Mohammedan an chak - coach an ban

Hero I League qualifier-ah Mohammedan SC chuan a vawi hnih nan nimin khan an khingpui an hneh a, Ara FC chu 4-1 ngawtin an sawp - Kolkata club hian an coach Yan Law an ban zui a, he thu buatsaih lai hian an ban chhan hriat hman a ni lo. 

Mohammedan hian season thar atan I League khelh ngei an tum tih transfer bazar-ah an pholang tawh a, goal khung tura lakluh Willis Plaza chuan minute 13-naah goal hmahruai a khung. 

East Bengal striker hluiin goal hmahruai a khung hnuah Nepal international Abhishek Rijal chuan first half chhungin goal hnih a rawn khung ve leh a, chak tur a chiang tawh. 

Mohammedan defender Saiful Rahaman chuan an lamah ti lutin Ara lam hi goal 'khilai' mah se Ahmedabad club hian goal dang an khung thei lo - SK Faiaz chuan minute 89-naah Black Panther (Mohammedan sawina) chak nemnghehna goal a rawn khung a, a tawpah 4-1 in Kolkata club an chak. 

Vanlalbiaa Chhangte chuan Mohammedan SC tan inkhel bul a ṭan a, Biaklian Paite erawhin bench lamah hun a hmang tluan thung - Black Panther hian match hnih an khelhah point ruk an hmu tawh a, I League an mitthla ṭan der ang. 

Nizan inkhel dangah Bengaluru United chuan William Opoku goal khung hmangin Garhwal FC chu 1-0 in an hneh a, match hnih an khelh tawha an vawi khat chakna a nih laiin Garhwal erawh match hnih an khelh tawhah an tlawm ve ve thung.