FA Cup final-ah a khel ṭha zawk an chak; Man United an champion

Wembley Stadium-ah Manchester United-in an hmelma Manchester City chu manager Erik Ten Hag-a ruahmanna ṭha tak hmangin 2-1 in an hneh a, FA Cup nomawi an chawi bakah Manchester khawpui a sen. Man United tan Alejandro Garnacho leh Kobbie Mainoo ten goal an khung a, anni pahnih hian 2022 FA Youth Cup-a Man United an champion tawh bawk.

FA Cup final hmain Ten Hag ban tur thawm a ri ring a, amaherawhchu Dutch manager hian season hnih chhungin Man United hi League Cup leh FA Cup-ah a champion pui a, season tharah Europa League an khel dawn. Ten Hag-a hmalam hun a chiang lo a, chutihrualin khawvela team ṭha ber (?) Man City hneh theitu manager ban hi thutlukna atthlak a ni ang.

Ten Hag a chungnung

Premier League nomawi chawi hlim Manchester City aiin Ten Hag-a enkawl Manchester United nomawi duhin an tuihal zawk. Dutch manager Ten Hag-a'n team chhe zawk a ni tih a inpawm a, striker (no. 9) nei loin tun season league match-a ṭum hnih an hneh loh City an hmachhawn.

Captain Bruno Fernandes chuan 'false nine' position a chelh a, midfield-ah game nghet ṭha zawk Man City lakah an hnufual ta bik lo. Ten Hag-a vannei tel a, FA Cup final hmain defender pawimawh pahnih Lisandro Martínez leh Raphael Varane te an dam ṭha bawk.

Counter attack-ah United an innghat a, Marcus Rashford leh Garnacho tlan chakna chu an hmachhuan a ni a; chutihrualin a ṭul hunah City goalkeeper thlengin pressure (high press) an pe ngam. Mahse, Rashford hi tlan chak leh tharum ngah Kyle Walker-a'n a ven avangin hmun hlauhawm a thleng pha meuh lo.

City midifelder chhuanvawr ṭhin Kevin de Bruyne a tla hniam ṭan tih a lang. Belgian midfielder hian ball fing pek kawngah leh tlan tam kawngah tun hma a pha lo a, United tlarhnung tan City tlarhma ven an awl phah.

Goal ho leh mawi bik

City-in rilru takin United an ngam a, defence an tawlh chhuak hma a, goalkeeper leh defender inkar a zau. Ten Hag-a naute hmun awl zau lai an hmang ṭha a, minute 30-naah Diogo Dalot ball vawrh luh chu Garnacho-a'n a umlut a, City defender Josko Gvardiol-a'n goalkeeper Stefan Ortega tlan chhuak hmu loin an lamah a tauh let. Argentine winger Garnacho-a'n goal ruakah goal hmahruai a khung.

Goal khatin Man United inringtawkna a pe a, goal luh hnu lawkah Garnacho thawhrah sengin Rashford-a'n goal ruakah a khung. Mahse, VAR hmanga ennawn a nih hnuah Garnacho hi a offside avangin pawm a ni lo.

Minute 39-naah goal mawi bik chhawp chhuahin a awm a, a bu ang thlap a ni ber. Man United captain Bruno chuan an mual lamah Mainoo a pe a, United rawlthar duhawm hian Rashford a pe. English winger Rashford hian a tlan chakna a lar pui a, mah se ball pet pawh a thiam.

Rashford hian mual veilam aṭangin mual ding lama awm Garnacho chu a vawrh thlak sak a, boruaka ball a thlawh lai hian Fernandes leh Mainoo ten hmalam panin an tlan ve char char. Garnacho-a'n mual laia player tlan lut thlir pahin a khalh muang fan raihin a khalh lut a, Fernandes a pe.

United captain hian vawi khat khawi lekah Mainoo a pe a, ball lirhna hmun leh lirh chak zawng chu duhthusam a ni. Chiang takin Man United-in City tlarhnung an ṭhiat a, Mainoo-a'n cool zetin a tawp a khar - goal duhthusam a ni.

An ṭang tluan

Pep-a'n first half-ah tactic bakah player a thlang sual tih a pawm a, second half ṭan chiahah Mateo Kovacic leh Nathan Ake te la chhuakin Jeremy Doku leh Manuel Akanji te a luhtir. Doku tlan chakzia a hmuh theih a, chutihrualin tlan chak leh tharum ngah ringawt chu Aaron Wan-Bissaka-a'n dan a harsat lo tih a lang tel bawk.

United keeper Andre Onana a che ṭha a, Walker ball pet kawh zet ṭum hnih a dang. Chutihrualin United an vannei tel a, Erling Haaland crossbar pet per Julian Alvarez-a'n goalkeeper chauh a hmachhawn hnua goal zawna a pet theih loh chu goal-ah lut se, inkhel result a danglam thei ang.

Inkhel entu zinga ṭhu Sir Alex Ferguson pawh technical area-ah ṭhu tawh lo mah se hun tawp dawn hnaiah chuan a sana a bih zeuh a, inkhel boruak san zia a lang. City beiseina siam turin Doku-a'n box pawn aṭangin a pet goal a, Onana-a'n a tihtur a ti tawk lo. Minute 87-naah 2-1 a ni a, injury time-ah minute sarih pek a nih bawk avangin City-in beiseina sang tak nei mah se Ten Hag-a hote an ṭangtluan.

Engtin zel?

Man United-in FA Cup nomawi an chawi avangin Europa League an khel dawn a, season thar ṭan hmain Manchester City nen Community Shield an khel bawk dawn. Premier League-a Man United chunga awm Chelsea leh Newcastle United tan erawh result ṭha a ni lo.

Chelsea-in Europa League khel loin Conference League an khel thung dawn a, Newcastle United tan erawh European competition-ah hmun a awm lo. Man United season chhiat ber ṭuma an sawiah FA Cup nomawi an chawi a, anmahni ṭantute pawh an nui leh thei ta.

Man United manager Ten Hag chuan, "Season hnih chhungin nomawi pahnih ka chawipui a, a chhe hran lo. Min duh tawh lo a nih chuan hun dangah ka kal ang a, nomawi ka chawi ang. Chu chu ka tih ṭhin dan a ni," tiin inkhelh banah a sawi a, ban a hlau bik lo.

FA Cup champion-in club chhung boruak a tinung thar a, captain Bruno Fernandes-a'n inkhelh banah cham a duh thu a sawi. Champion lawm avangin Rashford-a mittui a tla a, English forward chuan, "Ka tana club hlutzia hi hre rawh se," tiin amah seltute a chhanglet.

FA Cup-ah Arsenal-in nomawi 14 chawi tawhin an champion hnem ber a, a dawttu chu Man United an ni - tun ṭum hi vawi 13 an champion-na chiah a ni.