Toni Kroos a chawl ta

Kum 34 mi lek ni chungin Toni Kroos-a'n inkhelh a chawlhsan tur thu a puang a, club football-a a match hnuhnung ber chu Inrinni zan khan a khel ta - Champions League nomawi nen a career a thlah a, hei aia chawlh dan duhawm zawk a awm chuang lo.

Kroos hian Real tan match 465 khelin nomawi 22 a chawisak a, goal 28 leh assist vawi 99 a nei. Champions League-ah ringawt pawh Real tan nomawi panga a chawi ta a, Bayern Munich tana a khelh laiin vawi khat a lo champion tawh bawk.

Real hi Champions League bakah league nomawi pali, Copa del Rey, Spanish Super Cup (4), UEFA Super Cup (3) leh FIFA Club World Cup (5) te a hlawh chhuaksak a, a record hi a ropui rem rem hle.

Germany tana World Cup 2014 nomawi chawi tawh Kroos hian Germany tan Euro 2024 a khel leh phawt ang a, a khelmual nunchan chu a mangṭha tawh ang.

Kroos chuan, "Ka lung a leng dawn takzet. Champions League nomawi nen ngeia football hi thlah ka duh a, ka thlah dawn ta. Ka tana he nomawi hlutzia hi sawiin a siak lo," a ti.

Germany tan vawi 108 inlana goal 17 khungtu chuan, "Champions League-a nomawi paruk chawi chu a ropui lutuk a, hetiang record hi ka siam ka lo ring ngai lo," a ti a, a sulhnu a chhuang hle.

Real boss Carlo Ancelotti chuan, "A chung bera awm reng chungin football a thlah ta a, hei aia duhawm zawka chawlh dan a awm chuang lo. He club tan hian legend a ni a, a hnathawh avangin lawmthu kan hrilh.

"Kroos hi a thiam em vanga ropui a ni ngawt lo a, a rilru puthmang leh professional-na te hian tun dinhmun hi a hruai thleng. Kum 10 he hmuna a cham chhungin ni khat lek pawh chawl loin hun a hmang a, a rilru thlak se kan ti hle - chutiang a thleng ta a nih chuan kan awm reng e," a ti a, a player a la ui hle.