India squad-ah Mizo pali an awm

June-a FIFA World Cup Qualifier khel tur India coach Igor Stimac chuan Blue Tigers squad a puang a, Mizo pali an tel - India squad-a Mizoram player an tel tam ber ṭum a ni a, Mizoram football tan chanchin lawmawm a ni.

India squad-ah hian a vawi khat nan Mohammedan SC striker David Lalhlansanga leh Inter Kashi midfielder Edmund Lalrindika te chu koh an ni a, I League aṭangin anni pahnih chiah hi koh an ni - Mumbai City forward Lallianzuala Chhangte leh East Bengal defender Lalchungnunga te chu Mizo awm ve dang an ni.

Stimac-a'n probable squad a puan khan Mizo pasarih ngawt an tel a, final squad-a tel player pali bakah hian Mumbai midfielder ṭha mi Lalengmawia Ralte (Apuia), Odisha FC forward Isak Vanlalruatfela leh Aizawl FC forward Lalrinzuala te an tel.

Mahse, Apuia'n MA a exam dawn avangin India squad zawm loh a thlang a, Isaka leh Rinzuala ten hliam vangin squad an zawm thei lo bawk. Mizo player squad zawm zawng chu India tana inlan tura puan player 27 zingah an tel.

Beisei phak bak

David-a'n season hmasa lawkah Aizawl FC tan a khel a, tun season-ah Mohammedan SC a zawm - a tifuh cher cher hle. Kolkata club tan hian Durand Cup-ah match thum khela goal ruk khungin assist vawi khat a nei a, top scorer a ni.

I League-ah pawh David-a a duai lo. Match 22-ah goal nga khungin, assist vawi hnih a nei a, Calcutta Football League-ah phei chuan goal 21 khungin top scorer a ni chiang hle - I League leh CFL-ah Mohammedan hi a champion pui chiang hle.

Vairengte tlangval David-a chuan, "Final squad-a tel hi chu ka inring ngam chiah lo a, training kan zawh khan haw mai turin ka lo inbuatsaih zawk! Ka beisei aia hmain India squad-ah hian kohna ka dawng.

"A nihna dik takah chuan, season thara ISL khelh a, chet ṭhat chuan min koh ka ring chauh a, ka vanneih vang liau liau a ni," tiin Vanglaini a hrilh a, India tana jersey a ha ve ta mai tur chu a ngaihhlut thu a sawi.

Edmund-a chu

AIFF Elite Academy a awm lai aṭang tawhin player thiam bik Edmund-a chungah beiseina a sang a, Lunglei tlangval hian Indian Arrows, Bengaluru leh East Bengal tante pawha lo khel tawhin, a hming chherna tak erawh Inter Kashi a ni.

Edmund hian season hmasa khan Inter Kashi hi Bengaluru aṭangin loan-in a zawm a, March thla khan I League club-ah hian kum hnih dang khel turin contract thar a ziak - Canadian Premier League club Atlético Ottawa-ah training a nei dawn.

India Under-20 tan pawha lo inlan tawh Edmund hian season hman zawh takah khan I League match 24 khelin goal li a khung a, assist vawi riat a nei bawk - inelna hrang hrangah match 31 khela goal sarih khungin, assist vawi kua a nei.

Edmund-a'n India tana khel tura koh a phu a, a phu ang ngeiin final squad-ah a tel - David-a nen an chance neih ṭhat hi chhawr ngei an tum ang.

LZ-a & Chungnunga

Indian football-ah Lallianzuala Chhangte hming inzawh nawn a ngai tawh lo. Lunglei forward hi a dam ṭhat phawt chuan India senior team-a khel zel tura beisei a ni tawh hrim hrim a, Blue Tigers-a player langsar pawl a ni mek.

LZ-a hian season hman zawh takah khan league match 25 khela goal 10 khungin, assist vawi ruk a nei a, ISL-ah Mumbai a champion pui. Inelna hrang hrangah match 34 khela goal 11 khungin, assist vawi sarih a nei a, a kum zawna AIFF Player of the Year a nih pawhin a mak lo ang.

'Mizo Flash' hming lem an pek hian India tan match 36 khel tawhin, goal sarih a khung a, assist vawi hnih a nei. LZ-a ang thoin Chungnunga chu India tana lo inlan tawh a ni a, Durtlang defender hian ram tan match 10 a khel ve tawh.

ISL-a a season hnihna chauh a hmang chungin East Bengal defender pawimawh a ni a, season hman zawh takah khan league match 17 a khel - vawi 42 clearance neiin, vawi 33 an khingpuite ball a chhuhsak.

Kan hmel a ṭha!

Mizo legend Rokunga'n chhuang takin, "Mizo kan ni kan hmel a ṭha, Kan tum a sang bawk si..." tiin chhuang takin hlain Mizo nih ropuina a lo chawi a, khelmualah Mizo footballer-ten Mizo hmel an tiṭha zual zel e.

Blue Tigers tana Mizo player inlan tawh zat hi 14 an ni a, inlan hmasa ber chu Jerry Zirsanga a ni. Mohun Bagan leh Dempo tan pawha lo khel tawh Jerry-a hian November 5, 2004 khan Kuwait lakah goal khungin, India tana goal khung naupang ber record a siam a, kum 16 leh ni 311 mi a ni.

Jerry bakah hian S. Malsawmtluanga, Robert Lalthlamuana, Lalrindika Ralte, Jeje Lalpekhlua, Lalchhuanmawia Fanai, Isaac Vanmalsawma, Daniel Lalhlimpuia, Jerry Lalrinzuala, Lallianzuala Chhangte, Lalruatthara, R. Laldanmawia, Lalengmawia Ralte leh Lalchungnunga te chu India tana lo inlan tawh an ni.

India hian June 6-ah Kuwait an mikhual ang a, June 11-ah Qatar an lenchilh ang. Blue Tigers hi an group-ah pahnihna an ni mek a, mahse, point li chauh an la neih avangin second round lut tur chuan Kuwait hi an hneh ngei ngei a ṭul ang.