Nations League-ah Germany an chak ve ta

Germany-in Nations League-ah a vawi khat nan chak hmel an hmu ve ta a, Inrinni zan khan Ukraine 1-0 in an hneh. League A group 4 inkhel dangah Spain-in Switzerland 1-0 in an hneh ve bawk.

Olympic Stadium, Kiev-ah entu sing hnih vel an pung khawm a, Germany tan Matthias Ginter leh Leon Goretzka ten an khung a. Mualneitu tan Ruslan Malinovskyi-a'n minute 76-naah penalty aṭangin siphurh a sut ṭhen a, Germany an ṭang tluan hram.

Spain-in Switzerland an mikhual a, minute 14-na lekah Real Sociedad forward Mikel Oyarzabal-a'n goal awmchhun a khung. La Roja keeper David de Gea-a'n goal a chhuah lo a, Wolverhampton Wanderers forward Adama Traore chu a vawi khat nan Spain tan a inlan.

Joachim Low-a'n friendly match-ah player enchhinin Turkey nen 3-3 in an inhneh-tawk a, Nations League-ah erawh a player neih ṭhat a rawn hmang.

Andriy Shevchenko hoten Germany an hlau bik lo a, bul ṭan ṭha mah se team ṭha zawk Low-a hote an insiamrem hnuah inkhel an thunun. Chelsea manager Frank Lampard-a duh loh Antonio Rudiger-a'n ṭha zeta a khalh luh zarah Matthias Ginter-a'n minute 20-naah goal hmahruai a khung.

Ukraine keeper Georgiy Bushchan-a'n Serge Gnabry, Lukas Klostermann leh Joshua Kimmich te goal khung tur ṭha takin dansak mah se minute 49-naah a chesual. RB Leipzig right back Klostermann cross chu Bushchan-a'n a thlauh a, Leon Goretzka-a'n a tauh lut nghal.

Germany nuam sa taka chak thei an ni a, amaherawhchu Niklas Sule-a'n Ukrainian forward Roman Yaremchuk a tihtluk avangin penalty a chawi. Mualneitu tan Ruslan Malinovskyi-a'n minute 76-naah penalty aṭangin a khung a, Ukraine-in beiseina thar an neih phah.

Joachim Low hote an ṭang tluan a, Nations League match ruk an khelh tawhah chak hmel an hmuh loh hnuin a vawi sarihnaah an chak. Germany boss Low chuan, "Kan chak a, ka lawm. Ṭul loah penalty kan chawi a, 3-0 emaw 4-0 emaw chak thei ni mah ila chance kan hlah hnem avangin hun tawp thlengin a harsat phah," a ti. 

Germany hian August 13, Thawhlehni zan dar 12:15 hian Switzerland an mikhual dawn a, thil danglam a thleng a nih loh chuan Low-a'n player a thlak danglam loh tur thu a sawi.

Low hian starting eleven ngai a hmang a nih chuan wing back pahnih Klostermann leh Marcel Halstenberg ten bul an ṭan leh thei dawn a,  Rudiger pawh  Ginter leh Sule te nen defence laiah an inkawp leh thei ang. Tlarhmaah Chelsea player tan Timo Werner leh Kai Havertz ten bul an ṭan lo a; Leon Goretzka, Serge Gnabry leh Julian Draxler te an awm avangin thil mak a ni hran lo.

Spain-in mikhual Switzer-land lakah inkhel an thunun a, Estadio Alfredo Di Stefano, Madrid a inkhelah hian Mikel Oyarzabal-a'n goal awmchhun a khung. La Roja goal khung hi Swiss goalkeeper Yann Sommer-a pass sual aṭanga inṭan a ni a, Mikel Merino rawn tlazep hmanin Real Sociedad midfielder hian club lama a khelhpui Oyarzabal-a khung tur a siamsak.

Real Sociedad forward Oyarzabal hian second half-ah goal khung belhna hun ṭha a nei a, Swiss goalkeeper Yann Sommer-a'n a tihsual siam ṭhat nan a dansak. Spain keeper David de Gea-a'n hna a nei meuh lo a, Switzerland wing back Loris Benito goal khung tur a dansak erawh a ṭha hle.

Barcelona rawlthar duhawm Ansu Fati a che ṭha tawk lo a, Wolves forward kum 24 mi Adama Traore-a'n minute 57-naah a thlak. Spain coach Luis Enrique chuan, "Kan chakna zat chu eng pawh ni se kan khelh danah erawh ka lungawi. Pressure kan pe ṭha a, kan khingpuiten chance an neih loh nan kan nawr bet vek thei a ni," tiin an khelh danah a lungawi thu a sawi.

Spain hian match thum khelhah point sarih hmuin hmahruaitu an ni a, October 13, Thawhlehni zanah Ukraine an hmachhawn ang.