Bayern Munich-in season an ṭan tlai avangin Ningani zan khan DFB-Pokal first round an khel ve chauh a, FC Duren 3-0 in an hneh. Bavarians tan player thar Eric Maxim Choupo-Moting-a'n goal hnih a khung bakah Thomas Muller-a'n penalty aṭangin a khung belh bawk. 

Bundesliga khelh chhunzawm a ni dawn a, champion lai Bayern hian zanin dar 10:00 hian Arminia Bielefeld an hmachhawn dawn. Zanin dar 7:00-ah Hoffenheim leh Borussia Dortmund te an inkhel bawk ang.

Choupo-Moting

International break laiin DFB-Pokal first round inkhel dah a ni a, chutihrualin Bayern khingpui FC Duren inkarah hian team 141 zet an awm avangin phunnawi a rem lo. Hansi Flick-a tan player thar tan player thar Choupo-Moting, Douglas Costa leh Bouna Sarr hmanna remchang a ni a, ram tana koh loh Thomas Muller leh Jerome Boateng tan practice match ṭha tak a ni thei bawk.

Bayern rawlthar kum 17 mi Jamal Musiala chu player hmuhnawm a ni a, chutihrualin minute 24-na leh 75-naa goal khungtu Choupo-Moting chu man of the match a thlan a ni. Cameroon international hi Robert Lewandowski thachhang dawl tura tih a ni a, FC Duren laka a khelh danah Bayern hruaitute an lawm ang.

Bundesliga a nung

Bayern Munich leh Borussia Dortmund ten point an hloh tawh avangin Bundesliga a nung a tih theih. Bavarians hian Arminia Bielefeld a hmachhawn dawn. Bielefeld hi season liam ta Bundesliga 2 champion an ni a, treble champion Bavarians el pha tur an la ni lo.

Hansi Flick-a'n hliam vangin Leroy Sane chhawr thei lo mah se Serge Gnabry, Kingsley Coman leh Douglas Costa te chhawr tur a neih avangin player thlan turah buaina awm lo. Bavarians tum ber tur chu Champions League-a Atletico Madrid an hmachhawn hmaa result ṭha neih a ni ang.

Borussia Dortmund-in Hoffenheim khelmual Rhein-Neckar-Arena an tlawh dawn a, hei hi inkhel en châkawm zawk chu a ni. Dortmund hi rawlthar ṭha rual awm khawmna a ni a, team hriatthiam har tak Hoffenheim lakah fiahin an awm ang.

---

Share this Post