chutiang karah chuan ṭha leh tluang takin ka khel thei," a ti. Match vawi li a khelh tawh chinah set khat chiah a la hloh, a nghet ṭha tawk rih hle.

Comeback chu

Stefanos Tsitsipas hi player ṭha leh thawkrim a ni a, inelna lian Grand Slam huangah pawh Australian Open 2023 leh French Open 2021 khan final a lut a, mahse nomawi a la chawi lo thung, tun ṭum hi atana hun remchang ṭhaah ngaih a ni.

Kum 25 mi Tsitsipas chuan, "Carlos nen kan intawng leh dawn a ni a, ka hmuh dan chuan chak turin remchang ka neiah ka ngai. Amah pawhin a lo sawi ve tawh ṭhin angin, inkhel awlsam tak chu a ni lo ang," tiin quarterfinal a thlirlawk.

Season hmasa khan Tsitsipas hian world number 1 nih theihna remchang nei chungin French Open hi a khel a, mahse quarterfinal-ah Alcaraz hian a lo tih tawpsak; kuminah a round ngaiah bawk an intawng leh dawn a, thawnthu tihdanglam a tum tawh ang.

Sinner a chak

Jannik Sinner sawi hmaih a thiang lo - Australian Open champion lai hian Corentin Moutet chu 2-6, 6-3, 6-2, 6-1 in a hneh a, a match lehpekah chuan Hubert Hurkacz hnehtu Grigor Dimitrov a hmachhawn chhunzawm leh dawn a ni.

Italian tlangval, world number 2 ni bawk Sinner chuan, "Tumah hi rinkai leh buk rit bik kan awm lo, a bik takin tun ang round thleng thei tawh chin hi chu hmachhawn an harsa em em vek, chuvangin a tir aṭanga fimkhur a ngai takzet," a ti.

Roland Garros bikah chuan Sinner hian kum 2020 hnua a vawi khat nan quarterfinal a thleng ve leh chiah a ni a, clay court inelna lian berah hian a vawi khat nen semifinal thlen ngei a tum ang, kawng awlsam erawh a ni dawn lo.